অসম লাইভ২৪ঃ বাংগালুৰুৰ হোটেলত ২৬টা বিৰোধী দলক লৈ মহাজোঁটৰ গুৰুত্বপূৰ্ণ বৈঠক। বৈঠকত উপস্থিত আছে ছোনীয়া গান্ধী, ৰাহুল গান্ধী, মল্লিকাৰ্জূন খড়্গে, মমতা বেনাৰ্জী, লালুপ্ৰসাদ যাদৱ, নীতিশ কুমাৰ, শাৰদ পাৱাৰৰ দৰে প্ৰথমশাৰীৰ বিৰোধী নেতৃত্ব। বাংগালুৰুৰ হোটেলত আজি ১২ বজাৰ পৰা আৰম্ভ হৈছে দ্বিতীয় দিনাৰ বৈঠক। বৈঠকৰ শেষত সাংবাদিকক সম্বোধন কৰাৰো সম্ভাৱনা আছে।
এই বৈঠকেই ২৬টা বিৰোধী দলে কেনেকৈ বিজেপিৰ বিৰুদ্ধে যুঁজ দিব এই বিষয়টোক লৈ আলোচনা চলোৱাৰ ওপৰিও কোন দলে কৰ পৰা প্ৰাৰ্থীত্ব দিব সেই বিষয়টোক লৈয়ো আলোচনা কৰিব। সোমবাৰে নৈশভোজত উপস্থিত নাছিল এনচিপিৰ প্রধান শাৰদ পাৱাৰ। সকলোৱে বিষয়টোক লৈ আলোচনাও কৰিছিল কিয় শাৰদ পাৱাৰ নাহিল? কিন্তু মঙলবাৰে পুৱাৰ ভাগতেই বিশেষ বিমানযোগে শাৰদ পাৱাৰ উপস্থিত হৈছে বাংগালুৰু বিমানবন্দৰত। তেওঁক স্বাগতম জনাবলৈ বিমানবন্দৰত উপস্থিত হয় কৰ্ণাটকৰ মন্ত্ৰী এম বি পাটিল আৰু লক্ষ্মী হেব্বালকৰ। ইয়াৰপাছতেই তেওঁ অংশগ্ৰহণ কৰিছে ২৬দলীয় বিৰোধী মহাঁজোটৰ বৈঠকত।
আজিৰ বৈঠকত আলোচনাৰ প্রধান বিষয়েই হৈছে বিজেপিৰ বিৰুদ্ধে যুঁজাৰ ৰণকৌশল তৈয়াৰ কৰা। বৈঠকত দুইৰ পৰা তিনিটা বিশেষ সমিতিও গঠন কৰিব পাৰে। নিয়মিতভাৱে ২৬টা দলৰ শীৰ্ষনেতাই বৈঠকত বহা সম্ভৱ নহয় সেয়ে বিশেষ সমিতি গঠন কৰা হ’ব যিয়ে সমূহ বিষয় তদাৰক কৰিব। ৰাজ্যস্তৰত আসনৰ বুজাবুজিক লৈ এটা বিশেষ সমিতি গঠন হ’ব পাৰে। এই বৈঠকত কি সিদ্ধান্তত উপনীত হ’ব বিৰোধী সেয়া আজি আবেলিৰ ভাগতহে স্পষ্ট হ’ব যদিও বিৰোধীৰ বৈঠকক লৈ শাসক দলৰ এজনৰ পাছত আনজন নেতাই মন্তব্য কৰা পৰিলক্ষিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
