বৈভৱ সূৰ্যবংশীয়ে সৃষ্টি কৰিছে আই পি এলৰ ইতিহাস। ছানৰাইজাৰ্ছ হায়দৰাবাদৰ বিৰুদ্ধে ৩৬টা বলত পোন্ধৰ বছৰীয়া বৈভৱে শতক কৰিছে। এইটোৱে হৈছে অ’পেনাৰগৰাকীৰ আই পি এলৰ দ্বিতীয়টো শতক। ইয়াৰ পূৰ্বে তেওঁ নিজৰ আৰম্ভণি ছিজনত গুজৰাট টাইটানছৰ বিৰুদ্ধে ৩৫টা বলত শতক কৰিছিল। ১৫ বছৰ বয়সত আই পি এলত দুটা শতক অৰ্জন কৰা প্ৰথমজন বেটছমেন হিচাপে পৰিগণিত হৈছে বৈভৱ।
আই পি এলৰ ইতিহাসত অভিষেক ঘটোৱা আটাইতকৈ কম বয়সীয়া খেলুৱৈ বৈভৱ সূৰ্যবংশী। ২০২৫ চনত ১৪ বছৰ বয়সত অভিষেক ঘটাইছিল আৰু ১৩ বছৰ বয়সত IPL ৰ নিলামত প্ৰৱেশ কৰিছিল। আই পি এলৰ ইতিহাসত সৰ্বাধিক দ্ৰুত ৫০০ ৰানৰ বিশ্ব অভিলেখ (মাত্ৰ ২২৭ বলত) তেওঁৰ হাতত আছে। বৈভৱে গ্লেন মেক্সৱেল (২৬০ বল) আৰু বীৰেন্দ্ৰ ছেহৱাগ (২৮০ বল)ৰ দৰে কিংবদন্তিক অতিক্ৰম কৰিলে। ২০২৬ চনৰ আই পি এলত তেওঁ মাত্ৰ ১৫টা বলত অৰ্ধশতক অৰ্জন কৰি লীগৰ যৌথ তৃতীয় দ্ৰুততম খেলুৱৈ হিচাপে পৰিগণিত হয়। ইয়াৰ উপৰিও আই পি এলৰ অভিষেক মেচত প্ৰথম বলত ছয় কৰা আটাইতকৈ কম বয়সীয়া খেলুৱৈ।
বৈভৱ সূৰ্যবংশী ভাৰতীয় ক্ৰিকেটৰ অন্যতম উদীয়মান তাৰকা। কম বয়সতে ব্যতিক্ৰমী বেটিঙেৰে বিশ্বৰ দৃষ্টি আকৰ্ষণ কৰি। বিহাৰৰ পৰা অহা এই যুৱ বাওঁহাতেৰে খেলা বেটছমেনে ১২ বছৰ বয়সত প্ৰথম শ্ৰেণীৰ অভিষেক (ৰঞ্জী ট্ৰফী) কৰি ইতিহাস ৰচনা কৰি আধুনিক যুগৰ অন্যতম কনিষ্ঠ ভাৰতীয় অভিষেককাৰী হিচাপে পৰিগণিত হয়। বৈভৱৰ কৌশল আৰু ডাঙৰ শ্বট খেলাৰ ক্ষমতাই তেওঁক তেওঁৰ বয়সৰ খেলুৱৈতকৈ বহু আগুৱাই লৈ গৈছিল। আই পি এল ২০২৫ৰ নিলামত ৰাজস্থান ৰয়েলছে তেওঁক অধিগ্ৰহণ কৰি আই পি এলৰ ইতিহাসৰ আটাইতকৈ কম বয়সীয়া খেলুৱৈ হিচাপে পৰিগণিত হোৱাৰ লগে লগে তেওঁৰ প্ৰতিভাক আৰু অধিক স্বীকৃতি লাভ কৰে। ১৯ বছৰ অনুৰ্ধ ক্ৰিকেটত তেওঁৰ আকৰ্ষণীয় প্ৰদৰ্শনেও প্ৰতিশ্ৰুতিৰ পৰিচয় দিছে, যাৰ ফলত তেওঁৰ ভৱিষ্যত উজ্জ্বল হোৱাৰ লগতে ভাৰতীয় জাতীয় দলত স্থান লাভ কৰাৰ এক শক্তিশালী সম্ভাৱনাও আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
