আমেৰিকাৰ উপ-ৰাষ্ট্ৰপতি জে ডি ভেন্সে আমেৰিকা-ইৰান চুক্তিৰ সমালোচনা কৰা ইজৰাইলী কেবিনেটৰ কেইবাজনো মন্ত্ৰীক তীব্ৰভাৱে ভৰ্ৎসনা কৰাৰ পিছত ইজৰাইলৰ ৰাজনীতি আৰু সংবাদ মাধ্যমত ব্যাপক বিতৰ্কৰ সূচনা হৈছে। ভেন্সে ইজৰাইলৰ সংশ্লিষ্ট মন্ত্ৰীকেইজনক ভৰ্ৎসনা কৰি কৈছিল যে-ইজৰাইলে নিজৰ একমাত্ৰ শক্তিশালী বন্ধু আমেৰিকাক লক্ষ্য কৰি আক্ৰমণাত্মক মন্তব্য কৰা উচিত নহয় কাৰণ আমেৰিকাৰ বাহিৰে ইজৰাইলৰ লগত সাম্প্ৰতিক সময়ত কোনো শক্তিশালী সহযোগী নাই। হোৱাইট হাউছত সাংবাদিকৰ সৈতে হোৱা আলাপত ভেন্সে লগতে কয় যে- প্ৰধানমন্ত্ৰী নেতান্যায়াহুৰ কেবিনেটৰ কিছুমান সদস্যই ৰাষ্ট্ৰপতি ড’নাল্ড ট্ৰাম্পক ব্যক্তিগতভাৱে লক্ষ্য কৰি কৰা আক্ৰমণাত্মক মন্তব্যত তেওঁ অসন্তুষ্ট। তেওঁ ট্ৰাম্পক বিশ্বৰ ভিতৰত ইজৰাইলৰ প্ৰতি আটাইতকৈ সহানুভূতিশীল নেতা বুলিও অভিহিত কৰে। ভেন্সে লগতে উল্লেখ কৰে যে- ইজৰাইলক প্ৰদান কৰা অ*স্ত্ৰ-শস্ত্ৰৰ প্ৰায় দুই-তৃতীয়াংশ আমেৰিকাৰ ধনেৰে উৎপাদন আৰু পুঁজিকৰণ কৰা হৈছে। বিগত কিছু বছৰ ধৰি কোনো আমেৰিকান নেতাই ইজৰাইলক লৈ ইমান কঠোৰ মন্তব্য কৰা নাছিল। ইৰান-আমেৰিকা শান্তি চুক্তিত ব্যাঘত জন্মাব পৰাকৈ ইজৰাইলে লেবাননক কৰা আক্ৰমণৰ পিছতে ভেন্সে কৰা এই মন্তব্যই বিশেষ তাৎপৰ্য বহন কৰিছে। ভেন্সে লগতে কয় যে- ৰাষ্ট্ৰপতি ট্ৰাম্পে ইজৰাইলৰ আত্মৰক্ষাৰ অধিকাৰক সমৰ্থন কৰে, কিন্তু ইজৰাইলেও শান্তি প্ৰক্ৰিয়াৰ প্ৰতি সন্মান দেখুৱাব লাগিব।
ইজৰাইল-আমেৰিকাৰ মতভেদে লাভান্বিত কৰিব ইৰানক!
স্বাভাৱিকতে জে ডি ভেন্সৰ এই প্ৰতিক্ৰিয়াই দেখুৱাইছে যে ইজৰাইল আৰু আমেৰিকাৰ মাজত মতভেদ আৰম্ভ হৈছে। এয়া অন্য এক সংঘাতৰ আৰম্ভণিও হ’ব পাৰে। যদি সেয়াই হয় তেনেহলে এই কাৰ্যই ইৰানক আৰু এটা সুবিধা দিব পাৰে। যুদ্ধৰ আগতে ইৰানক লৈ আমেৰিকা আৰু ইজৰাইলৰ মাজত বিশেষ মতভেদ নাছিল। এতিয়া যুদ্ধ সমাপ্তিৰ দিশে গতি কৰা সময়ত দুয়োখন দেশৰ মাজত স্পষ্টকৈ দেখা দিছে মতবিৰোধ। ইপিনে একাংশ ইজৰাইলী সংবাদ মাধ্যমে আমেৰিকাক লক্ষ্য কৰি প্ৰকাশ কৰা বাতৰিত লিখিছে যে আমেৰিকা-ইৰানৰ চুক্তি বা আলোচনাত ইজৰাইলক সম্পূৰ্ণ বাহিৰত ৰখা হৈছে। লেবাননৰ ক্ষেত্ৰত ইজৰাইলক পিছুৱাই আহিবলৈ আমাক আদেশ দিছে। যি আমেৰিকাই ইজৰাইলক অতি ঘনিষ্ঠ বুলি প্ৰচাৰ কৰে সেই আমেৰিকাই আমাৰ শত্ৰুৰ সৈতে চুক্তি সম্পন্ন কৰাৰ আগমুহূৰ্তত আমাক আদেশ দিব পৰা হ’ল। ইজৰাইলৰ বিৰোধী নেতা তথা প্ৰাক্তন প্ৰধানমন্ত্ৰী এহুদ বাৰাকে মন্তব্য কৰে যে এই যুদ্ধই ইৰানক পূৰ্বতকৈ অধিক শক্তিশালী কৰাৰ বিপৰীতে ইজৰাইলক পূৰ্বতকৈ অধিক দুৰ্বল কৰি তুলিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
