তেতিয়া কন্যাটিৰ বয়স মাত্ৰ এবছৰ৷ ঘৰৰ মানুহে মাত্ৰ সেই এবছৰ বয়সতে বিয়া পাতি দিছিল কন্যাটিক। কিন্তু প্ৰাপ্তবয়স্ক বয়সত উপনীত হোৱাৰ পাছত যুৱতীগৰাকীয়ে সেই বিবাহ মানি ল’ব নোখোজে। অৱশেষত সেই বিবাহৰ পৰা মুক্তি পাবলৈ আদালতৰ কাষ চাপে।
এই ঘটনাটো ৰাজস্থানৰ৷ ৰাজস্থানৰ ৰেখা নামৰ যুৱতীগৰাকীয়ে মাত্ৰ ১ বছৰ বয়সতে তেওঁক দিয়া বিবাহ বন্ধনৰ পৰা মুক্তি লাভ কৰিছে৷ জন্মৰ পাছতে ৰেখা ককাক আইতাকৰ লগতে আছিল৷ কিন্তু সেই সময়তে ককাকৰ মৃত্যু হোৱাৰ পাছতে ৰেখাক মাত্ৰ এবছৰ বয়সতে স্থানীয় এক ল’ৰাৰ সৈতে বিবাহ কৰোৱাই দিয়া হয়৷ অৱশ্যে বিবাহৰ পাছতো ৰেখা পিতৃ গৃহতে থাকিবলৈ লয়৷
ৰেখাৰ বয়স হৈ অহাৰ পাছতে দৰা ঘৰৰ লোকে তেওঁক আনুষ্ঠানিকভাৱে তেওঁলোকৰ ঘৰলৈ লৈ যাবলৈ হেঁচা প্ৰয়োগ কৰিবলৈ ধৰে৷ শহুৰেকে ৰেখাক পুনৰ আনুষ্ঠানিকভাৱে বিবাহৰ বাবে হেঁচা প্ৰয়োগ কৰিবলৈ ধৰাত ৰেখাই আপত্তি কৰে৷ এই বিবাহৰ বিৰুদ্ধে ৰেখাই পাৰিবাৰিক আদালতৰ দ্বাৰস্থ হয়৷
লগতে পঢ়ক ৯৬ বছৰ বয়সত ৰাণী এলিজাবেথ দ্বিতীয়ৰ মৃত্যু : কি কি অভিলেখ গঢ়ি গ’ল ৰাণীয়ে?
উল্লেখ্য যে ৰাজস্থানৰ কিছু অঞ্চলত বাল্যকালতে বিবাহ দিয়াৰ পাছত পুনৰ বিবাহৰ প্ৰচলন আছে৷ এই প্ৰথাক ‘গৌনা’ বুলি কোৱা হয়৷ কিন্তু ৰেখাই এই পৰম্পৰাগত বিবাহৰ বান্ধত বন্দী হৈ থাকিব নুখুজিলে৷ ইয়াৰ পৰা মুক্তি বিচাৰি ৰেখাই এটা স্বেচ্ছাসেৱী সংগঠনৰ কাষ চাপে৷
স্বেচ্ছাসেৱী সংগঠনৰ স্বত্বাধিকাৰীয়ে দাবী কৰিছে যে ৰেখাই এই বিয়াত সন্মতি নিদিয়াৰ বাবে শহুৰেকে খাপ পঞ্চায়ত স্থাপন কৰিছিল। খাপ পঞ্চায়তে সিদ্ধান্ত দিয়ে যে যদি ৰেখাই সেই বিবাহক অস্বীকাৰ কৰে তেন্তে তেওঁ ‘ক্ষতিপূৰণ’ হিচাপে ১০ লাখ টকা দিব লাগিব।
ইয়াৰ পাছতে ৰেখাই এই সিদ্ধান্তৰ বিৰুদ্ধে ৰাজস্থানৰ এখন আদালতলৈ যায়। ৰেখাৰ আবেদন গ্ৰহণ কৰি আদালতে কয় যে এবছৰ বয়সত হোৱা বিবাহ বৈধ নহয়। শুনানিত ন্যায়াধীশ প্ৰদীপ কুমাৰ মোদীয়ে স্পষ্ট কৰি দিয়ে যে এশ বছৰ ধৰি প্ৰচেষ্টা চলোৱাৰ পাছতো বাল্য বিবাহৰ দৰে প্ৰথাক নিৰ্মূল কৰাটো সম্ভৱ হোৱা নাই। সকলোৱে বাল্য বিবাহৰ বিৰুদ্ধে থিয় দিব লাগে।
লগতে পঢ়ক ৮ হাজাৰ টকীয়া চাকৰি এৰি ইউটিউবৰ পৰা মাহে ৫ লাখ টকা উপাৰ্জন বজালীৰ এক দম্পতীৰ
ইয়াৰ পিছতে ৰাজস্থানৰ আদালতে ৰেখাৰ বাল্য বিবাহ বাতিল কৰা বুলি ৰায় দিয়ে। প্ৰায় দুটা দশকৰ পাছত এটা কুসংস্কাৰী প্ৰথাৰ বন্দীত্ব জীৱনৰ পৰা মুক্তি লাভ কৰি এতিয়া সুখী ২০ বছৰীয়া ৰেখা।
প্ৰসংগক্ৰমে আদালতৰ ৰায়দানৰ দিনটো আছিল ৰেখাৰ ২১ সংখ্যক জন্মদিন। ৰেখাই সংবাদ মাধ্যমৰ আগত কয় যে তেওঁ পঢ়া-শুনা কৰি নাৰ্ছ হ’ব বিচাৰে৷ ইয়াৰ পাছতহে তেওঁৰ বিবাহৰ কথা চিন্তা কৰিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
