বৰ্তমানেও কোনো শুংসুত্ৰ নাই বিশিষ্ট সংগীত শিল্পী ৰমেন বৰুৱাৰ, শেষ লোকেশ্যন ব্ৰহ্মপুত্ৰ পাৰ
২৪ ঘণ্টা উকলিল, পাছে বৰ্তমানেও কতো কোনো শুংসুত্ৰ নাই বিশিষ্ট সংগীত শিল্পীগৰাকীৰ। কালি পুৱা ১০ বজাৰ পৰা আজি পুৱা ১০ বজালৈ অনুসন্ধানৰ নামত উদ্ধাৰ হৈছে কেৱল এক চিচি টিভি ফুটেজ।
লগত থকা মোবাইল ফোনটোও অফ হৈ আছে বিশিষ্ট সংগীত শিল্পী ৰমেন বৰুৱাৰ। ঘৰৰ পৰা কালি ২২ জুলাই তাৰিখে খোজ কাঢ়িবলৈ বুলি ওলাই গৈ আজি ২৩ জুলাই পৰ্যন্ত উভতি অহা নাই। নাই মানে কতো কোনো খা-খবৰেই নাই শিল্পী গৰাকীৰ। কালিতে লতাশিল থানাত এজাহাৰ দাখিল কৰিছিল পৰিয়ালৰ লোকে।
আৰক্ষীয়েও বহু সন্ধান চলাই আছে শিল্পী গৰাকীৰ। লতাশিলৰ ঐতিহ্যমণ্ডিত কাঠৰ সেই পুৰণি স্মৃতি বজাই ৰখা ঘৰটোৰ পৰাই ওলাই আহিছিল পুৱা খোজ কঢ়াৰ উদ্দেশ্যে। হঠাতে মানুহজন কলৈ গ’ল, কি হ’ল!
কালি শিল্পীগৰাকী গুৱাহাটী উচ্চ ন্যায়ালয়ৰ কাষেৰে যোৱা এটা পথত প্ৰত্যক্ষ কৰিছিল। শিল্পীগৰাকী সেই বাটেৰে যোৱাৰ দৃশ্য চি চি টিভিতো ধৰা পৰিছে। ইয়াৰ পাছতে প্ৰায় ১মান বজাত উজান বজাৰৰ গণেশ মন্দিৰৰ সমীপত এগৰাকী মহিলাই দেখা পাইছিল শিল্পীগৰাকীক। সেই সময়ত তেওঁ নিজে নিজৰ সৈতে কিছু কথা পতাত ব্যস্ত আছিল বুলি মহিলাগৰাকীয়ে সদৰি কৰিছে।
আৰক্ষীয়ে ৰমেন বৰুৱাৰ শেষ লোকেশ্যন ট্ৰেক কৰি দেখিছে যে, উজান বজাৰৰ গণেশ মন্দিৰৰ পাছফালে ব্ৰহ্মপুত্ৰৰ পাৰতে তেওঁৰ শেষ অৱস্থিতি। ইতিমধ্যে নদী আৰক্ষীয়ে ব্ৰহ্মপুত্ৰত অভিযান আৰম্ভ কৰিছে।
উক্ত বিষয়টোক লৈ মুখ্যমন্ত্ৰী ড০ হিমন্ত বিশ্ব শৰ্মাইও যথেষ্ট উদ্বিগ্নতা প্ৰকাশ কৰিছে। গুৱাহাটীৰ আৰক্ষী আয়ুক্ত দিগন্ত বৰাক কোনো ক্ৰুটি নথকাকৈ অভিযান চলাবলৈ সোমবাৰে নিশাই নিৰ্দেশ দিছে মুখ্যমন্ত্ৰীগৰাকীয়ে।
আনহাতে শিল্পী জুবিন গাৰ্গেও ওৰে নিশা উজান বজাৰৰ ভিন্ন স্থানত ব্যক্তিগতভাৱে বিশিষ্ট শিল্পীগৰাকীৰ সন্ধানত অভিযান চলায়। ৰমেন বৰুৱাৰ কন্যা বৰ্ণিকা বৰুৱা, ভাতৃ দ্বীপেন বৰুৱা তথা পৰিয়ালৰ অন্য সকল এতিয়া গভীৰ চিন্তাত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
