চন্দ্ৰযান-৩ৰ বাবে ইছৰোই যন্ত্ৰ ক্ৰয় কৰিছে বেচৰকাৰী সংস্থাৰ পৰা, নেপথ্যত কোন এই বিখ্যাত কোম্পানী? চন্দ্ৰৰ বুকুলৈ কেতিয়া যাব চন্দ্ৰযান-৩?

অসম লাইভ২৪ঃ ২০১৯ চনতেই আৰম্ভ হৈছিল এই যাত্ৰা। কিন্তু যাত্ৰা আধৰুৱা হ’ল। চন্দ্ৰলৈ যোৱা আৰু হৈ নুঠিল। কিন্তু ইছৰোৰ বিজ্ঞানী ৰৈ যোৱা নাই। চন্দ্ৰৰ বুকুলৈ যোৱাৰ হেপাহ শেষ হোৱা নাই। ২০১৯ত ব্যৰ্থ হৈছিল ইছৰো। চন্দ্ৰযান-২ৰ মিছন তেতিয়া ৰৈ গৈছিল। কেইবাটাও ত্ৰুটি ধৰা পৰিছিল চন্দ্ৰযান-২ৰ। শেষ মুহূৰ্তত চফটৱেৰৰ গাফিলতিসহ যন্ত্ৰৰো কেইবাটাও ভুল ধৰা পৰিছিল। এই ভুলসমূহ পুংখানুপুংখভাৱে বিশ্লেষণ কৰিছে ইছৰোৰ বিজ্ঞানীয়ে। যাতে পুনৰ এই ভুল নহয় তাৰবাবে সকলোপ্ৰকাৰৰ পৰীক্ষাই সম্পন্ন কৰিছে ইছৰোৰ বিজ্ঞানীয়ে। চন্দ্ৰযান-৩ৰ নক্সাত অনা হৈছে কেইবাটাও পৰিবৰ্তন। উন্নত কৰা হৈছে প্ৰযুক্তি, কৌশল। সলাই দিয়া হৈছে গঠন কাঠামোও। বিজ্ঞানীসকলৰ আশা এইবাৰ চন্দ্ৰযান-৩ৰ মিছন সফল হ’বই।

কৰপৰা কেনেকৈ ইছৰোৱে আমদানি কৰিছে চন্দ্ৰযান-৩ মিছনৰ কলকব্জা? কোনে তৈয়াৰ কৰিছে এই কলকব্জা?

চৰকাৰী প্ৰজেক্টৰ নিৰ্ভৰশীল হ’লেও বহুপৰিমানেই কিন্তু এই মিছন বেচৰকাৰী প্ৰতিষ্ঠানৰ ওপৰতো নিৰ্ভৰশীল। সূত্ৰৰ খবৰ অনুসৰি মুম্বাইৰ এটা এৰোস্পেছ সংস্থাই চন্দ্ৰযান-৩ মিছনৰ বাবে বেছ কিছু গুৰুত্বপূৰ্ণ সা সৰঞ্জাম সৰবৰাহ কৰিছে। তৰল প্ৰপালছন ইঞ্জিন, চিই-২০(CE 20) আৰু চেটেলাইট থ্ৰাষ্টাৰসমূহ তৈয়াৰৰ বাবে লগা সামগ্ৰীসমূহ যোগান ধৰিছে ভিক্ৰোলিকৰ গড্ৰেজ এৰোস্পেছ কোম্পানীয়ে।

গড্ৰেজ এৰোস্পেছৰ সহকাৰী ভাইছ প্ৰেছিডেণ্ট আৰু বিজনেছ হেড মানেক বেহৰামকামদিনে জনোৱা অনুসৰি, তিনি দশকৰো বেছি সময় ধৰি ইছৰোৰ সৈতে তেওঁৰ সংস্থাই কাম কৰি আছে। বেহৰামকামদিনে কৈছে, ‘ইছৰোৰ চাহিদা মতে জটিল যন্ত্ৰপাতিসমূহ তৈয়াৰ কৰাৰ দায়িত্ব আমাৰ কোম্পানীয়ে লৈছে। আমাৰ সৈতে ইছৰোৰ চুক্তি আৰম্ভ হৈছে। এইবাৰ লিকুইড প্ৰপালছন মডিউল তৈয়াৰ কৰাৰো নিবিদা লাভ কৰিছো।’

কেতিয়া চন্দ্ৰলৈ যাত্ৰা কৰিব চন্দ্ৰযান-৩?

ইছৰোৰ একাধিক মহাকাশ গৱেষণা সম্বন্ধীয় কামকাজত অংশগ্ৰহণ কৰি আহিছে গড্ৰেজ এৰোস্পেছ সংস্থা। চন্দ্ৰযান-১, চন্দ্ৰযান-২ আৰু মঙলযান মিছনত গুৰুত্বপূৰ্ণ অবদান আছে এই সংস্থাৰ। এই অভিযানসমূহৰ বাবে বহুকেইবিধ যন্ত্ৰ তৈয়াৰ কৰিছে গড্ৰেজ কোম্পানীয়ে। ২০১৯ চনৰ ২ ছেপ্টেম্বৰত চন্দ্ৰৰ বুকত নমাৰ সময়তে ধ্বংস হৈ যায় বিমানখন। চলিত সপ্তাহৰ শুকুৰবাৰে দুপৰীয়া ২ বাজি ৩৫ মিনিটত চন্দ্ৰৰ বুকুলৈ যাত্ৰা কৰিব চন্দ্ৰযান-৩। এয়া হ’ব ভাৰতৰ তৃতীয় চন্দ্ৰযান। খুব কম দেশেহে বৰ্তমানলৈ চন্দ্ৰৰ বুকুত অভিযান চলাবলৈ যানৱ প্ৰেৰণ কৰিছে। মহাৰাষ্ট্ৰৰ উপকূলীয় অঞ্চলৰ ৰায়গড় জিলাৰ খালাপুৰ মহাকাশ গৱেষণাৰ যন্ত্ৰপাতি নিৰ্মাণৰ এটা প্ৰকল্পও আৰম্ভ কৰিছে গড্ৰেজ কোম্পানীয়ে। এই প্ৰকল্পৰ বাবদ ২৫০ কোটি টকা বিনিয়োগ কৰিছে কোম্পানীয়ে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ