অসম লাইভ২৪ঃ উত্তৰকাশীৰ সুৰংগত আৱদ্ধ শ্ৰমিকক খাদ্য হিচাপে কি কি দি থকা হৈছে এই বিষয়টোক লৈ বহুতেই চৰ্চা চলাইছে। বিগত ১২ নৱেম্বৰৰ নিশাৰ ভাগৰ পৰাই আৱদ্ধ হৈ আছে শ্ৰমিকসকল। শ্ৰমিকৰ স্বাস্থ্যৰ কথা ভাৱিয়েই নিয়মিতভাৱে পুষ্টিকৰ খাদ্য প্ৰেৰণ কৰি থকা হৈছে। খিচিৰিকে ধৰি পোলাও, মটৰ পনিৰ, ৰুটি ইত্যাদি দৈনিক দি থকা হৈছে ৪০গৰাকী শ্ৰমিকক। মঙলবাৰে নিশাও পাইপেৰে ১৫০টা খাদ্যৰ পেকেট পঠিয়াই দিয়া হৈছে। সংবাদ সংস্থা এএনআইৰ তথ্যমতে মঙলবাৰে নিশা ৬ ইঞ্চিৰ খাদ্য সৰবৰাহকাৰী পাইপেৰে খাদ্যৰ ওপৰিও ফলমূলো পঠিয়াই দিয়া হৈছে। এই সন্দৰ্ভত ৰান্ধনী সঞ্জিৎ ৰানাই কয়, ‘চিকিৎসকৰ তত্ত্বাবধানতেই সমস্ত ৰন্ধাবঢ়া কৰা হৈছে। হজম কৰাত যাতে কাৰোৱে অসুবিধা নহয় তেনে খাদ্যহে দি থকা হৈছে। কম তেল, মচলা দি ভেজ পোলাও আৰু মটৰ পনিৰ ৰন্ধা হৈছে। মাখন দি ৰুটিও বনোৱা হৈছে।’
উদ্ধাৰকাৰী দলৰ সৈতে যুক্ত এজন ৰান্ধনিয়ে এই সন্দৰ্ভত কয়, ‘প্ৰতিদিনেই আমি প্ৰায় ১৫০ পেকেট সুৰংগৰ ভিতৰলৈ পঠিয়াই আছো। প্ৰতিটো পেকেটতেই নিৰ্দিষ্ট পৰিমানৰ পোলাও, পনিৰ আৰু দুখনকৈ ৰুটি পঠিয়াও। এলুমিনিয়াম ফয়েলেৰে খাদ্যসমূহ পেকিং কৰাৰ ওপৰিও ৫ৰ পৰা ১০ কিঃগ্ৰাঃ ফল দৈনিক পঠিয়াও। আপেল, নেমুৰ পৰা আৰম্ভ কৰি প্ৰায় ৫ডজন কল শ্ৰমিকৰ বাবে প্ৰতিদিনেই পঠিয়াই থকা হৈছে। সোমবাৰে অৱশ্যে পাইপেৰেই বটলত ভৰাই খিচিৰি পঠিয়াই দিছো। শ্ৰমিকক যাতে মানসিক অৱসাদে গ্ৰাস নকৰে তাৰবাবে দৈনিক এণ্টি ডিপ্ৰেছেণ্ট ঔষধো দিয়া হৈছে।
এনডিআৰএফৰ তৰফৰ পৰা জনোৱা অনুসৰি, সুৰংগৰ ভিতৰত থকা শ্ৰমিকক বাহিৰলৈ উলিওৱাৰ প্ৰক্ৰিয়া ইমান সহজো নহয়। সকলোধৰণৰ চেষ্টাই কৰি থকা হৈছে। কিন্তু উদ্ধাৰকাৰ্য সম্পন্ন হ’বলৈ কিমান দিন লাগিব সেয়া ধৰিব পৰা হোৱা নাই। সকলো চেষ্টাই চলাই থকা হৈছে। এই সন্দৰ্ভত এনডিআৰএফৰ লেফ্টেনেণ্ট জেনেৰেল ছইদ আটা হাছনাইনে কয়, ‘সুৰংগৰ ভিতৰত পৰ্যাপ্ত পৰিমানৰ অক্সিজেন আৰু খাদ্য আছে। খাদ্য নিয়মিতভাৱেই দি আছো। শ্ৰমিকসকল সুৰক্ষিত হৈয়েই আছে। মানসিকভাৱে ভাঙি নপৰিবলৈকো আমি সকলো যা যোগাৰেই কৰিছো। শ্ৰমিকৰ পৰিয়ালৰ সদস্যসকলক আমি আনিছো। তেওঁলোকক সেই স্থানৰ ওচৰতেই থাকিবলৈ হোটেল ঠিক কৰি দিছো। পৰিয়ালৰ লোকৰ সৈতে যোগাযোগ থাকিলে মানসিকভাৱে তেওঁলোক শক্তিশালী হৈ থাকিব।’
উল্লেখ্য যে বিগত ১২ নৱেম্বৰৰ পৰাই উত্তৰকাশী জিলাৰ ব্ৰহ্মকাল, যমুনাত্ৰী ৰাষ্ট্ৰীয় ঘাইপথৰ ওপৰত ছিল্কিয়াৰা আৰু ডাণ্ডালহাগাঁৱৰ মাজত নিৰ্মাণ কৰি থকা সুৰংগৰ একাংশ অংশ খহি পৰে। সেই স্থানতেই প্ৰায় ৮ মিটাৰ ওখ আৰু দুই কিঃমিঃ দীঘল সুৰংগত আৱদ্ধ হৈ পৰে শ্ৰমিকসকল। তেওঁলোকৰ মাজত আছে অসমৰো দুজনকৈ শ্ৰমিক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
