সদ্য শেষ হৈছে উত্তৰপ্ৰদেশৰ প্ৰয়াগৰাজৰ মহাকুম্ভ মেলা৷ দেশৰ নানান প্ৰান্তৰ পৰা ৫০ কোটিৰো বেছি মানুহে এই মেলাত গৈ ত্ৰিবেণী সংগমত ডুব দিছে৷ প্ৰয়াগৰাজৰ ত্ৰিবেণী সংগমত ডুব দি পুণ্য অৰ্জন কৰিছে৷ প্ৰত্যেক ১২ বছৰৰ মূৰে মূৰে প্ৰয়াগৰাজত অনুষ্ঠিত হয় কুম্ভমেলা৷ কিন্তু তাৰমাজতো দুবাৰকৈ কুম্ভমেলা আয়োজিত হয়৷ পৰবৰ্তী কুম্ভমেলা অনুষ্ঠিত হ’ব ২০২৭ চনত৷ এইবাৰ আয়োজক চহৰ মহাৰাষ্ট্ৰৰ নাছিক৷
কিয় মাত্ৰ দুবছৰৰ ভিতৰতেই পৰবৰ্তী কুম্ভমেলাৰ আয়োজন কৰা হৈছে? সেই বিষয়েও বহুতেই জানিবলৈ আগ্ৰহী হৈ আছে৷ দেশৰ মুঠ ৪খন চহৰত কুম্ভমেলা হয়৷ প্ৰয়াগৰাজ, হৰিদ্বাৰ, নাছিক আৰু উজ্জয়িনী৷ প্ৰতিখন চহৰত কুম্ভমেলা আয়োজনৰ পৃথক হিচাপ আছে৷ সেই হিচাপ অনুসৰি নাচিকত পৰবৰ্তী কুম্ভৰ বছৰ ২০২৭ চন৷ নাছিক আৰু উজ্জয়িনীত কুম্ভমেলাৰ আয়োজন হ’ব ১২ বছৰৰ পাছত৷ এই মেলাক পূৰ্ণ কুম্ভমেলাই কোৱা হয়৷ ইয়াৰ গোদাবৰী নদীৰ তীৰত নাছিকত পূৰ্ণ কুম্ভমেলা হৈছিল ২০১৫চনত৷ সেই হিচাপ অনুসৰি ১২ বছৰ সম্পূৰ্ণ হ’ব ২০২৭ত৷
২০২৭ চনৰ ১৭ জুলাইৰ পৰা ১৭ আগষ্ট পৰ্যন্ত চলিব কুম্ভমেলা৷ শিপ্ৰা নদীৰ ধাৰত উজ্জয়িনীত শেষবাৰ কুম্ভমেলা হৈছিল ২০১৬ চনত৷ ১২ বছৰৰ হিচাপ অনুসৰি তাতেই আকৌ পূৰ্ণকুম্ভ আয়োজিত হ’ব ২০২৮ চনত৷ অৰ্থাৎ দুবছৰৰ ভিতৰতেই মহাৰাষ্ট্ৰ আৰু মধ্যপ্ৰদেশত দুটাকৈ কুম্ভমেলা আয়োজিত হ’ব৷
প্ৰয়াগৰাজ আৰু হৰিদ্বাৰৰ ক্ষেত্ৰত কুম্ভমেলাৰ হিচাপ কিছু পৃথক৷ এই দুই চহৰত ১২ বছৰৰ অন্তৰে অন্তৰে পূৰ্ণকুম্ভৰ ওপৰিও ৬ বছৰৰ অন্তৰে অন্তে এটা অৰ্ধ কুম্ভমেলাও আয়োজন কৰা হয়৷ প্ৰয়াগৰাজৰ পৰবৰ্তী কুম্ভমেলাটো আৰু ৬ বছৰৰ পাছত অৰ্থাৎ ২০৩১ চনত অনুষ্ঠিত হ’ব৷
হৰিদ্বাৰত শেষবাৰ কুম্ভমেলা হৈছিল ২০২১ চনত৷ সেয়া আছিল পূৰ্ণকুম্ভ৷ নিয়ম অনুসৰি হৰিদ্বাৰত ২০২৭ চনত এটা অৰ্ধ কুম্ভমেলাৰ আয়োজন হোৱাৰ কথা৷ ২০২৭ চনত একেবছৰতেই সেয়ে দুইস্থানত কুম্ভমেলাৰ আয়োজন হ’ব৷ অৱশ্যে এই দুই কুম্ভ মেলাৰ আয়োজনৰ সময় ভিন্ন৷ হৰিদ্বাৰত এপ্ৰিল মাহত কুম্ভমেলাৰ আয়োজন কৰা হয়৷ নাছিকৰ কুম্ভমেলাৰ সময় জুলাই আৰু আগষ্ট৷ উজ্জয়িনীতো কুম্ভমেলা হয় এপ্ৰিল মাহত৷
পূৰ্ণ আৰু অৰ্ধকুম্ভৰ বাহিৰেও এক কুম্ভমেলা আছে যাক কোৱা হয় মহাকুম্ভ৷ কুম্ভৰ আয়োজন কৰা স্থানত ১৩ টা পূৰ্ণকুম্ভ সম্পূৰ্ণ হ’লে মহাকুম্ভ হয়৷ অৰ্থাৎ চলিত বছৰত প্ৰয়াগৰাজত অনুষ্ঠিত হৈ অহাৰ কুম্ভৰ মুঠ ১৩টা পূৰ্ণ কুম্ভ সম্পূৰ্ণ হৈছিল সেয়ে এই কুম্ভক মহাকুম্ভ বুলি কোৱা হৈছে৷ সম্প্ৰতি প্ৰয়াগৰাজৰ সেই ১৩ তম মহাকুম্ভৰেই আয়োজন কৰা হৈছিল৷ সেয়ে এই মেলাৰ জনপ্ৰিয়তা আৰু চাহিদা আছিল তুলনামূলকভাৱে বেছি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
