অসম লাইভ২৪ঃ বৃহস্পতিবাৰে মহাভাৰত, ৰুক্মিনী-কৃষ্ণৰ প্ৰেম লাভ জেহাদ বুলি কোৱাটো ভুল হ’ল বুলি স্বীকাৰ কৰিছে এপিচিচিৰ সভাপতি ভূপেন বৰাই। এই সন্দৰ্ভত ভূপেন বৰাই কয়, ‘মহাভাৰতৰ সন্দৰ্ভত যি কথা কৈছিলো সেই খিনিৰ পাছত ৰাতি সপোনত মোৰ ককাঁদেউতা আহিছিল। ককাই ক’লে, ‘তই দুবছৰৰ এপিচিচিৰ সভাপতি হিচাপে আছ, তই দুবছৰত দুটা অলাগতীয়াল কথা কৈছ। তই পুৱাই গৈ নামঘৰত সেৱা জনাই আহিবি। তোক মই যিটো প্ৰাৰ্থনা শিকাইছিলো সেই প্ৰাৰ্থনাটো গাই আহিবি। মই সেই প্ৰাৰ্থনাটোৱেই পুৱা আজি ককাই উপহাৰ দিয়া থাপনাখনত সেই প্ৰাৰ্থনা কৰিছো।’
ইয়াৰোপৰি ভূপেন বৰাই কয়, ‘যিসকলে মোক নামঘৰ যোৱাত বাধা দিব লাগে কৈছে তেওঁলোকে মুখ্যমন্ত্ৰীক আৰ্জি দিয়ক যে, ভূপেন বৰাক এনকাউণ্টাৰ কৰক। মই নামঘৰ নোযোৱাকৈ থকাতকৈ এনকাউণ্টাৰ ভালপাম। গ্ৰেপ্তাৰত মোৰ সহযোগিতা আছে কিন্তু নামঘৰ নোযোৱাকৈ থাকিব নোৱাৰিম। মোৰ জীৱনৰ শেষ সময়ছোৱা মই নামঘৰৰ পাঠক হৈ থাকিম ভাৱিছো। মই লখিমপুৰত লাখ লাখ টকা খৰচ কৰি নামঘৰ এটা বনাই আছো। ৰাজনীতি বাদ দিলে মই পাঠক হম। কংগ্ৰেছ দলৰ আন সদস্যসকলে কয় মোক পাঠক হ’লে শুৱাই। মোক নামঘৰ যোৱা বন্ধ কৰিলে এনকাউণ্টাৰ হ’লে মোৰ ঘৰৰ মানুহেও কোনো কেছ মোকৰ্দমা নকৰে। মই বাপসকলৰ ওচৰতহে ক্ষমা বিচাৰিছো। বিজেপিয়ে কি কৈছে সেই বিষয় লৈ মোৰ একো নাই, কিন্তু মই আধ্যাত্মিক পৰিবেশত থাকি ভালপাওঁ। ককাদেউতা আহি মোক সপোনত দেখা দিয়া বাবে মই আজি বাপসকলৰ ওচৰত ক্ষমা বিচাৰি প্ৰাৰ্থনাভাগ গাইছো।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
