বিৰোধী মহাজোঁটক উটুৱাই দিলে NDA মিত্ৰজোঁটৰ ছুনামীয়ে৷ তিনিগগৈৰ দুই গগৈয়েই পৰাস্ত হ’ল এই নিৰ্বাচনত৷ তিনিটাকৈ নিৰ্বাচনত প্ৰতিদ্বন্দ্বিতা কৰিও জনতাৰ মন জয় কৰিব নোৱাৰিলে লুৰীণজ্যোতি গগৈয়ে৷ আনহাতে লোকসভা নিৰ্বাচনত ডেৰলাখতকৈ অধিক ভোটত জয়ী হৈয়ো বিধানসভা নিৰ্বাচনত শোচনীয় পৰাজয়ৰ মুখ দেখিলে গৌৰৱ গগৈয়ে৷ লুৰীণজ্যোতি গগৈ আৰু গৌৰৱ গগৈৰ এই পৰাজয়ক লৈ এতিয়া চৌদিশে চলিছে চৰ্চা৷ কিয় ইমান ভোটৰ ব্যৱধানত পৰাস্ত হ’ল বিৰোধী নেতা গৌৰৱ গগৈ? যোৰহাটবাসীৰ আস্থা কিয় জয় কৰিব নোৱাৰিলে গৌৰৱে সেই চৰ্চাও চলিছে৷ তাৰমাজতে আকৌ ৰাজ্যত আন এক চৰ্চাও চলিছে৷ জ্ঞানশ্ৰীতকৈয়ো পিছপৰিছে গৌৰৱ গগৈ৷
কলেজ শিক্ষকৰ চাকৰি বাদ দি ৰাজনীতিলৈ আহিছে জ্ঞানশ্ৰী বৰা৷ নিৰ্বাচনৰ মাত্ৰ ৩৫ দিন আগতহে প্ৰত্যক্ষভাৱে প্ৰচাৰ চলাবলৈ মৰিয়নী সমষ্টিত ভৰি থৈছিল জ্ঞানশ্ৰীয়ে৷ সময় খুবেই তাকৰ, বিপৰীতে বহুল চৰ্চিত জনপ্ৰিয় বিধায়ক ৰূপজ্যোতি কূৰ্মী৷ বছৰ বছৰ ধৰি ৰাইজৰ প্ৰতিনিধি হৈ অহা ৰূপজ্যোতিৰ বিৰুদ্ধে যুঁজ দিবলৈ সাহস কৰাটোৱেই এক প্ৰত্যাহ্বান৷ সেই প্ৰত্যহ্বান নেওচি জ্ঞানশ্ৰী যুঁজত নামিল৷ ইফালে ৰাইজৰ দলৰ সৈতে কংগ্ৰেছৰ মিত্ৰতা হ’বনে নহয় সেই বিষয়টোও নিশ্চিত হোৱা নাছিল৷ নিৰ্বাচনৰ মাত্ৰ ১২ দিন আগতহে সেই কথা নিশ্চিত হয়৷ তাৰপিছতো জ্ঞানশ্ৰীয়ে অতি শক্তিশালী প্ৰাৰ্থী ৰূপজ্যোতিৰ বিৰুদ্ধে যুঁজ দি ভাল অংকৰ ভোটেই অৰ্জন কৰিছে৷ মৰিয়নীত ৰূপজ্যোতি কূৰ্মীৰ হাতত প্ৰায় ২৬ হাজাতকৈ অলপ বেছি ভোটত তেওঁ পৰাস্ত হৈছে৷ ৫২৭৯২টা ভোট মৰিয়নী সমষ্টিত লাভ কৰিছে জ্ঞানশ্ৰী বৰাই৷ মাত্ৰ ৩৫ দিনীয়া প্ৰচাৰত ইমান ভোট লাভ কৰাটো একপ্ৰকাৰৰ ৰেকৰ্ডতকৈ কম নহয়৷
কিন্তু লজ্জাৰ বিষয় এয়াই যে গৌৰৱে নিজৰ লোকসভা সমষ্টিৰ অন্তৰ্গত যোৰহাট বিধানসভা সমষ্টিত প্ৰতিদ্বন্দ্বিতা কৰিও জ্ঞানশ্ৰীতকৈ লজ্জাজনক হাৰ স্বীকাৰ কৰিবলগীয়া হৈছে৷ আনকি নিজৰ বুথতো তেওঁ পৰাস্ত হৈছে৷ আটাইতকৈ শক্তিশালী প্ৰাৰ্থীৰূপে নিজৰ পৰিচয় দিয়া গৌৰৱে ৰাখিব নোৱাৰিলে নিজৰ সন্মান৷ গৌৰৱ গগৈয়ে যোৰহাট সমষ্টিত লাভ কৰিছে মাত্ৰ ৪৬,২৫৭ টা ভোট লাভ কৰিছে৷ হিতেন্দ্ৰনাথ গোস্বামীয়ে তেওঁক প্ৰায় ২৩ হাজাৰতকৈ অধিক ভোটত হৰুৱাইছে৷ অৰ্থাৎ ক’ব লাগিব প্ৰথমবাৰৰ বাবে ৰাজনীতিৰ পথাৰত নামি গৌৰৱক হৰুৱাইছে জ্ঞানশ্ৰী বৰাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
