অসম লাইভ ২৪ঃ বিশ্বজুৰি ক’ৰোনা মহামাৰীৰ আতংকৰ পাছত আমেৰিকাত এইবাৰ আন এক ৰোগৰ প্ৰাদুর্ভাৱ ঘটিছে। পিয়াঁজত বেক্টেৰিয়াৰ সৃষ্টি হৈ এই ৰোগৰ প্ৰাদুর্ভাৱ ঘটিছে আমেৰিকাত। ইতিমধ্যে মার্কিন যুক্তৰাষ্ট্ৰৰ প্ৰায় ৩৪খন ৰাজ্যত এই ৰোগৰ প্ৰাদুর্ভাৱ ঘটিছে। ‘থমচন ইণ্টাৰনেচনেল’ সংস্থাৰ পিয়াঁজ খাই প্ৰায় ৪০০ ৰো অধিক আমেৰিকান অসুস্থ হৈ পৰিছে। আমেৰিকাৰ স্বাস্থ্য বিশেষজ্ঞৰ মতে পিয়াঁজৰ চালমনেলা বেক্টেৰিয়াৰ প্ৰভাৱৰ পৰাই এই ৰোগৰ প্ৰাদুর্ভাৱ ঘটিছে। ইতিমধ্যে থমচন ইণ্টাৰনেচনেল’ৰ সৰবৰাহকৃত পিয়াঁজৰ ওপৰত নিষেধাজ্ঞা জাৰি কৰিছে আমেৰিকাই। নাগৰিকক নির্দেশ দিয়া হৈছে সেই কোম্পানীৰ পিয়াঁজ ক্ৰয় নকৰিবৰ বাবে। ১৯ জুনৰ পৰা ১১ জুলাইৰ ভিতৰত আমেৰিকাত এই ৰোগে মাৰাত্মক ৰূপ ধাৰণ কৰে। এই বেক্টেৰিয়া সংক্ৰমিত ৰোগীৰ দেহত ডায়েৰিয়া, জ্বৰ, পেটৰ বিষ আদি উপসর্গ দেখা দিয়ে। ৫ বছৰৰ তলৰ শিশু আৰু ৬৫ বছৰৰ বয়ষ্ক লোকৰ শৰীৰত এই ৰোগৰ প্ৰাদুর্ভাৱ অধিক। এই ৰোগৰ সংক্ৰমণৰ উৎসৰ সন্ধানত তদন্ত অব্যাহত আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
