অসম লাইভ২৪ঃ প্ৰেমিকা নে স্পাই! সীমা হাইদৰক লৈ অব্যাহত আছে ৰহস্য। সীমা-শচীনৰ কাহিনী পোনতে খুবেই ৰোমাণ্টিক আছিল। কিন্তু দিন বাগৰাৰ লগে লগে যেন কথাবোৰ ৰহস্যৰ আৱৰ্তত সোমাই পৰিছে। পাবজি খেলৰ জড়িয়তে চিনাকী হৈ প্ৰেমত পৰি ভাৰতত প্ৰৱেশ কৰা সীমাই এতিয়া মূৰৰ কামূৰণি হৈ পৰিছে প্ৰশাসনৰ।
সীমা ISIৰ এজেণ্ট নে পাক গুপ্তচৰ সেই বিষয়টোক লৈয়ো অব্যাহত আছে চৰ্চা। উত্তৰপ্ৰদেশৰ এণ্টি টেৰৰিজম স্কোয়াডে(ATS) জেৰা চলাই আছে সীমাক। ইয়াৰ মাজতেই সীমাক লৈ চাঞ্চল্যকৰ দাবী কৰিছে নেপালৰ এখন হোটেলৰ মালিকে। বুধবাৰে নেপালৰ কাঠমাণ্ডুৰ এখন হোটেলৰ মালিকে দাবী কৰিছে যে হোটেলত সীমা আৰু শচীন একেলগে আহিছিল। ২০৪ নম্বৰ ৰুম ভাড়াত লৈছিল তেওঁলোকে।
নেপালৰ সেই হোটেলখনৰ মালিক গণেশে কয়, ‘উত্তৰপ্ৰদেশৰ বাসিন্দা শচীন আৰু পাকিস্তানী প্ৰেয়সী সীমাই আমাৰ হোটেল ৭-৮ দিনৰ বাবে বুক কৰিছিল। বেছিভাগ সময় তেওঁলোক হোটেলৰ কোঠাতেই আছিল। বাহিৰলৈ ওলালেও তেওঁলোকে লৰালৰিকৈ হোটেলৰ কোঠালৈ উভতি আহিছিল। আমাৰ হোটেল নিশা ৯ৰ পৰা ১০টাৰ ভিতৰত বন্ধ হয়। আমাৰ হোটেল বুক কৰিবলৈ শচীন আহিছিল। তেঁও হোটেল বুক কৰোতে কৈছিল যে তেওঁৰ পত্নীও ৰুমলৈ আহিব।’
হোটেলৰ মালিকে লগতে কয়, ‘সীমা পিছৰ দিনা হোটেললৈ আহে। হোটেল এৰাৰ সময়ত সীমাই পোনতে হোটেলৰ পৰা ওলাই গৈছিল। সেই সময়ত তেওঁৰ সৈতে কোনো সন্তান নাছিল। ইয়াৰোপৰি তাত শচীনে নিজৰ নাম শিৱাংশ বুলিহে কৈছিল। তেওঁলোকে ভাৰতীয় মুদ্ৰাতেই হোটেলৰ পেমেন্ট কৰিছিল।’
উল্লেখ্য যে সীমাৰ ভায়েক পাকিস্তানৰ সেনাবাহিনীত কৰ্মৰত। সীমাই নিজকে পঞ্চম শ্ৰেণীলৈকে পঢ়াশুনা কৰা বুলি দাবী কৰিলেও ইংৰাজী ভাষাত তেওঁৰ বিশেষ দক্ষতা আছে। সীমাক ইংৰাজীৰ বিশেষ কেইটামান শাৰী পঢ়িবলৈ দিছিল তদন্তকাৰী দলটোৱে। সেই বিশেষ শাৰীকেইটা সীমাই সলসলীয়াকৈ পঢ়া বুলি প্ৰকাশ কৰিছে তদন্তকাৰী দলটোৱে। তেওঁ ভোটাৰ আইডি তৈয়াৰ কৰিছিল ২০২২ চনৰ ২০ ছেপ্টেম্বৰতেই। কিয় ইমান দেৰীকৈ তেওঁ ভোটাৰ আইডি তৈয়াৰ কৰিছে সেই বিষয়টোক লৈয়ো উত্থাপিত হৈছে প্ৰশ্ন। সীমাৰ প্ৰতিটো দিশতেই যেন আছে ৰহস্য। সীমাৰ ৰহস্যজনক কথাবোৰে এতিয়া চিন্তাত পেলাইছে দেশৰ সচেতন মহলক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
