আমেৰিকাসহ পশ্চিম ইউৰোপৰ বিৰাট নিষেধাজ্ঞাৰ বোজা তেওঁ কান্ধত তুলি চলি আছে৷ প্ৰায় তিনি বছৰ ধৰি যুদ্ধও চলি আছে৷ এই যুদ্ধৰ পৰিণাম কি হ’ব কোনেও নাজানে৷ কেৱল অপেক্ষা, এদিন যুদ্ধ শেষ হ’ব, সু সময় উভতি আহিব৷ যুদ্ধৰ খবৰৰ বাবেই প্ৰতিদিনে শিৰোনামো দখল কৰি আছে বিশ্বৰ ছুপাৰ পাৱাৰ দেশ ৰাছিয়াৰ ৰাষ্ট্ৰপ্ৰধান৷
তেওঁ ৰুছ প্ৰেছিডেণ্ট ভ্লাডিমিৰ পুটিন৷ ইউক্ৰেইন যুদ্ধ শেষ কৰিবলৈ সদ্য শপত লোৱা আমেৰিকাৰ প্ৰেছিডেণ্ট ডনাল্ড ট্ৰাম্পৰ সৈতে আলোচনাত বহাৰো ইংগিত দিছে পুটিনে৷ সেই আপাহতে মস্কোৰ ক্ৰেমলিন প্ৰাসাদৰ নিবাসী ৭২ বছৰীয়া পুটিনৰ সম্পত্তিৰ পৰিমাণক লৈ আকৌ এবাৰ চৰ্চা চলিছে৷
২০১৭ চনত আমেৰিকাৰ পাৰ্লিয়ামেণ্ট কংগ্ৰেছৰ উচ্চ কক্ষ ছেনেটৰ বিচাৰবিভাগীয় কমিটিৰ ওচৰত সাক্ষ্য দিছিল বিল ব্ৰাউডাৰে৷ তাতেই পুটিনৰ সম্পত্তি সংক্ৰান্তিয় চাঞ্চল্যকৰ তথ্য প্ৰকাশ কৰিছিল তেওঁ৷ তেওঁৰ দাবী, বিশ্বৰ সকলোতকৈ ধনী ব্যক্তিতকৈ বেছি সম্পত্তি আছে ৰুছ প্ৰেছিডেণ্টৰ৷ এইক্ষেত্ৰত ই কমাৰ্ছ সংস্থা আমাজন আৰু ফেছবুকৰ মালিক মাৰ্ক জুকাৰবাৰ্গ আৰু জেফ বেজোছতকৈয়ো বেছি সম্পত্তি আছে পুটিনৰ৷
বিলৰ অনুমান, প্ৰায় ২০ হাজাৰ কোটি টকাৰ বেছি সম্পত্তি আছে ৰুছ প্ৰেছিডেণ্টৰ৷ উল্লেখ্য যে ১৯৯০ ৰ দশকত ৰাছিয়াৰ অন্যতম ডাঙৰ বিনিয়োগৰাকী আছিল ব্ৰাউডাৰ৷ ফৰচুনৰ প্ৰতিবেদন অনুসৰি পুটিনৰ চৰকাৰী সম্পত্তিৰ মাজত আছে ৮০০ বৰ্গফুটৰ এটা এপাৰ্টমেণ্ট৷ ইয়াৰোপৰি আছে তিনিখনকৈ বিলাসী বাহন আৰু এখন ট্ৰেলাৰ৷
ইয়াৰোপৰি কৃষ্ণসাগৰৰ তীৰত এটি বাংলো আছে ৰুছ প্ৰেছিডেণ্টৰ৷ পশ্চিমী সংবাদমাধ্যমৰ ওচৰত এই বাংলোটি পুটিন কান্ট্ৰি কটেজ নামেৰে পৰিচিত৷ বিলাসী বাংলোৰ নিৰ্মাণত খৰচ হৈছিল প্ৰায় ১০০ কোটি ডলাৰ৷ কাগজে কলমে অৱশ্যে বাংলোটিৰ মালিকানা আছে আৰ্কাডি ৰোটেনবাৰ্গৰ ওচৰত৷
প্ৰতিবেদনত আকৌ কোৱা হৈছে যে কৃষ্ণসাগৰৰ তীৰৰ বিলাসবহুল বাংলোটি প্ৰাচীন গ্ৰীক দেৱতাসকলৰ মূৰ্তিৰে সজোৱা হৈছে প্ৰেটিডেণ্ট পুটিনৰ বাংলো৷ ইয়াৰোপৰি আছে মাৰ্বলেৰে তৈয়াৰী ছুইমিং পুল আৰু এটি এম্ফিথিয়েটাৰ৷ ৰুছ প্ৰেছিডেণ্টৰ বাকী সম্পত্তিৰ মাজত আছে এটি আইছ হকি ৰিংক, কেছিনো আৰু নাইটক্লাব৷
সূত্ৰৰ খবৰ অনুসৰি কৃষ্ণসাগৰৰ তীৰৰ বাংলোক সমগ্ৰ বছৰ চাফচিকুণ কৰি ৰাখিবলৈ মোতায়েন কৰা আছে ৪০জন কৰ্মী৷ তেওঁলোকৰ বাবে বছৰি ২০ লাখ ডলাৰ খৰচ কৰে প্ৰেচিডেণ্ট পুটিনে৷ প্ৰাসাদৰ ভিতৰৰ অংশটোও অত্যন্ত সুন্দৰ৷ তাত ডাইনিং ৰুমত থকা আচবাবৰ দাম পাঁচ লাখ ডলাৰ৷ ৰুছ প্ৰেছিডেণ্টৰ স্নানৰ ঘৰত আছে ৮৫০ ডলাৰৰ ইটাসিয়ান ব্ৰাছ যুক্ত টয়লেট৷
পুটিনৰ সেইখিনি হৈছে ঘোষিত সম্পত্তি৷ তেওঁৰ অঘোষিত সম্পত্তিও অনেক আছে৷ সেই তালিকাত আছে ১৯টা ঘৰ, ৭০০ বাহন, ৫৮ টা বিমান আৰু এখন হেলিকপ্টাৰ৷ ইয়াৰোপৰি দ্যা ফ্লাইং ক্ৰেমলিন নামৰ এখন ব্যক্তিগত উৰাজাহাজো আছে তেওঁৰ৷ সেই বিমানখন নিৰ্মাণত খৰচ হৈছে প্ৰায় ৭১.৬ কোটি ডলাৰ৷
কোনো কোনোৱে পুটিনক ছেহেৰাজাদ নামৰ এটা প্ৰমোদতৰীৰ মালিক বুলিও দাবী কৰে৷ সেয়া তৈয়াৰ কৰিবলৈ বিপুল খৰচ হোৱা বুলিও জনাইছে৷ কাগজে কলমে অৱশ্যে প্ৰমোদতৰীটোৰ মালিক হিচাপে ক’তো উল্লেখ নাই ৰুছ প্ৰেছিডেণ্টৰ নাম৷ কিন্তু একাধিক বাৰ তেওঁক সেই প্ৰমোদতৰীত দেখা গৈছে৷
ৰুছ প্ৰেছিডেণ্টৰ আছে ঘড়ীৰো বিশেষ চখ৷ তেওঁৰ সংগ্ৰহত আছে পাটেক ফিলিপ পাৰপেচুৱেল কেলেণ্ডাৰ আৰু এ লেঞ্জ এণ্ড ছোহনে টুৰবোগ্ৰাফৰ ঘড়ী৷ ইয়াৰ বাবেই তেওঁ বাৰ্ষিক কেইবাকোটি টকা ব্যয় কৰে৷ পুটিন কেনেকৈ ইমান বিপুল সম্পত্তিৰ অধিকাৰী হ’ল সেই বিষয়টোক লৈয়ো আছে একাধিক ৰহস্য৷ আমেৰিকাৰ সংবাদ সংস্থাৰ দাবী যে, ৰুছ অভিজাতসকলৰ নগদ অৰ্থ আৰু শ্বেয়াৰ আত্মসাৎ কৰি ধনী হৈছে ৰুছ প্ৰেছিডেণ্ট৷ টকা নিদিলে গ্ৰেপ্তাৰ কৰাৰ ভয় দেখুৱাই সম্পত্তি হস্তগত কৰিছে ৰুছ প্ৰেছিডেণ্টে৷
ফোৰ্বছৰ প্ৰতিবেদন অনুসৰি পুটিনে বহু স্থানত নিজৰ গোপন সম্পত্তি ৰাখিছে৷ ২০১৬ চনত পানামা পেপাৰ্ছৰ আৰ্থিক কেলেংকাৰীতো নাম সাঙোৰ খাইছিল পুটিনৰ৷ তেওঁৰ বিৰুদ্ধে ২০০ কোটি ডলাৰৰ গোপন চুক্তিৰ অভিযোগো উঠিছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
