Apple এ ভাৰতত প্ৰথমটো ফল্ডেবল আইফোন ডুঅ’ মুকলি কৰিছে। ইয়াৰ আৰম্ভণি মূল্য ২৫৬জিবি মডেলৰ বাবে ২৯৯,৯০০ টকা। 2TB ষ্ট’ৰেজৰ সৈতে টপ-অফ-দ্য-লাইন মডেলৰ মূল্য ৪৪৯,৯০০ টকা। আমেৰিকাত আইফোন ডুঅ’ৰ মূল্য ১,৯৯৯ ডলাৰৰ পৰা আৰম্ভ হয়, যাৰ অৰ্থ হ’ল ভাৰতীয় মুদ্ৰাত প্ৰায় ১.৯০ লাখ টকা। এতিয়া একাংশ আইফোন প্ৰেমীৰ বাঢ়িছে চিন্তা, কিয়নো তেওঁলোকে আইফোন ডুঅ’ ক্ৰয় কৰিব নে অন্য ঘৰৰ লাগতিয়াল সামগ্ৰী ক্ৰয় কৰিব! কিয়নো এই ফোনটোৰ মূল্যত আপুনি ঘৰৰ ফ্ৰিজ, ৱাচিং মেচিন, টিভি সকলো ক্ৰয় কৰিব পাৰিব, নহ’লে আপুনি চাৰিচকীয়া বাহনো ক্ৰয় কৰিব পাৰিব।
বজাৰত এই ফোনটো মুকলিৰ লগে লগে একাংশই সামাজিক মাধ্যমত বিভিন্ন meme শ্বেয়াৰ কৰি আছে। প্ৰথম দৃষ্টিত আইফোন ডুঅ’ৰ দাম আমেৰিকাতকৈ ভাৰতত প্ৰায় ৫৮% বেছি যেন লাগে। অৱশ্যে দুয়োখন দেশৰ তালিকা মূল্য তুলনা কৰিলেই সম্পূৰ্ণ ছবিখন পোহৰলৈ নাযায়। ভাৰতীয় কৰ আৰু বিদেশৰ পৰা ফোনটো আমদানি কৰাৰ খৰচৰ কথা লক্ষ্য কৰিলে মূল্যৰ পাৰ্থক্য বহু পৰিমাণে কমি যায়।
আমেৰিকাৰ মূল্যত কৰো অন্তৰ্ভুক্ত
ভাৰত আৰু আমেৰিকাত আইফোনৰ দাম তুলনা কৰিলে প্ৰথমে কৰ সম্পৰ্কে বুজাটো গুৰুত্বপূৰ্ণ। আমেৰিকাত এপলৰ উল্লেখিত মূল্য ১,৯৯৯ ডলাৰত বিক্ৰী কৰ অন্তৰ্ভুক্ত কৰা হোৱা নাই। ৰাজ্য অনুসৰি কৰ বেলেগ বেলেগ। সংবাদ মাধ্যমৰ বাতৰি অনুসৰি আমেৰিকাত বিক্ৰী কৰ ৬%ৰ পৰা ১০%লৈকে হ’ব পাৰে। ফলস্বৰূপে তাত ফোনটো ক্ৰয় কৰাৰ প্ৰকৃত খৰচ প্ৰায় ২২০০ ডলাৰ হ’ব পাৰে। আনহাতে, ভাৰতত আইফোন ডুঅ’ৰ মূল্য ২৯৯,৯০০ টকাত ইতিমধ্যে ১৮% জি এছ টি অন্তৰ্ভুক্ত কৰা হৈছে।
বৰ্তমান ভাৰতলৈ আইফোন ডুঅ’ৰ আমদানি
এপলে বিগত কেইবছৰমানৰ পৰা ভাৰতত বৃহৎ পৰিসৰত আইফোন নিৰ্মাণ কৰি আহিছে। আমদানি ব্যয় কম হোৱাৰ ফলত ভাৰতত নিৰ্মিত আইফোন মডেলৰ দাম কম ৰখাটো সহজ হৈ পৰে। অৱশ্যে আইফোন ডুঅ’ৰ ক্ষেত্ৰত পৰিস্থিতি বেলেগ। এয়া এপলৰ প্ৰথমটো ভাঁজ কৰিব পৰা আইফোন আৰু বৰ্তমান ইয়াক সম্পূৰ্ণ একত্ৰিত ইউনিট হিচাপে ভাৰতলৈ আমদানি কৰা হৈছে। ভাঁজ কৰিব পৰা ফোন নিৰ্মাণৰ প্ৰযুক্তিও নিয়মীয়া স্মাৰ্টফোনতকৈ অধিক জটিল। পৰ্দা, হিঞ্জ, আৰু অন্যান্য উপাদানসমূহ নিৰ্মাণ কৰিবলৈ বহুত বেছি নিখুঁততাৰ প্ৰয়োজন। ইয়াৰ উপৰিও ভাৰতলৈ আমদানি কৰা আইফোন ডুঅ’ৰ ওপৰত ২৮% আমদানি শুল্ক আৰোপ কৰিব পাৰি। ভাৰতত এই ফোনটোৰ স্থানীয় উৎপাদন আৰম্ভ কৰিবলৈ এপলে কিছু সময় লাগিব পাৰে।
কৰ আৰু শুল্ক আঁতৰাই দিলে কিমান পাৰ্থক্য আহিব?
ভাৰতত আইফোন ডুঅ’ৰ ২৯৯,৯০০ টকা মূল্যৰ পৰা যদি ১৮% জিএছটি আঁতৰাই দিয়া হয় তেন্তে প্ৰায় ২৫৪,১৫৩ টকা হয়। আনুমানিক ২৮% আমদানি শুল্ক বাদ দিলে ইয়াৰ মূল্য প্ৰায় ১৯৮,৫৫৭ টকা হয়, যিটো প্ৰায় ২,০৮৭ ডলাৰৰ সমতুল্য। ইফালে, আমেৰিকাত ইয়াৰ তালিকা মূল্য ১,৯৯৯ ডলাৰ। অৰ্থাৎ কৰ আৰু আমদানিৰ খৰচ বাদ দিয়াৰ পিছত দুয়োখন দেশৰ মাজত প্ৰাৰম্ভিক পাৰ্থক্য মাত্ৰ প্ৰায় ৮৮ ডলাৰ। কিন্তু এইটো এটা আনুমানিক গণনা, আৰু এপলৰ যোগান শৃংখল আৰু কৰ গাঁথনিৰ ওপৰত নিৰ্ভৰ কৰি প্ৰকৃত খৰচ ভিন্ন হ’ব পাৰে।
ইয়াৰ পিছত আইফোন ডুঅ’ সস্তা হ’ব পাৰেনে?
এতিয়া আটাইতকৈ ডাঙৰ প্ৰশ্নটো হ’ল যে ভৱিষ্যত প্ৰজন্মত আইফোন ডুঅ’ ভাৰতত সস্তা হ’বনে? ইয়াৰ মূল উত্তৰ এপলৰ স্থানীয় উৎপাদনত নিহিত হৈ আছে। যদিহে এপল আৰু ইয়াৰ উৎপাদন অংশীদাৰসকলে ভাৰতত আইফোন ডুঅ’ উৎপাদন আৰম্ভ কৰে তেন্তে আমদানিৰ কিছু খৰচ হ্ৰাস পাব পাৰে। ১৬ অক্টোবৰৰ পৰা ভাৰতত আইফোন ডুঅ’ৰ প্ৰি-অৰ্ডাৰ আৰম্ভ হ’ব, ২৩ অক্টোবৰৰ পৰা বিক্ৰী আৰম্ভ হ’ব।
(এই তথ্য যুগুতাইছে বৰষা মিশ্ৰই)
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
