‘ই চালা কাপ নামদে’ নহয় ‘ই চালা কাপ নামদু’। অৰ্থাৎ ‘এইবছৰ কাপ আমাৰ হ’ব’ নহয় ‘এইবছৰ কাপ আমাৰ হ’ল’। এটা ফ্ৰেন্সাইজীৰ ১৬ বছৰৰ অপেক্ষা। আইপিএলত এইপৰ্যন্ত এটাও ট্ৰফী জয় কৰিবলৈ সক্ষম হোৱা নাই ৰয়েল চেলেঞ্জাৰ্ছ বাংগালোৰে। ২০২৩ত সূচনা হৈছিল WPL (ৱমেনছ প্ৰিমিয়াৰ লীগ)ৰ। প্ৰথম সংস্কৰণত ব্যৰ্থ হোৱা RCB এ এইবাৰ তুলি ধৰিলে WPL ৰ ট্ৰফী।
দেওবাৰে দিল্লীৰ অৰুণ জেটলী ষ্টেডিয়ামত সপোন সাৰ্থক হ’ল RCB ৰ লগতে দলটোৰ হাজাৰ হাজাৰ অনুৰাগীৰ। স্মৃতি মন্ধানাৰ নেতৃত্বত WPL ৰ খিতাপ জিনিলে ৰয়েল চেলেঞ্জাৰ্ছ বাংগালোৰে। উৎফুল্লিত হৈ ভিডিঅ’ কলৰ জৰিয়তে শুভেচ্ছা জনালে বিৰাট কোহলীয়ে। WPL ৰ চূড়ান্ত বিজয়ী RCB এ ট্ৰফীৰ লগতে লাভ কৰে ৬ কোটি টকাৰ প্ৰাইজমানী। আনহাতে, ক্ৰমাগত দ্বিতীয়বাৰৰ বাবে WPL ৰ ফাইনেলত উপনীত হৈয়ো খিতাপ দখলত থমকি ৰোৱা দিল্লী কেপিটেলছে লাভ কৰে ৩ কোটি টকা।
WPL ত দলৰ বিজয়ত অন্যতম ভুমিকা পালন কৰা ৰয়েল চেলেঞ্জাৰ্ছ বাংগালোৰৰ তাৰকা অলৰাউণ্ডাৰ এলিছ পেৰীয়ে টুৰ্ণামেণ্টত সৰ্বাধিক ৩৪৭ ৰান সংগ্ৰহ কৰি অৰেঞ্জ কেপৰ লগতে লাভ কৰে ৫ লাখ টকা। ফাইনেল মেচত তীক্ষ্ণ বলিঙেৰে দিল্লী কেপিটেলছক কম ৰানত বান্ধি ৰখা শ্ৰেয়াংকা পাটিলে এমাৰজিং প্লেয়াৰ অব দ্য ইয়াৰ বঁটা আৰু ৫ লাখ টকা লাভ কৰে। শ্ৰেয়াংকাই টুৰ্ণামেণ্টত সৰ্বাধিক উইকেট দখলৰো কৃতিত্ব অৰ্জন কৰে। ১৩টা উইকেট দখল কৰা শ্ৰেয়াংকাই পাৰ্পল কেপৰ লগতে লাভ কৰে ৫ লাখ টকা।
WPL ত উজ্জীৱিত প্ৰদৰ্শন আগবঢ়োৱা ইউপি ৱাৰিয়ৰ্ছৰ দিপ্তী শৰ্মাই লাভ কৰে মোষ্ট ভেল্যুৱেবল প্লেয়াৰৰ সন্মান। দিপ্তীয়ে লাভ কৰে পাঁচ লাখ টকাৰ প্ৰাইজমানী। WPL ৰ এইবাৰৰ ছিজনত সৰ্বাধিক ছিক্সাৰ কোবোৱা বাবে শ্বেফালী বাৰ্মাই লাভ কৰে ৫ লাখ টকাৰ প্ৰাইজমানী। WPL ২০২৪ ত শ্বেফালিয়ে সৰ্বমুঠ ২০ টা ছিক্সাৰ কোবায়।
ৱমেনছ প্ৰিমিয়াৰ লীগৰ চেম্পিয়ন RCB এ লাভ কৰে এই ছিজনৰ ফেয়াৰ প্লে এৱাৰ্ড। ইয়াৰ বাবে দলটোৱে লাভ কৰে অতিৰিক্ত ৫ লাখ টকাৰ প্ৰাইজমানী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
