অসম লাইভ২৪ঃ শংকুৰাজৰ জীৱনলৈ বাস্তৱত আহিল অলকানন্দা। ধেমালী চলেৰেই কথাবোৰ সঁচা হ’ল। প্ৰাণৰ প্ৰেয়সীৰ অনামিকা আঙুলিত আঙুঠি পিন্ধালে শংকুৰাজ কোঁৱৰে। প্ৰেয়সী অলকানন্দা গোস্বামী।
পৰিচিত কণ্ঠশিল্পী শংকুৰাজ কোঁৱৰে আঙুঠি পিন্ধালে অলকানন্দাক। গানেৰেই শংকুৰাজে দিছিল প্ৰেয়সী অলকানন্দাৰ বৰ্ণনা। সুৰেৰেই প্ৰেমৰ অলকানন্দা বোৱাই দিয়াৰ কথাও কৈছিল। খুবেই জনপ্ৰিয় হৈছিল শংকুৰাজৰ অলকানন্দা গীতটি। ‘অলকানন্দা’ গানটোৰ অন্তৰালত আছিল প্ৰকৃততে এইগৰাকী অলকানন্দাই। শংকুৰাজেও এক সাক্ষাৎকাৰত কৈছিল, এই গীতটিৰ আঁৰৰ কাহিনী।
গানৰ আঁৰত আছে এগৰাকী নাৰী। ৰিক্ত বুকুতে বাসনা ঢলাগৰাকীয়েই তেওঁৰ প্ৰিয় নাৰী অলকানন্দা। বুধবাৰে ডিব্ৰুগড় জিলা চাবুৱা দিনজয় সত্ৰৰ সত্ৰাধিকাৰ মুকুন্দনন্দ দেৱ গোস্বামীৰ কন্যা অলকানন্দা গোস্বামীক আঙুঠি পিন্ধাই যুগ্ম জীৱনলৈ এখোজ আগবঢ়ালে শংকুৰাজে।
তেওঁ অসমীয়া গীতৰ আধুনিক ইলেকট্ৰনিক সংগীতৰ ধাৰালৈ আগবঢ়োৱা অৱদানৰ বাবেও শংকুৰাজ জনপ্ৰিয়। ‘অলকানন্দা’ৰ গীতটিৰে তেওঁ যিগৰাকী নাৰীৰ বিষয়ে কৈছিল, সেইগৰাকী অলকানন্দাকে জীৱন সংগী কৰি ল’লে শংকুৰাজে। এই বিশেষ দিনটোত তেওঁলোকে সামাজিক ৰীতি–নীতিৰে বাগদান সম্পন্ন কৰাৰ লগতে কেক কাটিও দিনটো উদযাপন কৰাৰ ছবি সামাজিক মাধ্যমত ভাইৰেল হৈ পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
