বাৰিষা বতৰত গৰমৰ পৰা সকাহ পোৱাৰ বিপৰীতে ইয়াৰ লগত কেইবাটাও স্বাস্থ্যজনিত সমস্যাও আহি পৰে। ইয়াৰে এটা হ’ল ভেঁকুৰৰ সংক্ৰমণ। বাৰিষাৰ দিনত বতাহত আৰ্দ্ৰতা বেছি হয় আৰু ঘাম বেছি সময় শৰীৰত থাকে। এনে অৱস্থাত ভেঁকুৰবোৰ দ্ৰুতগতিত বৃদ্ধি পায় আৰু ছালত সংক্ৰমিত হ’ব পাৰে। প্ৰথম অৱস্থাত কেৱল মৃদু খজুৱতি বা ৰঙা পৰাৰ দৰে অনুভৱ হ’ব পাৰে, কিন্তু সময়মতে চিকিৎসা নকৰিলে এই সমস্যা অধিক গুৰুতৰ হৈ উঠিব পাৰে। সেয়েহে বাৰিষাৰ সময়ত ছালৰ যত্নক অৱহেলা কৰাটো ব্যয়বহুল বুলি প্ৰমাণিত হ’ব পাৰে। এই ক্ষেত্ৰত নিমপাতেই হৈ পৰে আটাইতকৈ ডাঙৰ মহৌষধ…
নিম গছ ঔষধি গছ। ইয়াৰ বৈজ্ঞানিক নাম Azadirachta indica। নিমৰ পাত, ছাল, ফল, বীজ আৰু ফুল—প্ৰায় প্ৰতিটো অংশেই ঔষধি গুণেৰে ভৰপূৰ। বিশেষকৈ নিমপাত বহু যুগ ধৰি আয়ুৰ্বেদিক চিকিৎসাত ব্যৱহাৰ হৈ আহিছে।
নিমপাতত প্ৰাকৃতিকভাৱে এণ্টিবেক্টেৰিয়েল, এণ্টিফাংগেল আৰু এণ্টিঅক্সিডেণ্ট গুণ থাকে। এই গুণসমূহে শৰীৰক বিভিন্ন সংক্ৰমণৰ পৰা সুৰক্ষা দিয়াত সহায় কৰে। ছালত হোৱা ফোঁহা, খজুৱতি, এলাৰ্জী আদি সমস্যাত নিমপাতৰ ব্যৱহাৰ উপকাৰী হয়।
নিমপাতে ৰক্ত পৰিষ্কাৰ কৰাত সহায় কৰে। নিয়মিত আৰু পৰিমিতভাৱে নিমপাত খালে শৰীৰৰ ৰোগ প্ৰতিৰোধ ক্ষমতা শক্তিশালী হোৱাত সহায় কৰিব পাৰে। ইয়াৰ উপৰিও নিমপাত হজম শক্তি উন্নত কৰা আৰু শৰীৰৰ বিষাক্ত পদাৰ্থ বাহিৰ কৰাত সহায়ক হয়।
দাঁতৰ যত্নতো নিমপাত আৰু নিমৰ ডাল বহু দিন ধৰি ব্যৱহাৰ কৰা হয়। নিমৰ ডালে দাঁত পৰিষ্কাৰ কৰাৰ লগতে সংক্ৰমণ কমোৱাত সহায় কৰে আৰু মুখৰ দুৰ্গন্ধ হ্ৰাস কৰাতো উপকাৰী।
কৃষি ক্ষেত্ৰতো নিমপাতৰ বিশেষ গুৰুত্ব আছে। নিমপাত আৰু নিমৰ বীজৰ পৰা তৈয়াৰ কৰা জৈৱ কীটনাশকে শস্যক বিভিন্ন ক্ষতিকাৰক পোক-পৰুৱাৰ পৰা ৰক্ষা কৰে। ইয়াৰ ফলত পৰিৱেশৰ ওপৰত ক্ষতিকাৰক প্ৰভাৱো তুলনামূলকভাৱে কম হয়।
মনত ৰাখক
যদিও নিমপাতৰ বহু উপকাৰিতা আছে, তথাপিও অত্যাধিক পৰিমাণে সেৱন কৰা উচিত নহয়। গৰ্ভৱতী মহিলা, সৰু শিশু বা বিশেষ স্বাস্থ্যজনিত সমস্যা থকা ব্যক্তিয়ে নিমপাত ঔষধ হিচাপে ব্যৱহাৰ কৰাৰ আগতে চিকিৎসকৰ পৰামৰ্শ লোৱা উচিত।
নিমপাত প্ৰকৃতিৰ এক অমূল্য উপহাৰ। স্বাস্থ্য সুৰক্ষা, ছাল আৰু দাঁতৰ যত্ন, লগতে কৃষি ক্ষেত্ৰতো ইয়াৰ গুৰুত্ব অপৰিসীম। সঠিক জ্ঞান আৰু পৰিমিত ব্যৱহাৰৰ জৰিয়তে নিমপাতৰ উপকাৰিতা লাভ কৰিব পাৰি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
