মোদীৰ পোডকাষ্ট লৈ চৰ্চিত হোৱা নিখিল কোন! মেট্ৰিক উত্তীৰ্ণ পাছলৈ হৈছিল দেশৰ কনিষ্ঠতম কোটিপতি
প্ৰধানমন্ত্ৰী নৰেন্দ্ৰ মোদীৰ জীৱনৰ প্ৰথমটো পোডকাষ্টত সাক্ষাতকাৰ লৈ দেশজুৰি চৰ্চিত হোৱা নিখিল কামাথ কোন হয়, তাকে লৈ এতিয়া বহুজনৰে মনত প্ৰশ্ন। কিদৰে পোডকাষ্টত নৰেন্দ্ৰ মোদীক মাতি আনিবলৈ সক্ষম হ’ল এই নিখিলে। এনে এশ এবুৰি প্ৰশ্ন এতিয়া বহুতৰে।
প্ৰধানমন্ত্ৰীয়ে নিজেই আজি তেখেতৰ এক্স হেণ্ডেল যোগে তেখেতৰ জীৱনৰ প্ৰথমটো পোডকাষ্টৰ খবৰ সদৰি কৰে। লগতে এই পোডকাষ্ট চোৱাৰ বাবেও আহ্বান জনায়।
পাছে কোন হয় এই নিখিল কামাথ ! নিখিল কামাথ, যাৰ নাম দেশৰ আন প’ডকাষ্টাৰৰ দৰে জনপ্ৰিয় নহ’বও পাৰে, কিন্তু ষ্টক ট্ৰেডিং আৰু ব্যৱসায়ৰ জগতখনত তেওঁ অতি জনপ্ৰিয়। কাৰণ তেওঁলোকৰ ট্ৰেডিং প্লেটফৰ্ম – জিৰোধা, যিয়ে ষ্টকত ধন বিনিয়োগ কৰাসকলৰ বাবে ট্ৰেডিং আৰু ব্ৰোকাৰেজ প্ৰদান কৰে।
সেইটোও অনলাইন অৰ্থাৎ এনে এটা প্লেটফৰ্ম য’ত ব্যৱসায়ীসকলে যিকোনো ঠাইৰ পৰা, যিকোনো সময়তে শ্বেয়াৰত ধন বিনিয়োগ কৰিব পাৰে।
অৱশ্যে নিখিল কামাতৰ জনপ্ৰিয়তা কেৱল জিৰোধাৰ সহ-প্ৰতিষ্ঠাপক হোৱাৰ বাবেই নহয়। তেওঁ ভাৰতৰ কোটিপতি হোৱা আটাইতকৈ কম বয়সীয়া ব্যক্তি৷ নিখিল কামাথৰ বৰ্তমানৰ সম্পত্তিৰ পৰিমাণ ৩.৩ বিলিয়ন ডলাৰ (প্ৰায় ২৮ হাজাৰ কোটি টকা) বুলি অনুমান কৰা হৈছে। তেওঁলোকৰ প্লেটফৰ্ম জিৰোধাতো ২০২৪ চনৰ শেষলৈকে ১ কোটিতকৈ অধিক ব্যৱহাৰকাৰী আছিল, যাৰ ফলত ই ভাৰতৰ অন্যতম বৃহৎ ট্ৰেডিং প্লেটফৰ্ম হিচাপে পৰিগণিত হৈছিল।
তাতোকৈ ডাঙৰ কথা- মাথো ১৬ বছৰ বয়সতে মেট্ৰিকৰ দেওনা পাৰ হৈয়ে পঢ়া সামৰি ১৭ বছৰ বয়সৰ পৰাই কাম কৰিবলৈ আৰম্ভ কৰিছিল নিখিলে। এটা কল চেণ্টাৰত মাহিলী ৮ হাজাৰ টকাৰ চাকৰি কৰিছিল নিখিলে।
১৮ বছৰ বয়সলৈকে তেওঁ নিয়মিতভাৱে ষ্টক ট্ৰেডিং কৰিবলৈ আৰম্ভ কৰে। পাছত চাকৰি এৰি জিৰোধা খোলে। আৰু আজিৰ তাৰিখত ১৪ বছৰীয়া জিৰোধাৰ বৰ্তমান মূল্য প্ৰায় ৭.৭ বিলিয়ন ডলাৰ। যিটো তেতিয়া ভাৰতীয় টকা হিচাপত ৬৪ হাজাৰ ৮০০ কোটিৰ সমান ।
২০২৩ চনৰ মাৰ্চ মাহত নিখিল কামাথে তেওঁৰ প’ডকাষ্ট ‘WTF is’ মুকলি কৰে। ১৪ মাৰ্চত তেওঁৰ অনুষ্ঠানৰ প্ৰথম খণ্ড মুকলি কৰা হয়। ২০২৩ চনৰ ডিচেম্বৰ মাহত স্পটিফাইত তেওঁৰ ভিডিঅ’ প’ডকাষ্ট শ্ব’টো বিশ্বৰ আটাইতকৈ বেছি চোৱা প’ডকাষ্টৰ ভিতৰত অন্যতম আছিল।
নিখিলে এই প’ডকাষ্টত এতিয়ালৈকে বহু ডাঙৰ ডাঙৰ শিল্পী আৰু লোকক আমন্ত্ৰণ জনাইছে। ইয়াৰ ভিতৰত কমেডিয়ান তন্ময় ভাট, বায়’কনৰ প্ৰতিষ্ঠাপক কিৰণ মজুমদাৰ শ্ব’, অভিনেতা সুনীল শেট্টী, তাৰা সূতাৰিয়া, ৰিতেশ আগৰৱাল আৰু চলচ্চিত্ৰ জগতৰ ৰনি স্ক্ৰুভালা, জেপ্ট’ৰ প্ৰতিষ্ঠাপক আদি পালিচা আৰু কৈভাল্য ভোহৰা আৰু অমিতাভ বচ্চনৰ নাতিনী নব্য নভেলীৰ দৰে নাম।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
