অসম লাইভ২৪ঃ জোনমণি ৰাভাৰ মৃত্যুৰ পাছতেই সমগ্ৰ মৃত্যুৰ ঘটনাটোৱেই সোমাই পৰিছে ৰহস্যৰ আৱৰ্তত। বাগদানৰ পাছতেই হ’বলগীয়া স্বামী ৰাণা পগাগক গ্ৰেপ্তাৰ কৰাৰ পৰা বিধায়ক অমিয় কুমাৰ ভূঞাক ফোনযোগে ভুল আঙুলিয়াই দিয়ালৈকৈ এই সকলোবোৰৰ মাজতেই এগৰাকী সাহসী আৰক্ষী বিষয়াক দেখা পাইছিল অসমৰ ৰাইজেও। কিন্তু হঠাতেই জোনমণিৰ বিৰুদ্ধে আহিল কেইবাটাও বিস্ফোৰক অভিযোগ। জোনমণিৰ নাম পোনপটীয়াকৈ সাঙুৰ খাই পৰিল দুৰ্নীতিত। কাৰাগাৰলৈ পঠিওৱা হ’ল আৰক্ষী বিষয়া জোনমণিক।
কিছুদিন কাৰাগাৰত থকাৰ পাছত এই সকলোবোৰ তল পেলাই জোনমণি নগাওঁ মৰিকলং থানাৰ SI হিচাপে যোগদান কৰে। দায়িত্বভাৰ লৈয়েই পূৰ্ণগতিত কাম আৰম্ব কৰিলে জোনমণিয়ে। ড্ৰাগছ মাফিয়াৰ পৰা চোৰ ডকাইত সকলোৰে বাবে আতংকৰ নাম হৈ পৰিল SI জোনমণি ৰাভা। কিন্তু হঠাতেই এটা দুৰ্ঘটনা আৰু থিতাতে সকলো শেষ। সোমবাৰে দোভাগ নিশা অৰ্থাৎ প্ৰায় ১.৪৫ বজাত হোৱা পথ দুৰ্ঘটনাত মৃত্যুক আকোঁৱালি ল’লে জোনমণিয়ে। জোনমণিক দুৰ্ঘটনাৰ পাছতেই জখলাবন্ধা অসামৰিক চিকিৎসালয়ত ভৰ্তী কৰোৱা হৈছিল যদিও চিকিৎসকে মৃত ঘোষণা কৰে। ইয়াৰ পাছতেই কিন্তু বিগত নিশা প্ৰায় ৩ মান বজাত আৰক্ষীয়ে জোনমণিৰ বাসগৃহত তালাছি চলায়। তালাছিৰ বাবে জোনমণিৰ ঘৰত ডিএছপি, এছপি কে ধৰি কেইবাজনো আৰক্ষী বিষয়াই জোনমনিৰ বাসগৃহত অভিযান চলায় ১ লাখ টকা লৈ অনা বুলিও মাতৃয়ে জনাইছে। ইপিনে জোনমণিৰ মৃত্যুৰ পাছতেই কিয় হঠাৎ জোনমণিৰ বাসগৃহত তালাচি চলোৱা হ’ল সেই কথাও এতিয়া ৰহস্যৰ আৱৰ্তত সোমাই পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
