সাম্প্ৰতিক সময়ত ফুটবল জগতত যেতিয়াই শ্ৰেষ্ঠ খেলুৱৈৰ তৰ্কৰ কথা আহে, তেতিয়াই দুটা নাম সৰ্বপ্ৰথমে আহে ক্ৰিষ্টিয়ানো ৰোনাল্ডো আৰু লিঅনেল মেছি। কিন্তু বিগত চাৰি বছৰত বিশ্ব ফুটবলত নতুন এক অধ্যায় আৰম্ভ হৈছে। এফালে ৰোনাল্ডো আৰু মেছি কেৰিয়াৰৰ বিয়লি বেলাত উপনীত হৈছে, আনফালে এমবাপে আৰু হালাণ্ডৰ দৰে নতুন প্ৰজন্মৰ তাৰকাই বিশ্বৰ ফুটবল অনুৰাগীসকলৰ হৃদয়ত নতুনকৈ থিতাপি লৈছে। চলিত বিশ্বকাপত মেছিৰ হেইট্ৰিকৰ উপৰিও, এমবাপে আৰু হালাণ্ডৰো উজ্জীৱিত প্ৰদৰ্শন দেখিলো। এই তিনি তাৰকাৰ প্ৰদৰ্শনৰ সমান্তৰালকৈ ক্ৰিষ্টিয়ানো ৰোনাল্ডোৰ প্ৰদৰ্শন দেখাৰ পিছতে স্বাভাৱিকতে বহু ফুটবল অনুৰাগীৰ মাজত এটাই প্ৰশ্ন আহিছে— স্তিমিত হৈ আহিছে নেকি CR7?
কোন শ্ৰেষ্ঠ, ৰোনাল্ডো বনাম মেছি?
২০২২ চনৰ FIFA World Cup Qatar 2022ৰ পিছত ৰোনাল্ডোৱে ইউৰোপ এৰি ছৌদি আৰৱৰ ক্লাব Al Nassr FCত যোগদান কৰিছিল। বিগত চাৰি বছৰত ৰোনাল্ডোৱে ক্লাব আৰু দেশৰ হৈ শতাধিক গ’ল কৰিছে। ৪০ বছৰ বয়সৰ সীমা স্পৰ্শ কৰাৰ এই ক্ষণত ৰোণাল্ডো এতিয়াও পৰ্টুগালৰ মুখ্য আৰু অন্যতম ষ্ট্ৰাইকৰ খেলুৱৈ। শাৰীৰিক সক্ষমতা, হেডিং, পজিচনিং আৰু ফিনিচিঙত এতিয়াও ৰোনাল্ডোৰ চোক কমি যোৱা নাই। অৱশ্যে পূৰ্বতকৈ কিছু পৰিমাণে গতিৰ হ্ৰাস ৰোনাল্ডোৰ নকমা নহয়। ৰোনাল্ডোৰ বিপৰীতে দেশক প্ৰতিনিধিত্ব কৰি মেছিয়ে পাইছে অধিক সফলতা। মেছিৰ ভৰিৰ যাদু এতিয়াও অক্ষত অৱস্থাতেই আছে যেন অনুভৱ কৰে অনুৰাগীয়ে। ২০২২ বিশ্বকাপ জয়ে মেছিৰ কেৰিয়াৰক এক নতুন উচ্চতালৈ নিছে। বিশ্বকাপ, কোপা আমেৰিকা, ফাইনালিছিমাৰ জয়ে মেছিক ফুটবলৰ অনন্য কৰি তুলিছে। ২০২৩ চনত তেওঁ Inter Miami CFলৈ গ’ল যদিও খেলৰ ধৰণত ডাঙৰ পৰিৱৰ্তন দেখা নাযায়। বহু ফুটবল বিশ্লেষকৰ মতে বিগত প্ৰায় দুটা বছৰৰ খেলসমূহ চালে ৰোনাল্ডোৰ তুলনাত বয়সৰ প্ৰভাৱ মেছিৰ খেলত কমকৈ দেখা যায়। বিগত ৪ বছৰত ৰোনাল্ডোই ইউৰোপিয়ন শীৰ্ষ ক্লাব প্ৰতিযোগিতাৰ পৰা আঁতৰি ছৌদি লীগত খেলিছে। মানদণ্ডৰ ক্ষেত্ৰত ইউৰোপিয়ন শীৰ্ষ পৰ্যায়ৰ ক্লাব ফুটবল লীগ ছৌদি লীগৰ তুলনাত বহু ওপৰত। মানচেষ্টাৰ ইউনাইটেডক সফল কৰিব নোৱাৰি ইউৰোপিয়ন লীগ এৰিছিল ৰোনাল্ডোৱে। আনহাতে ইয়াৰ বিপৰীতে PSGত লীগ খিতাপ জিকাৰ উপৰিও ইণ্টাৰ মিয়ামিক নতুন উচ্চতালৈ লৈ নিবলৈও সক্ষম হৈছে মেছিয়ে।
এমবাপে, হালাণ্ড যুগৰ সূচনা!
দুই মহাতাৰকাৰ কেৰিয়াৰৰ বিয়লি বেলাত ফুটবল অনুৰাগীৰ হৃদস্পন্দনত খালী হোৱা ঠাইখিনি পূৰাবলৈ উদিত হৈছে এমবাপে, হালাণ্ডৰ দৰে তাৰকাৰ। অৱশ্যে এই তালিকাত আৰু কিছু ফুটবলাৰে ভূমুকি মাৰিছে যদিও এই দুগৰাকী সাম্প্ৰতিক সময়ত সবাটোকৈ জনপ্ৰিয়। সময়ে সময়ে আঘাতজনিত সমস্যাৰে যুঁজি থকা নেইমাৰে এই দৌৰত থাকিও যেন হেৰাই থাকিল। ক্ৰিষ্টিয়ানো ৰোনাল্ডোক নিজৰ আদৰ্শ হিচাপে লোৱা এমবাপেৰ গুৰুৰ দৰেই মূল শক্তি তীব্ৰ গতি আৰু অসাধৰণ ফিনিশ্বিং। ২০২২ৰ ফাইনেলত মেছিৰ আৰ্জেণ্টিনাৰ বিৰুদ্ধে অকলেই বীৰৰ দৰে যুঁজ দিছিল এমবাপেই। ফাইনেলত আৰ্জেণ্টিনাৰ বিৰুদ্ধে পৰাস্ত হ’লেও এমবাপেৰ সেই দুৰ্দান্ত হেইট্ৰিকটোৰ কথা ফুটবল অনুৰাগীৰ নিশ্চয় মনত আছে। আনহাতে গ’ল মেচিন হিচাপে সমাদৰ লাভ কৰা এৰলিং হালাণ্ড আধুনিক ফুটবল বিশ্বৰ দুৰ্দান্ত ষ্ট্ৰাইকাৰসকলৰ ভিতৰৰ এজন।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
