ভাৰতত বহুলভাৱে জনপ্ৰিয় ৰিয়েলিটী শ্ব’ ছলমান খানৰ Bigg Bossৰ পৰৱৰ্তী সংস্কৰণ কেতিয়াৰ পৰা আৰম্ভ হ’ব ইয়াক লৈ অনুৰাগীৰ মাজত ব্যাপকভাৱে চৰ্চা অব্যাহত আছে। কিয়নো ২০২৫ত Bigg Boss 19 আৰম্ভ হৈছিল আগষ্ট মাহত। গতিকে এইবাৰো আগষ্টতেই বিগ বছ আৰম্ভ হ’ব নে ইয়াতকৈ পলম হ’ব তাকে লৈ অব্যাহত আছে চৰ্চা। লগতে প্ৰতিবাৰৰ দৰে এইবাৰো ছলমান খানেই অনুষ্ঠানটো host কৰিবনে নাই তাক লৈও অনুৰাগীৰ মাজত চৰ্চা অব্যাহত আছে।
কেতিয়াৰ পৰা আৰম্ভ হ’ব Bigg Boss 20?
সূত্ৰ অনুসৰি বিগত ছিজনতকৈ এমাহ পলমকৈ আৰম্ভ হ’ব বিগ বছৰ শ্বুটিং। কিয়নো ছলমান খানে এই পৰ্যন্ত বিগ বছ কৰ্তৃপক্ষক দিব পৰা নাই তাৰিখ। সকলো ঠিকে ঠাকে থাকিলে ২১ ছেপ্টেম্বৰৰ পৰা আগন্তুক ছিজনৰ বাবে বিগ বছৰ শ্বুটিং আৰম্ভ হ’ব। সম্প্ৰতি ৰিয়েলিটী শ্বোটোত অংশগ্ৰহণ কৰিবলগীয়া প্ৰতিযোগীসকলৰ অডিশ্যনো লৈ থকা হৈছে সূত্ৰত প্ৰকাশ। আনহাতে বিভিন্ন ক্ষেত্ৰৰ কেইগৰাকীও জনপ্ৰিয় তাৰকাৰ সৈতে ৰিয়েলিটী শ্বোটোত অংশগ্ৰহণৰ বাবে যোগাযোগ চলি আছে বুলিও সূত্ৰটোত প্ৰকাশ।
কি হ’ব এইবাৰ Bigg Bossৰ থীম?
বিগ বছৰ পৰৱৰ্তী সংস্কৰণ পূৰ্বৰ সংস্কৰণকেইটাতকৈ কিছু পৃথক হোৱাৰ সম্ভাৱনা আছে। অন্য ৰিয়েলিটী শ্বোৰ প্ৰতিযোগীকো এইবাৰ বিগ বছত অন্তৰ্ভুক্তি কৰোৱাৰ যো-জা চলাই আছে বিগ বছৰ প্ৰযোজকে। ইয়াৰ উপৰিও বিগত ছিজনসমূহত অংশগ্ৰহণ কৰা প্ৰতিযোগীকো এইবাৰ পুনৰাই বিগ বছত অন্তৰ্ভুক্তিৰ সম্ভাৱনা আছে। অৱশ্যে এই সন্দৰ্ভত এই পৰ্যন্ত কোনো আনুষ্ঠানিক ঘোষণা হোৱা নাই। সূত্ৰ অনুসৰি তিনিটাকৈ ৰিয়েলিটী শ্বোত বিজয়ী মুকুট পৰিধান কৰা কুশল তম্বৰ ওৰফে গুল্লুই এই ছিজনৰ বিগ বছৰ প্ৰথমজন প্ৰতিযোগী হিচাপে নিজৰ নাম অন্তৰ্ভুক্তি কৰিছে। গুল্লুৱে rodies, splitsvilla আৰু ‘মা হ্যে না’ নামৰ ৰিয়েলিটী শ্বোকেইটাত বিজয়ী হৈছে।
এই বাতৰিটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
