অসম লাইভ ২৪ঃ হৃদয়বিদাৰক! থাইলেণ্ডত ৩৪ জনকৈ লোকক গুলীয়াই হত্যা কৰিছে এজন প্ৰাক্তন আৰক্ষীয়ে। থাইলেণ্ডৰ এটা ডে কেয়াৰ চেণ্টাৰত সংঘটিত হৈছে এই গুলীচালনাৰ ঘটনা। বন্দুকধাৰী এজন আৰক্ষীয়ে ২২ টা শিশুসহ ৩৪ জন ব্যক্তিক গুলীয়াই হত্যা কৰে। ইপিনে ব্যক্তিগৰাকীয়ে নিজৰ পত্নী আৰু সন্তানকো গুলীয়াই হত্যা কৰিছে।
ড্ৰাগছ আসক্ত আৰক্ষীগৰাকীক শাস্তি হিচাপে কৰ্মৰ পৰা অব্যাহতি দিয়া হৈছিল। তাৰ পিছতেই বৃহস্পতিবাৰে শিশু কেন্দ্ৰটোত এই ভয়াৱহ আক্ৰমণ সংঘটিত কৰে প্ৰাক্তন আৰক্ষীয়ে। শিশু কেন্দ্ৰটোত থকা ৩০ টা শিশুৱে খাদ্য গ্ৰহণ কৰিবলৈ লোৱাৰ সময়তে বন্দুকধাৰী ব্যক্তিগৰাকীয়ে চেণ্টাৰটোত প্ৰৱেশ কৰে। প্ৰথমেই শিশু কেন্দ্ৰটোৰ ৫ গৰাকী কৰ্মচাৰীসহিতে এগৰাকী ৮ মহীয়া গৰ্ভৱতী শিক্ষকক গুলীয়াই হত্যা কৰে। তাৰ পিছতেই শিশক উদ্দেশ্যি নিৰ্বিচাৰ গুলীচালনা কৰে বন্দুকধাৰী আৰক্ষীয়ে। এই ভয়াৱহ আক্ৰমণ সম্পৰ্কে জিলাখনৰ জিলা বিষয়া জিদাপা বনচোমে সংবাদ সংস্থা ‘ৰয়টাৰছ’ক জনাইছে।
বিষয়াগৰাকীয়ে লগতে কয় যে, গুলীচালনাৰ শব্দক প্ৰথমতে চুবুৰীয়া বাসিন্দাসকলে আতচবাজী বুলি ভাবিছিল। সামাজিক মাধ্যমত ভাইৰেল হৈছে এই গুলীচালনাৰ দৃশ্য। থাইলেণ্ডৰ নং বুৱা লাম্ফু প্ৰদেশৰ উথাই চাৱান চহৰত চলা এই হত্যালীলাক লৈ সমগ্ৰতে চলিছে চৰ্চা। তেজৰ ডোভাত পৰি থকা শিশুকেইটা দেখি কঁপি উঠিছে বহুতৰে অন্তৰাত্মা।
থাইলেণ্ডত এনেধৰণে হোৱা গুলীচালনা ঘটনা বিৰল যদিও থাইলেণ্ডত অন্য দেশৰ তুলনাত বন্দুকৰ মালিকীস্বত্বৰ হাৰ অধিক। অবৈধ অস্ত্ৰ ৰখা লোকৰ সংখ্যাও থাইলেণ্ডতেই সৰ্বাধিক বুলি বহুসংখ্যকে সামাজিক মাধ্যমত উল্লেখ কৰা পৰিলক্ষিত হৈছে।
উল্লেখ্য যে ২০২০ চনত এজন সেনাই সম্পত্তিৰ চুক্তি কেন্দ্ৰীক বিবাদক লৈ চাৰি স্থানত গুলীচালনা কৰিছিল। এই গুলীচালনাৰ ঘটনাত ২৯ জন লোকে মৃত্যুক সাবটি লোৱাৰ বিপৰীতে ৫৭ জন লোক গুৰুতৰভাৱে আহত হৈছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
