ভাৰতৰ সবাতোকৈ দীৰ্ঘদিনীয়া উদ্ধাৰ অভিযান, ৫৬ বছৰৰ মূৰকত উদ্ধাৰ ৪ জোৱানৰ দেহ
হিমাচল প্ৰদেশৰ ৰোহটাং পাছৰ পৰা উদ্ধাৰ হৈছে ৪টা মৃতদেহ। এই মৃতদেহসমূহ ১৯৬৮ চনৰ বিমান দুৰ্ঘটনাত শ্বহীদ হোৱা জোৱানৰ। এণ্টন’ভ-১২ সামৰিক পৰিবহণ বিমানখন হঠাতে দুৰ্ঘটনাগ্ৰস্ত হৈছিল। বেয়া বতৰৰ বাবেই বিমান দুৰ্ঘটনাৰ কাৰণ বুলি কোৱা হৈছিল।
বিগত ৫৬ বছৰে বিমান দুৰ্ঘটনাত শ্বহীদ হোৱা জোৱানৰ মৃতদেহ তালাচী চলোৱা হৈ আছিল। এয়া ভাৰতৰ আটাইতকৈ দীৰ্ঘদিনীয়া অনুসন্ধান অভিযান। কালি ৩০ ছেপ্টেম্বৰ তাৰিখে নিৰাপত্তাৰক্ষীয়ে ৪টা মৃতদেহ উদ্ধাৰ কৰে। ইয়াৰে ৩টা মৃতদেহ চিনাক্ত কৰা হৈছে যদিও ১টা মৃতদেহ চিনাক্তকৰণ এতিয়াও চলি আছে।
এয়া ১৯৬৮ চনৰ কথা। সেই বৰ্ষৰ ৭ ফেব্ৰুৱাৰীত চণ্ডীগড়ৰ পৰা এএন-১২ সামৰিক বিমানে ১০২ জন সৈনিক লৈ উৰা মাৰিছিল। কিন্তু বেয়া বতৰৰ বাবে বিমানখন ৰোহটাং লাৰ ওচৰত দুৰ্ঘটনাগ্ৰস্ত হয়। এই বৰফেৰে আবৃত অঞ্চলটো যথেষ্ট কঠিন। এনে পৰিস্থিতিত মৃতদেহ বিচাৰি পোৱাটো অতি কঠিন হৈ পৰে। এই কাৰণেই বিগত ৫৬ বছৰে সেনাই শ্বহীদৰ মৃতদেহ বিচাৰি আছিল।
২০০৩ চনত অটল বিহাৰী বাজপেয়ী ইনষ্টিটিউট অৱ মাউণ্টেইনিংৰ একাংশ পৰ্বতাৰোহীয়ে বিমানৰ কিছু ধ্বংসাৱশেষ আৱিষ্কাৰ কৰিছিল। তেতিয়াৰ পৰাই সেনাই ইয়াত বহু অনুসন্ধান অভিযান চলাই আহিছিল। ২০০৫, ২০০৬, ২০১৩ আৰু ২০১৯ চনত সেনাৰ ডোগ্ৰা বেটেলিয়নে তালাচী অভিযান চলাইছিল। ২০১৯ চনতো ৫ টা মৃতদেহ উদ্ধাৰ কৰিবলৈ সক্ষম হৈছিল।
সেনা বিষয়াই দিয়া তথ্য অনুসৰি ১০ অক্টোবৰলৈকে চলিব এই অভিযান। ১৯৬৮ চনত শ্বহীদ হোৱা জোৱানসকলৰ পৰিয়ালে বহু বছৰ ধৰি আপোনজনৰ অপেক্ষা কৰি আছে। ইয়াৰ দ্বাৰা তেওঁলোকক সান্ত্বনা দিব পৰা যাব। এই তালাচী অভিযান ১০ অক্টোবৰলৈকে চলি থাকিব, এনে পৰিস্থিতিত আন জোৱানৰ মৃতদেহো পোৱাৰ সম্ভাৱনা আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
