আমাৰ প্ৰায়ভাগ মানুহকে জীৱনৰ কোনোবাখিনি সময়ত কেতিয়াবা এলেহুৱা ভাৱনাই আগুৰি ধৰে। তেনে সময়ত বহু গুৰুত্বপূৰ্ণ কামো এলাহ ভাৱনাৰ বাবে পৰি থাকে। এলাহ ভাৱনাৰ বাবে মানুহ এজন প্ৰতিযোগিতামূলক পৃথিৱীতো বহু পিছ পৰি ৰোৱা দেখা যায়। জাপানীজ সমাজখনত মানুহৰ এলেহুৱা বদ অভ্যাস নাশ কৰিবলৈ বিভিন্ন উপায় অৱলম্বন কৰা দেখা যায়। এলেহুৱা নাশ কৰি কৰ্মস্পৃহা বৃদ্ধি কৰিবলৈ জাপানী লোকসকলে অৱলম্বন কৰা তেনে ৮টা কৌশল হৈছে-
১. Ikigai (ইকিগাই) —
জাপানী লোকে অৱলম্বন কৰা প্ৰথমটো তেনে কৌশল হৈছে ইকিগাই। ইকিগাই শব্দৰ অৰ্থ হৈছে ‘জীৱন, জীয়াই থকাৰ কাৰণ’। যেতিয়া মানুহে নিজৰ জীৱনৰ উদ্দেশ্য স্পষ্টকৈ বুজি পায়, তেতিয়া কাম কৰাৰ প্ৰেৰণা স্বাভাৱিকভাৱে বৃদ্ধি পায়। উদাহৰণস্বৰূপে এজন শিক্ষকৰ ইকিগাই হ’ব পাৰে জ্ঞান বিলোৱা।এজন শিল্পীৰ ইকিগাই হ’ব পাৰে সৃষ্টি কৰা।
২. Kaizen (কাইজেন) —
জাপানী লোকসকলৰ এলাহক দূৰ কৰাৰ দ্বিতীয়টো জনপ্ৰিয় কৌশল হৈছে কাইজেন। কাইজেনৰ মূল নীতি হৈছে ৰাতিটোৰ ভিতৰতে ডাঙৰ পৰিৱৰ্তনৰ আশা কৰাৰ বিপৰীতে প্ৰতিদিনে ১%কৈ উন্নতি কৰা। বহুত কাম একেলগে কৰিবলৈ গ’লে এসময়ত মানুহ এজনে এলেহুৱা অনুভৱ কৰে আৰু প্ৰতিটো কামেই আধৰুৱা হৈ ৰয়। কিন্তু যদি কামটো সৰু সৰু অংশত ভাগ কৰা হয়, তেন্তে যিকোনো কাম আৰম্ভ কৰাৰ লগতে সুকলমে সম্পন্ন কৰাও সহজ হৈ পৰে।
৩. Shoshin (শ্বোশ্বিন) —
জাপানীসকলৰ তৃতীয়টো কৌশল হৈছে শ্বোশ্বিন। শ্বোশ্বিন শব্দৰ অৰ্থ হৈছে ‘মই সকলো কথা নাজানো গতিকে মই শিকিব বিচাৰো।’ অনেক সময়ত মানুহ ব্যৰ্থতাৰ ভয়ত কাম আৰম্ভ নকৰে। শ্বোশ্বিন কৌশলে সেই ভয় কমায়।
৪. Wabi-Sabi(ৱাবি-ছাবি) —
ৱাব-ছাবিৰ অৰ্থ হৈছে অপূৰ্ণতাক স্বীকাৰ কৰা। বহুত মানুহে নিখুঁতভাৱে কাম কৰিব বিচাৰি একেবাৰে আৰম্ভই নকৰে। ৱাবি-ছাবিৰ মূল নীতি হৈছে অসম্পূৰ্ণ কাম অন্তত কোনো কাম আৰম্ভ নকৰাকৈ থকাতকৈ ভাল।
৫. Ganbaru (গানবাৰু) —
জাপানীসকলৰ এলেহুৱাক দূৰ কৰাৰ আন এটা কৌশল হৈছে গানবাৰু। গানবাৰু শব্দৰ অৰ্থ হৈছে শেষলৈ চেষ্টা কৰি যোৱা। গানবাৰু কৌশল কঠোৰ পৰিশ্ৰম আৰু অধ্যৱসায়ৰ প্ৰতীক।
৬. Kakeibo (কাকেইবো) —
কাকেইবো শব্দৰ অৰ্থ হৈছে সময় আৰু সম্পদৰ হিচাপ। মূলত ই এটা ব্যক্তিগত বাজেট পদ্ধতি। ইয়াক সময় ব্যৱস্থাপনাৰ লগতো জড়িত কৰিব পাৰি। নিজৰ সময় ক’ত ব্যয় হৈছে সেয়া লিখি ৰখা কৌশলটোকে কাকেইবো বুলি কোৱা হয়। এনে কৰিলে কামৰ প্ৰতি দায়বদ্ধতা বাঢ়ে।
৭. Hara Hachi Bu (হাৰা হাচি বুউ)
হাৰা হাচি বুউৰ অৰ্থ হৈছে ৮০% পেট ভৰিলেই খোৱা বন্ধ কৰা। কিয়নো অধিক খালে অলসতা আৰু তন্দ্ৰা আহে। গতিকে এই কৌশলে শৰীৰক সক্ৰিয় ৰখাত সহায় কৰে।
৮. Shinrin-Yoku (শ্বিনৰিন-ইয়োকু) —
শ্বিনৰিন ইয়োকুৰ অৰ্থ হৈছে প্ৰকৃতিৰ মাজত কিছু সময় কটোৱা। জাপানত ইয়াক ‘Forest Bathing’বুলিও কোৱা হয়। প্ৰকৃতিৰ মাজত সময় কটালে মানসিক চাপ কমে, মন সতেজ হয় আৰু পুনৰ কামত মন দিবলৈ শক্তি পোৱা যায়।
বহু জাপানী আৰু জাপানত বাস কৰা লোকেও কৈছে যে এই ৮টা বস্তুৰ অধিকাংশই প্ৰকৃততে জীৱন দৰ্শন বা সাংস্কৃতিক ধাৰণাহে। দৈনন্দিন জীৱনত এলেহুৱা দূৰ কৰাৰ এয়া আনুষ্ঠানিক জাপানী পদ্ধতি নহলেও এইকেইটা কৌশলে কৰ্মস্পৃহা বৃদ্ধি কৰে। ইয়াক চিকিৎসা বিজ্ঞানৰ কোনো তথ্য হিচাপে গ্ৰহণ কৰা নহ’লেও জাপানী জীৱন দৰ্শনৰ ওপৰত ভিত্তি কৰি গঢ় লৈ উঠা আত্ম-উন্নয়নৰ কিছুমান নীতি হিচাপে চোৱাহে অধিক সঠিক হ’ব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
