তামিলনাডুৰ ৰাজনীতিত অভিনেতাৰ পৰা ৰাজনীতিকলৈ থালাপতি বিজয়ৰ উত্থানক লৈ দেশজুৰি চৰ্চা চলিছে৷ তাৰমাজত নতুনকৈ বিতৰ্ক আৰু কৌতূহলৰ জন্ম দিছে তেওঁৰ ২০২৪ চনত মুক্তিপ্ৰাপ্ত ছবি ‘GOAT’ ৰ এক দৃশ্যই৷ সেই দৃশ্যত দেখা গৈছে বিজয়ে ব্যৱহাৰ কৰা এখন বাহনৰ নম্বৰপ্লেটত লিখা আছে TN 07 CM 2026’৷ আৰু এই নম্বৰপ্লেটক লৈ ছচিয়েল মিডিয়াত তুমুল জল্পনা চলিছ৷ বহুতে কৈছে বিজয়ে আগতেই নিজৰ ৰাজনৈতিক ভৱিষ্যতৰ ইংগিত দিছিল নেকি?
সম্প্ৰতি তামিলনাডুত বিজয়ৰ দল টিভিকেৰ নিৰ্বাচনী অভিষেক ঘটিছে৷ ৰাজনৈতিক ময়দানত তেওঁৰ প্ৰৱেশ আৰু ভোটত উল্লেখযোগ্য পাৰফৰমেন্সে বহুতকে চমক দিছে৷ এই প্ৰেক্ষাপটত ‘GOAT’ ছবিৰ সেই ক্লিপ আকৌ ভাইৰেল হোৱাত নতুনকৈ আলোচনাৰ কেন্দ্ৰবিন্দু হৈ উঠিছে তেওঁ৷
ভাইৰেল হোৱা ভিডিঅ’ ক্লিপত দেখা গৈছে এক একছন দৃশ্যত বিজয়ৰ বাহনৰ নম্বৰপ্লেটত স্পষ্টভাৱে লিখা আছে ‘TN 07 CM 2026’৷ বহুতেই ধাৰণা কৰিছে, ইয়াত থকা ‘CM’ শব্দটো ‘Chief Minister’-ৰ ইংগিত বহন কৰিছে আৰু ২০২৬ চনক লক্ষ্য কৰিয়েই এই প্ৰতীকী বাৰ্তা ৰখা হৈছিল৷ ফলত প্ৰশ্ন উঠিছে এই সংযোগ কাকতালীয় নে পৰিকল্পিত ৰাজনৈতিক বাৰ্তা৷
চিনেমা বিশেষজ্ঞৰ একাংশই কৈছে এই ধৰণৰ নম্বৰপ্লেট বহু সময়ত নিৰ্মাতাসকলৰ সৃজনশীলতাৰ খাতিৰত ব্যৱহাৰ কৰা হয়৷ গল্পৰ প্ৰয়োজনত বা দৰ্শকৰ মনোযোগ আকৰ্ষণৰ বাবে এনে প্ৰতীকী বা ব্যতিক্ৰমী নম্বৰপ্লেট ব্যৱহাৰ নতুন ঘটনা নহয়৷ তেওঁলোকৰ মতে এই এই সংযোগ চিনেমাৰহে দাবী, ইয়াৰ সৈতে বাস্তৱ ৰাজনীতিৰ সংযোগ নাই৷
ৰাজনৈতিক বিশ্লেষকসকলে অৱশ্যে এই বিষয়টো সম্পূৰ্ণৰূপে উৰুৱাই দিয়া নাই৷ তেওঁলোকৰ মতে দক্ষিণ ভাৰতৰ ৰাজনীতিত চিনেমা আৰু ৰাজনীতিৰ সম্পৰ্ক দীৰ্ঘদিনীয়া৷ অতীতত বহু অভিনেতাই চিনেমাৰ জনপ্ৰিয়তাক পুঁজি হিচাপে লৈ ৰাজনৈতিক সাফল্য অৰ্জন কৰিছে৷ সেই ধাৰাবাহিকতাত বিজয়ৰ এই উত্থান আৰু তাৰ সৈতে চিনেমাৰ প্ৰতীকী উপাদানৰ মিল বিচাৰি পোৱাটো অস্বাভাৱিকো নহয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
