ভাস্কৰজ্যোতি দাস, অসম লাইভ ২৪ঃ ২০২১ৰ বিধানসভা নিৰ্বাচনত মুখ্যমন্ত্ৰী সৰ্বানন্দ সোণোৱালে মাজুলী সমষ্টিৰ পৰা নিৰ্বাচন নেখেলে। এই দাবী কৰিছে অসম প্ৰদেশ কংগ্ৰেছৰ সভাপতি ৰিপুন বৰাই। মাজুলীৰ কংগ্ৰেছ দলৰ এক প্ৰতিবাদী সভাত অংশগ্ৰহণ কৰি কংগ্ৰেছ সভাপতি বৰাই ৩১ জুলাইত এইদৰে মন্তব্য কৰিছিল। কংগ্ৰেছ সভাপতিগৰাকীয়ে নিজৰ দাবীৰ সমৰ্থনত কৈছিল- সৰ্বানন্দ সোণোৱালৰ ৰাজনৈতিক কেৰিয়াৰত এতিয়ালৈকে একেটা সমষ্টিত দুবাৰ নিৰ্বাচন খেলাৰ ৰেকৰ্ড নাই। সেই ধাৰা অব্যাহত ৰাখিয়েই মুখ্যমন্ত্ৰী সোণোৱালে অহা বিধানসভাত নিৰ্বাচনত মাজুলী সমষ্টিত নিৰ্বাচন খেলাৰ সম্ভাৱনা নাই। কংগ্ৰেছ সভাপতিগৰাকীয়ে দাবী কৰা অনুসৰি অহা বিধানসভা নিৰ্বাচনত মুখ্যমন্ত্ৰীগৰাকীয়ে বৰ্তমানৰ সমষ্টি মাজুলীৰ পৰিৱৰ্তে ডিব্ৰুগড় বিধানসভা সমষ্টিৰ পৰাহে নিৰ্বাচন খেলাৰ পূৰ্ণ সম্ভাৱনা আছে।
কংগ্ৰেছ সভাপতিৰ ভাষ্যৰ সত্যতা কিমান?
মুখ্যমন্ত্ৰী সোণোৱালে অহা নিৰ্বাচনত মাজুলীৰ পৰা নিৰ্বাচন নেখেলিব বুলি অসম প্ৰদেশ কংগ্ৰেছ কমিটীৰ সভাপতি ৰিপুন বৰাই অলপতে কৰা মন্তব্যক মুঠেই উলাই কৰিব পৰা নাযায়। প্ৰশ্ন উত্থাপিত হয়, কি যুক্তিৰ আধাৰত প্ৰদেশ কংগ্ৰেছৰ সভাপতিগৰাকীয়ে অলপতে মুখ্যমন্ত্ৰী সোণোৱাল সন্দৰ্ভত এনে ভৱিষ্যদ্বাণী কৰিলে? বিষয়টোৰ সকলো সত্যাসত্য নিৰূপণৰ বাবে ‘অসম লাইভ ২৪’ৰ পৰা আৰম্ভ কৰা হৈছিল এক নিজস্ব অনুসন্ধান। ‘অসম লাইভ ২৪’ৰ অনুসন্ধানত পোহৰলৈ আহিছিল শাসকীয় বিজেপি দলৰ লবী ৰাজনীতিৰ ভিতৰুৱা বহু ভয়ংকৰ খবৰ। বাহিৰত যিমানেই যি কৰিয়ে নেদেখুৱাওক, ভিতৰি ভিতৰি স্পষ্টভাৱে দ্বি-বিভক্ত আজি অসম বিজেপি। এটা শিবিৰৰ নেতৃত্বত মুখ্যমন্ত্ৰী সোণোৱাল আৰু আনটোৰ নেতৃত্বত ৰাজ্যৰ শাসকীয় চৰকাৰৰ প্ৰতাপী মন্ত্ৰী ড০ হিমন্ত বিশ্ব শৰ্মা। পৰিস্থিতি ভিতৰি ভিতৰি ইমানেই ভয়ংকৰ হৈ পৰিছে যে মুখ্যমন্ত্ৰী সোণোৱালে সকলোতে শেহতীয়াকৈ নিজৰ ৰাজনৈতিক প্ৰতিদ্বন্দ্বী ড০ হিমন্ত বিশ্ব শৰ্মাৰ ভূত দেখিবলৈ আৰম্ভ কৰিছে। শক্তিশালী ৰাজনৈতিক প্ৰতিদ্বন্দ্বী ড০ হিমন্ত বিশ্ব শৰ্মাৰ ৰাজনৈতিক আগ্ৰাসনক মুখ্যমন্ত্ৰী সোণোৱালে দিনে দিনে অধিক ভয়ংকৰ বিপদ বুলি চিহ্নিত কৰি অহাৰ সময়তে সোণোৱালৰ বাবে অন্য এক ৰাজনৈতিক ভাবুকি হৈ পৰিছে ধেমাজিৰ বিজেপি বিধায়ক ডাঃ ৰণোজ পেগু। উল্লেখ্য যে ২০১৬ৰ বিধানসভা নিৰ্বাচনত মাজুলীৰ পৰা সৰ্বানন্দ সোণোৱালক বিধায়ক নিৰ্বাচিত কৰোৱাত মিছিং জনগোষ্ঠীৰ শক্তিশালী নেতা ডাঃ ৰণোজ পেগুৱে এক গুৰুত্বপূৰ্ণ ভূমিকা পালন কৰিছিল। পৰৱৰ্তী সময়ত পূৰ্বৰ মিছিং জনগোষ্ঠীৰ আঞ্চলিক ৰাজনৈতিক দল ‘গণশক্তি’ৰ পৰা ওলাই আহি ডাঃ ৰণোজ পেগুৱে বিজেপিত আনুষ্ঠানিকভাৱে যোগদান কৰে। বিজেপিত যোগদান কৰাৰ পাছত ডাঃ ৰণোজ পেগুক ধেমাজিৰ উপ-নিৰ্বাচনৰ জৰিয়তে বিজেপি দলে বিধায়ক হিচাপে বিজয়ী কৰাই আনে যদিও ডাঃ পেগুৰ দৰে হেভীৱেট নেতা এজনক কেৱল বিধায়ক পদতে আবদ্ধ কৰি ৰখাক লৈ শেহতীয়াকৈ ডাঃ ৰণোজৰ শিবিৰ মুখ্যমন্ত্ৰী সোণোৱালৰ ওপৰত ভীষণ নাৰাজ। মাজুলীৰ নিৰ্বাচনী ৰণত মিছিং জনগোষ্ঠীৰ লোকসকলে সদায়েই এক গুৰুত্বপূৰ্ণ ভূমিকা পালন কৰি আহিছে। মিছিং জনগোষ্ঠীৰ শক্তিশালী নেতা ডাঃ ৰণোজ পেগুৰ শিবিৰৰ সৈতে দিনে দিনে বাঢ়ি অহা ৰাজনৈতিক ব্যৱধানৰ সমান্তৰালভাৱে ৰাষ্ট্ৰীয় পৰ্যায়ত ড০ হিমন্ত বিশ্ব শৰ্মাৰ শক্তিশালী উত্থানত মাজুলীতে থৰহৰি কম্পমান এতিয়া সৰ্বানন্দৰ ৰাজনৈতিক ভেটি। ‘শত্ৰুৰ শত্ৰু আমাৰ মিত্ৰ’- নীতিক সৰোগত কৰি চতুৰ মন্ত্ৰী ড০ হিমন্ত বিশ্ব শৰ্মা আৰু ডাঃ ৰণোজ পেগু গোপনে একত্ৰিত হৈ মাজুলীত বিজেপিৰ পৰাজয় অৱধাৰিত কৰি তোলাৰ আশংকাতে মুখ্যমন্ত্ৰী সোণোৱাল এইবাৰ মাজুলীক লৈ কোনোপধ্যে নিশ্চিত হ’ব পৰা নাই। মাজুলীত পৰাজিত হ’লে নিজৰ মুখ্যমন্ত্ৰীৰ গাদী হেৰুওৱাৰ ভয়তে সৰ্বানন্দ সোণোৱালে শেহতীয়াকৈ নিজৰ বাবে নিৰাপদ বিকল্প সমষ্টি বিচৰাৰ কাম আৰম্ভ কৰিছে। বিকল্প নিৰাপদ সমষ্টিৰ তালিকাত সৰ্বানন্দ সোণোৱালৰ প্ৰথম পচন্দৰ বাছনিত উঠিছে ডিব্ৰুগড় সমষ্টি। বিগত ডেৰ দশকজুৰি ডিব্ৰুগড় বিধানসভা সমষ্টি দখল কৰি আহিছে বিজেপি বিধায়ক প্ৰশান্ত ফুকনে। বৰ্তমানৰ মাজুলী সমষ্টিৰ উপৰি ’২১ৰ নিৰ্বাচনত ডিব্ৰুগড় সমষ্টিৰ পৰাও নিৰ্বাচনী প্ৰতিদ্বন্দ্বিতা কৰাৰ পৰিকল্পনা সৰ্বানন্দ সোণোৱালৰ। সোণোৱাল ৰাজনৈতিক অংক স্পষ্ট, কিবাকৈ মাজুলীতে পৰাজিত হ’বলগা হ’লেও অন্তত ডিব্ৰুগড়ৰ পৰা বিধায়ক নিৰ্বাচিত হৈ নিজৰ মুখ্যমন্ত্ৰীৰ গাদী বচোৱা।
প্ৰশান্ত ফুকনৰ কি হ’ব?
ডিব্ৰুগড় বিধানসভা সমষ্টিৰ আসনখন মুখ্যমন্ত্ৰী সৰ্বানন্দ সোণোৱালক এৰি দিবলগা হ’লে বৰ্তমানৰ বিজেপি বিধায়কগৰাকীক ক’ত সংস্থাপিত কৰা হ’ব? আমাৰ হাতত পৰা খবৰমতে, বিধায়ক ফুকনক ইতিমধ্যে দিয়া হৈছে ’২৪ৰ লোকসভা নিৰ্বাচনত ডিব্ৰুগড় আসনৰ প্ৰাৰ্থিত্বৰ অফাৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
