৯ মাহতকৈ অধিক সময় সাগৰত থকাৰ পিছত ভূমি স্পৰ্শ ৫০০০ মাৰ্কিন সৈনিকৰ

দীৰ্ঘদিন ধৰি সাগৰত সামৰিক অভিযান চলোৱাৰ পিছত অৱশেষত থাইলেণ্ডত উপস্থিত হৈছে আমেৰিকাৰ অন্যতম শক্তিশালী বিমানবাহী যুদ্ধজাহাজ ইউ এছ এছ আব্ৰাহাম লিংকন। ২ ছেপ্টেম্বৰত জাহাজখন থাইলেণ্ডৰ পূব প্ৰান্তৰ লায়েম চাবাং বন্দৰত উপস্থিত হয়। এই বন্দৰ পাটায়া চহৰৰ ওচৰতে অৱস্থিত। জাহাজখনৰ এই থাইলেণ্ড ভ্ৰমণ সাধাৰণ কোনো বন্দৰ-বিৰতি নহয়। প্ৰায় ২৮৬ দিনৰ দীঘলীয়া মোতায়েনৰ পিছত এইবাৰ জাহাজখনৰ প্ৰায় ৫,০০০জন নাবিক আৰু মেৰিনে কিছুদিনৰ বাবে বিশ্ৰাম লোৱাৰ সুযোগ লাভ কৰিছে।

ইউ এছ এছ আব্ৰাহাম লিংকন হৈছে আমেৰিকাৰ নৌসেনাৰ Nimitz-class পাৰমাণৱিক শক্তিধৰ বিমান পৰিৱাহী জাহাজ। ২০২৫ চনৰ নৱেম্বৰত আমেৰিকাৰ কেলিফৰ্ণিয়াৰ চান ডিয়েগোৰ পৰা যাত্ৰা আৰম্ভ কৰাৰ পিছত জাহাজখন প্ৰথমে পশ্চিম প্ৰশান্ত মহাসাগৰীয় অঞ্চলৰ দিশে গৈছিল। কিন্তু পিছত মধ্যপ্ৰাচ্যৰ পৰিস্থিতি অধিক উত্তপ্ত হোৱাৰ ফলত জাহাজখনক মধ্যপ্ৰাচ্যলৈ স্থানান্তৰ কৰা হয়। ইৰানৰ বিৰুদ্ধে আমেৰিকাৰ সামৰিক অভিযানত জাহাজখনৰ কেৰিয়াৰ ষ্ট্ৰাইক গ্ৰুপে গুৰুত্বপূৰ্ণ ভূমিকা পালন কৰে। আমেৰিকান নৌসেনাৰ তথ্য অনুসৰি, আব্ৰাহাম লিংকন কেৰিয়াৰ ষ্ট্ৰাইক গ্ৰুপত বিমানবাহী জাহাজখনৰ লগতে বিভিন্ন যুদ্ধজাহাজ, বিমান স্কোৱাড্ৰন আৰু সহায়ক সামৰিক ইউনিট আছিল।

এই দীঘলীয়া মোতায়েনৰ আটাইতকৈ উল্লেখযোগ্য দিশটো হৈছে জাহাজখনৰ দীঘলীয়া সময় সাগৰত থকাৰ ঘটনা। বিভিন্ন প্ৰতিবেদন অনুসৰি, ইউ এছ এছ আব্ৰাহাম লিংকনে প্ৰায় ২৮৬ দিনৰ মোতায়েন সম্পূৰ্ণ কৰিছে। ইয়াৰ ভিতৰত ২৫০ দিনতকৈ অধিক সময় কোনো পূৰ্ণাংগ বন্দৰ-বিৰতি নোহোৱাকৈ সাগৰত থাকিবলগীয়া হৈছিল। USNI News-এ প্ৰকাশ কৰা তথ্য অনুসৰি, জাহাজখনৰ আগৰ নিয়মীয়া বন্দৰ-বিৰতি আছিল গুৱামত, ২০২৫ চনৰ ডিচেম্বৰত। ষ্টাৰ্ছ এণ্ড ষ্ট্ৰিপছৰ মতে, এই অভিযানত জাহাজখন ২০০ দিনতকৈ অধিক সময় combat zoneত আছিল আৰু দীঘলীয়া সময় সাগৰত থকাৰ ফলত ক্ৰুৰ ওপৰত যথেষ্ট চাপ পৰিছিল।

লায়েম চাবাং বন্দৰত উপস্থিত হোৱাৰ পিছত জাহাজখনত থকা প্ৰায় ৫,০০০জন আমেৰিকান নাবিক আৰু মেৰিনে পাটায়া আৰু ইয়াৰ আশে-পাশে কিছুদিন সময় কটোৱাৰ সুযোগ লাভ কৰিছে। এইবাৰ মূল উদ্দেশ্য হৈছে যুদ্ধ বা সামৰিক অভিযান নহয়, বৰং দীঘলীয়া মোতায়েনৰ পিছত সামৰিক কৰ্মীসকলক বিশ্ৰাম আৰু মানসিকভাৱে কিছু সকাহ দিয়া। কেৰিয়াৰ ষ্ট্ৰাইক গ্ৰুপ-৩ৰ কমাণ্ডাৰ ৰবাৰ্ট লৌগ্ৰানে কয় যে লায়েম চাবাঙত উপস্থিতিয়ে নাবিক আৰু মেৰিনসকলক “rest and recharge” কৰাৰ এক প্ৰয়োজনীয় সুযোগ প্ৰদান কৰিছে।

কেৱল ইউ এছ এছ আব্ৰাহাম লিংকনে থাইলেণ্ডলৈ অহা নাই। ইয়াৰ কেৰিয়াৰ ষ্ট্ৰাইক গ্ৰুপৰ আন কেইবাখনো যুদ্ধজাহাজো থাইলেণ্ডৰ বিভিন্ন বন্দৰত উপস্থিত হৈছে। ইউ এছ এছ ফ্ৰেন্স ই পিটাৰছেন জুনিয়ৰ নামৰ Arleigh Burke-class guided-missile destroyerখন ওচৰৰ শ্ৰীৰচা বন্দৰত উপস্থিত হৈছে। আনহাতে ইউ এছ এছ ৰবাৰ্ট স্মলছ নামৰ guided-missile cruiserখন ৰায়োং প্ৰদেশৰ মেপ টী ফুট বন্দৰত উপস্থিত হৈছে। অৰ্থাৎ আমেৰিকাৰ এই কেৰিয়াৰ ষ্ট্ৰাইক গ্ৰুপৰ বিভিন্ন জাহাজে থাইলেণ্ডৰ পূব উপকূলৰ কেইবাটাও বন্দৰত নিৰ্ধাৰিত বন্দৰত প্ৰৱেশ কৰিছে।

USS Abraham Lincoln কোনো সাধাৰণ যুদ্ধজাহাজ নহয়। ই এখন পাৰমাণৱিক শক্তিধৰ বিমান পৰিৱাহী জাহাজ, য’ত যুদ্ধবিমান আৰু হেলিকপ্টাৰ পৰিচালনা কৰিব পৰা বিশাল flight deck আছে। প্ৰতিবেদন অনুসৰি, জাহাজখন প্ৰায় তিনিখন ফুটবল খেলপথাৰৰ সমান দীঘল। ইয়াৰ ওপৰত বহু যুদ্ধবিমান আৰু হেলিকপ্টাৰ থাকে আৰু ই নিজেই এক চলন্ত সামৰিক বিমানঘাটিৰ দৰে কাম কৰিব পাৰে।

মধ্যপ্ৰাচ্যত থকা সময়ছোৱাত Abraham Lincoln Carrier Strike Group-এ আমেৰিকাৰ সামৰিক অভিযানক সহায় কৰিছিল। জাহাজখনৰ পৰা যুদ্ধবিমান উৰুৱাই বিভিন্ন সামৰিক অভিযান চলোৱা হৈছিল। প্ৰতিবেদন অনুসৰি, জাহাজখনৰ বিমানসমূহে হাজাৰ হাজাৰ sortie সম্পন্ন কৰিছিল। এই দীৰ্ঘম্যাদী অভিযানৰ ফলত জাহাজখন আৰু ইয়াৰ ক্ৰুসকলৰ ওপৰত কামৰ চাপো যথেষ্ট বৃদ্ধি পাইছিল। পিছত আগষ্টত জাপানত অৱস্থিত USS George Washington-এ মধ্যপ্ৰাচ্যত Abraham Lincoln-ৰ দায়িত্ব গ্ৰহণ কৰে।

ইমান দীঘলীয়া সময় সাগৰত থকাৰ পিছত জাহাজখনৰ ক্ৰুৰ জীৱন-যাপনক লৈও আলোচনা আৰম্ভ হৈছে। বিভিন্ন প্ৰতিবেদনত মানসিক চাপ, খাদ্য আৰু পৰিষ্কাৰ-পৰিচ্ছন্নতাৰ সামগ্ৰীৰ যোগান, plumbing সমস্যা আদি বিষয় উত্থাপন কৰা হৈছে। ক্ৰুৰ মানসিক স্বাস্থ্যক লৈও উদ্বেগ প্ৰকাশ কৰা হৈছে। অৱশ্যে আমেৰিকান নৌসেনাই এই সমস্যাসমূহৰ ব্যাপকতাৰ বিষয়ে কিছু প্ৰতিবেদনক লৈ ভিন্ন মত প্ৰকাশ কৰিছে। তথাপি দীঘলীয়া মোতায়েনৰ পিছত ক্ৰুসকলক বিশ্ৰামৰ সুযোগ দিয়াটো যে গুৰুত্বপূৰ্ণ, সেই কথাত নৌসেনাৰ নেতৃত্বইও গুৰুত্ব দিছে।

এই ভ্ৰমণৰ আন এটা গুৰুত্বপূৰ্ণ দিশ হৈছে আমেৰিকা আৰু থাইলেণ্ডৰ সামৰিক সম্পৰ্ক। আমেৰিকান নৌসেনাই প্ৰকাশ কৰা মতে, থাইলেণ্ড আমেৰিকাৰ এই অঞ্চলৰ আটাইতকৈ পুৰণি অংশীদাৰসকলৰ ভিতৰত অন্যতম। দুয়োখন দেশৰ মাজত বহু দশক ধৰি সামৰিক সহযোগিতা আৰু যৌথ প্ৰশিক্ষণ চলি আহিছে। সেয়ে Abraham Lincoln-ৰ লায়েম চাবাং ভ্ৰমণক কেৱল বিশ্ৰামৰ বাবে কৰা বন্দৰ-বিৰতি হিচাপে নহয়, দুয়োখন দেশৰ দীৰ্ঘদিনীয়া সামৰিক অংশীদাৰিত্বৰ প্ৰতীক হিচাপেও দেখা হৈছে।

থাইলেণ্ডত কেইদিনমানৰ port visit সম্পূৰ্ণ কৰাৰ পিছত USS Abraham Lincoln আৰু ইয়াৰ ক্ৰু আমেৰিকালৈ উভতি যোৱাৰ পথত আগবাঢ়িব। দীৰ্ঘদিনীয়া Middle East deployment, যুদ্ধ অভিযান আৰু প্ৰায় ২৮৬ দিনৰ মোতায়েনৰ পিছত থাইলেণ্ডৰ এই বিৰতিয়ে ক্ৰুসকলক নিজৰ দৈনন্দিন সামৰিক দায়িত্বৰ পৰা কিছু সময়ৰ বাবে আঁতৰি বিশ্ৰাম লোৱাৰ সুযোগ দিছে। সামগ্ৰিকভাৱে, USS Abraham Lincolnৰ থাইলেণ্ডত উপস্থিতিয়ে মধ্যপ্ৰাচ্যৰ সংঘাতৰ পৰা আৰম্ভ কৰি আমেৰিকাৰ নৌসেনাৰ দীঘলীয়া সামৰিক মোতায়েন, ক্ৰুৰ মানসিক চাপ আৰু আমেৰিকা-থাইলেণ্ডৰ সামৰিক সম্পৰ্ক—এই সকলোবোৰ দিশকে একেলগে চৰ্চালৈ আনিছে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ