কেদাৰনাথৰ সৈতে আছে বিশেষ সংযোগ! ৰামৰ এই মূৰ্তিয়েই স্থাপিত হ’ব অযোধ্যাৰ মন্দিৰত

অসম লাইভ২৪ঃ ২২ জানুৱাৰীত অযোধ্যাৰ ৰাম জন্মভূমি মন্দিৰৰ প্ৰাণ প্ৰতিষ্ঠাৰ পূৰ্বে মন্দিৰত ৰামৰ কোনটো মূৰ্তি প্ৰতিষ্ঠা হ’ব সেই মূৰ্তিৰ নিৰ্বাচন প্ৰক্ৰিয়া অৱশেষত সম্পন্ন হৈছে। ৰাম মন্দিৰ কমিটিৰ কেইবাগৰাকীও সদস্যৰ সন্মতিক্ৰমে শ্ৰী ৰাম জন্মভূমি তীৰ্থক্ষেত্ৰত ট্ৰাষ্টে মূৰ্তি চিনাক্ত কৰি উলিয়াইছে। ৰামৰ মূৰ্তিটোক শিশু ৰাম হিচাপেই কল্পনা কৰা হৈছে। এই মুৰ্তিটোৰ হাতত কি কি থাকিব সেই বিষয়েও জনাইছে কমিটিয়ে।

শিশু ৰামৰ বিশেষ মূৰ্তিটোৰ হাতত থাকিব তীৰ-ধনু। কৰ্ণাটকৰ প্ৰখ্যাত ভাস্কৰ অৰুণ যোগীৰাজে এই মূৰ্তিটো নিৰ্মাণ কৰি উলিয়াইছে। অযোধ্যাৰ ৰাম মন্দিৰৰ বাবে কেইবাটাও মূৰ্তি নিৰ্মাণ কৰা হৈছিল। এই আটাইকেইটা মূৰ্তিৰ মাজত গৰ্ভগৃহত স্থাপন কৰিবলৈ অৰুণ যোগীৰাজৰ মূৰ্তিটোহে চিনাক্ত কৰা হৈছে। বিগত শুক্ৰবাৰ অৰ্থাৎ ২৯ ডিচেম্বৰত মূৰ্তি চিনাক্তকৰণ প্ৰক্ৰিয়া সম্পূৰ্ণ হৈছে। ট্ৰাষ্টৰ সদস্য বিমলেন্দ মোহন প্ৰতাপ মিশ্ৰই জনোৱা অনুসৰি সেইদিনটোত এখন বিশেষ বৈঠক ট্ৰাষ্টে অনুষ্ঠিত কৰিছিল। তাতেই মন্দিৰৰ বাবে মূৰ্তি বাচনি কৰা হয়।

https://x.com/JoshiPralhad/status/1741868129289138340?s=20

সোমবাৰে পোনপ্ৰথমবাৰৰ বাবে প্ৰকাশ কৰা হৈছে মূৰ্তিৰ ছবি। কেন্দ্ৰীয় মন্ত্ৰী প্ৰহ্লাদ যোশীয়ে মূৰ্তিৰ ফটো শ্বেয়াৰ কৰি লিখিছে, ‘মহীশূৰৰ শিল্পী অৰুণ যোগীৰাজৰ এই মূৰ্তিয়েই অযোধ্যাৰ মন্দিৰত স্থাপন কৰা হ’ব।’ এক্স হেণ্ডেলত লিখা পোষ্টত মন্ত্ৰীগৰাকীয়ে লগতে লিখিছে, ‘য’তেই ৰাম, তাতেই হনুমান। অযোধ্যত ভগৱান ৰামৰ প্ৰাণপ্ৰতিষ্ঠাৰ বাবে মূৰ্তি নিৰ্বাচন চূড়ান্ত হৈছে। আমাৰ দেশৰ প্ৰখ্যাত ভাস্কৰ শ্ৰী অৰুণ যোগীৰাজে তৈয়াৰ কৰা ভগৱান ৰামৰ এই মূৰ্তিয়েই অযোধ্যাত স্থাপন কৰিম। এই ৰামৰ মূৰ্তিয়ে ৰাম-হনুমানৰ অদম্য সম্পৰ্কৰ এক উদাহৰণ ফুটাই তুলিবলৈ সক্ষম হৈছে। ইফালে আপোনালোকে জানেই কৰ্ণাটকটো হনুমানৰেই দেশ।’

মূৰ্তি চিনাক্তকৰণৰ পাছতেই ভাস্কৰ্যশিল্পী অৰুণ যোগীৰাজে সংবাদসংস্থা পিটিআইৰ আগত দিয়া সাক্ষাৎকাৰত কৈছে যে, তেওঁ তৈয়াৰ কৰা মূৰ্তিটো ৰাম মন্দিৰ ট্ৰাষ্টে বাছনি কৰাৰ কথা এতিয়াও তেওঁ আনুষ্ঠানিকভাৱে গম পোৱা নাই। দেশক তিনিজন ভাস্কৰ্যশিল্পীক ৰামৰ মূৰ্তি তৈয়াৰ কৰাৰ বাবে নিৰ্বাচন কৰা হৈছিল। তাৰমাজতেই তেওঁক চিনাক্ত কৰাৰ খবৰ যদি সত্য তেন্তে এয়া ভাললগাৰেই কথা বুলি কৈ অৰুণ যোগীৰাজে কয়, ‘মোক বাছনি কৰাৰ খবৰটো যদি সত্য, তেন্তে মোৰবাবে ইয়াতকৈ আনন্দৰ খবৰ কি হ’ব পাৰে! মই নিৰ্মাণ কৰা ৰামৰ মূৰ্তিটো শিশু ৰামৰ। কাৰণ এইটো ঈশ্বৰৰ অৱতাৰৰ মূৰ্তি। মূৰ্তিটো দেখি মানুহৰ মনত দেৱত্বৰ অনুভৱ আহিব বুলি মই ভাৱো। সন্তানসদৃশ মুখৰ ওপৰিও ঐশ্বৰিক দিশটো মূৰত ৰাখিব লাগিব। মই প্ৰায় ৬-৭ মাহ আগতেই নিৰ্মাণৰ কাম আৰম্ভ কৰিছিলো। মোৰ মূৰ্তি নিৰ্বাচিত নহ’লেও জনতাই যদি এই মূৰ্তি দেখি ভালপায় তেন্তে তাতেই মই সুখী।’

উল্লেখ্য যে ইয়াৰ পূৰ্বে অৰুণ যোগীৰাজে কেদাৰনাথৰ আদি শংকৰাচাৰ্যৰ মূৰ্তি আৰু দিল্লীৰ ইণ্ডিয়া গেটৰ কাষত থকা সুভাষচন্দ্ৰ বসুৰ মূৰ্তিও তৈয়াৰ কৰিছে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ