বন্ধ হ’ব নেকি ভাৰতীয় ঐতিহ্য বহন কৰা লণ্ডনৰ ১০০ বছৰীয়া ৰেষ্টুৰেণ্ট বীৰাস্বামী?

লণ্ডনত ভাৰতীয় ঐতিহ্য বহন কৰা ১০০ বছৰীয়া পুৰণি ৰেষ্টুৰেণ্ট বীৰাস্বামীৰ বাজিছে বিপদঘণ্টা। এই ১০০ বছৰীয়া পুৰণি ৰেষ্টুৰেণ্টখন বন্ধ হোৱাৰ উপক্ৰম ঘটিছে। লণ্ডনৰ ভিক্টৰী হাউছ নামৰ অট্টালিকাটোত আছে এই ৰেষ্টুৰেণ্টখন। ভিক্টৰী হাউছৰ মালিক হৈছে ক্ৰাউন ইষ্টেট (Crown Estate) নামৰ ব্ৰিটেইনৰ ৰাজ পৰিয়ালৰ নামত পৰিচালিত সম্পত্তিৰ এক বৃহৎ চৰকাৰী সংস্থা। সম্প্ৰতি ক্ৰাউন ইষ্টেটে বীৰাস্বামী ৰেষ্টুৰেণ্ট থকা অট্টালিকাটোৰ ৰূপান্তৰকৰণৰ উদ্দেশ্যে নতুনকৈ নিৰ্মাণ কৰিব বিচাৰিছে আৰু সেইবাবেই ক্ৰাউন ইষ্টেটে বৰ্তমান ৰেষ্টুৰেণ্টখনৰ ভাড়াৰ চুক্তিৰ পুনৰ নবীকৰণ কৰিবলৈ অস্বীকাৰ কৰিছে। উল্লেখ্য যে বীৰাস্বামী ৰেষ্টুৰেণ্টৰ লিজৰ ম্যাদ ২০২৫ৰ জুনত সমাপ্ত হৈছিল। ৰেষ্টুৰেণ্ট কৰ্তৃপক্ষই আক্ষেপেৰে কয় যে-লিজ যদি নবীকৰণ নকৰে তেনেহ’লে তেওঁলোকে শতবৰ্ষীয় এই ঐতিহাসিক স্থান এৰিবলগীয়া হ’ব। সেয়েহে তেওঁলোকে এই সিদ্ধান্তৰ বিৰুদ্ধে আদালতৰ দ্বাৰস্থ হৈছে।

বীৰাস্বামীৰ ১০০ বছৰৰ ঐতিহ্য

লণ্ডনত বীৰাস্বামী ৰেষ্টুৰেণ্টৰ যাত্ৰা আৰম্ভ হৈছিল ১৯২৬ চনৰ এপ্ৰিলত। বীৰাস্বামী কেৱল এখন ৰেষ্টুৰেণ্টেই নহয়, বৰং ব্ৰিটেইনত ভাৰতীয় খাদ্য সংস্কৃতিৰ ইতিহাসৰ এক গুৰুত্বপূৰ্ণ অংশ হিচাপে গণ্য কৰা হয়। বিগত ১০০ বছৰত ৰেষ্টুৰেণ্টখনলৈ বহু খ্যাতনামা ব্যক্তিয়ে গৈ খাদ্য গ্ৰহণ কৰিছে। তেওঁলোকৰ ভিতৰত আছে ব্ৰিটেইনৰ প্ৰাক্তন প্ৰধানমন্ত্ৰী উইনষ্টন চাৰ্চিল, অভিনেত্ৰী ভিভিয়েন লী, অভিনেতা মাৰ্লন ব্ৰেণ্ডো, লৰেন্স অলিভিয়াৰ, চাৰ্লি চেপলিন। উল্লেখ্য যে বীৰাস্বামী ৰেষ্টুৰেণ্টত ৰাণী এলিজাবেথ দ্বিতীয়ও গৈ ভাৰতীয় খাদ্যৰ জুতি লৈছিল। ৰেষ্টুৰেণ্টখনৰ খাদ্য সম্ভাৰ ভাৰতত জন্মগ্ৰহণ কৰা এডৱাৰ্ড পামাৰে প্ৰস্তুত কৰিছিল। আইতাকৰ পৰা লাভ কৰা হায়দৰাবাদৰ ৰাজপ্ৰাসাদৰ বিশেষ খাদ্যৰ ৰেচিপিৰ আধাৰত তেওঁ এই খাদ্য সম্ভাৰ প্ৰস্তুত কৰি উলিয়াইছিল।

curryৰ সৈতে বীয়েৰ পান কৰাৰ পৰম্পৰা বীৰাস্বামীৰ পৰাই আৰম্ভ হৈছিল

যিকোনো curryৰ সৈতে বীয়েৰ পানৰ কৰাৰ এক পৰম্পৰা আছে ইংলেণ্ড, ডেনমাৰ্ক আদি দেশত। বহু লোকে দাবী কৰে যে এই পৰম্পৰা লণ্ডনৰ বীৰাস্বামী ৰেষ্টুৰেণ্টৰ পৰাই আৰম্ভ হৈছিল। ৰেষ্টুৰেণ্টখনৰ স্বত্বাধিকাৰীৰ দাবী অনুসৰি ডেনমাৰ্কৰ ৰজাই যেতিয়াই লণ্ডন ভ্ৰমণ কৰিছিল, তেতিয়াই বীৰাস্বামীত আহি খাদ্য গ্ৰহণ কৰিছিল। তেওঁ নিজৰ প্ৰিয় বীয়েৰৰ ব্ৰেণ্ডৰ এটা সম্পূৰ্ণ পিপা ৰেষ্টুৰেণ্টত ৰাখি গৈছিল, যাতে curry খাবলৈ আহিলে সদায় সেই বীয়াৰেই তেওঁক পৰিবেশন কৰে ৰেষ্টুৰেণ্ট কৰ্তৃপক্ষই। ২০১৬ত বীৰাস্বামীক মিছেলিন ষ্টাৰ বঁটা প্ৰদান কৰা হৈছিল, যি বিশ্বৰ অন্যতম সন্মানজনক ৰেষ্টুৰেণ্ট বঁটা হিচাপে পৰিচিত। ৰেষ্টুৰেণ্ট উদ্যোগৰ বহু উত্থান-পতনৰ সাক্ষী হৈ থকা এই প্ৰতিষ্ঠানটোৰ অস্তিত্বই এতিয়া এক দীঘলীয়া আইনী সংগ্ৰামৰ সন্মুখীন হৈছে।

২৯ জুনৰ পৰা আদালতত ৫ দিনীয়া শুনানি

বীৰাস্বামীৰ মূল কোম্পানী MW Eat-এ ২৯ জুনৰ পৰা আৰম্ভ হ’বলগীয়া ৫ দিনীয়া শুনানিত চেণ্ট্ৰেল লণ্ডন কাউণ্টি কোৰ্টত নিজৰ পক্ষ উপস্থাপন কৰিব। ক্ৰাউন এষ্টেটৰ মতে, তেওঁলোকে ভিক্টৰী হাউছ নামৰ অট্টালিকাটোৰ ওপৰৰ মহলাত থকা কাৰ্যালয়সমূহৰ নবীকৰণ কৰিব বিচাৰে। ২০২৩ত হোৱা বানৰ ফলত বিদ্যুৎ ব্যৱস্থা ক্ষতিগ্ৰস্ত হোৱাৰ পিছৰে পৰা এই কাৰ্যালয়সমূহ খালী হৈ আছে। পৰিকল্পনা অনুসৰি ৰেষ্টুৰেণ্ট আৰু কাৰ্যালয়ৰ প্ৰৱেশদ্বাৰৰ মাজৰ দেৱাল ভাঙি এটা ডাঙৰ ৰিচেপচন এলেকা নিৰ্মাণ কৰা হ’ব।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ