অসম লাইভ ২৪ঃ বিভিন্ন দিশৰ পৰা দুৰ্বিষহ হৈ উঠা বছৰটোৰ শেষত অসমীয়া চলচ্চিত্ৰ জগতলৈ আহিল সুখবৰ। বজালীৰ সন্তান ৰাজেন দাসে পৰিচালনা কৰা ‘লাইফ এন এ পাপেট’-এ চলচ্চিত্ৰ জগতলৈ কঢ়িয়ালে সুখবৰ।
ৰাজ্যৰ বিলুপ্তপ্ৰায় পুতলা নাচৰ শিল্পীসকলৰ দুৰ্বিষহ জীৱন যাত্ৰাক লৈ নিৰ্মাণ কৰা লাইফ ইন এ পাপেটে প’ৰ্টব্লেয়াৰ ফিল্ম ফেষ্টিভেলত চাৰিটা বঁটা লাভ কৰিবলৈ সক্ষম হৈছে। ১২-১৮ ডিচেম্বৰলৈ অনুষ্ঠিত মহোৎসৱত শ্ৰেষ্ঠ আন্তঃৰাষ্ট্ৰীয় চলচ্চিত্ৰ শাখা আৰু ভাৰতীয় চলচ্চিত্ৰ শাখাত শ্ৰেষ্ঠ ছবিৰ সন্মান লাভ কৰিছে। পৰিচালক ৰাজেন দাসে ভাৰতীয় চলচ্চিত্ৰ শাখাত শ্ৰেষ্ঠ পৰিচালকৰ সন্মান লাভ কৰিছে।
একেটা শাখাতে শ্ৰেষ্ঠ প্ৰযোজকৰ বঁটা লাভ কৰিছে ‘লাইফ এন এ পাপেট’ৰ পৰিচালক ৰাজেন দাস, আৰু মীনাক্ষী দাসে। উল্লেখ্য ছবিখনৰ অধিকাংশ শিল্পীয়ে জীৱনত প্ৰথমবাৰৰ বাবে কেমেৰাত সন্মুখত অভিনয় কৰিছে। আশা বৰদলৈ, দীপান্বিতা দাস, প্ৰকাশ ঠাকুৰীয়া আৰু পাপেট থিয়েটাৰৰ প্ৰযোজক নাৰায়ণ ডেকাই মুখ্য চৰিত্ৰত অভিনয় কৰিছে। ‘লাইফ এন এ পাপেট’ৰ সংগীত পৰিচালনা তৰালী শৰ্মা। উল্লেখ্য প’ৰ্টব্লেয়াৰ ফিল্ম ফেষ্টিভেলত ৫০ খন দেশে অংশগ্ৰহণ কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
