চাৰধাম যাত্ৰাৰ আৰম্ভণিৰ প্ৰথম মাহতেই ৮৩ গৰাকী তীৰ্থযাত্ৰীৰ মৃত্যু হৈছে৷ তেওঁলোকৰ মাজত বেছিভাগেই হৃদৰোগত আক্ৰান্ত হৈছিল৷ আকৌ কোনো কোনোৰ মৃত্যু হৈছিল হাই অলটিটিউড চিকনেছৰ কাৰণে৷ স্থানীয় সূত্ৰৰ খবৰ অনুসৰি কেদাৰনাথ যোৱাৰ পথত তীৰ্থযাত্ৰীৰ মৃত্যুৰ সংখ্যা সকলোতকৈ বেছি৷ চাৰধাম যাত্ৰাৰ ৩৮ জনৰ মৃত্যু হৈছে এই যাত্ৰাপথত৷ বদ্ৰীনাথ যোৱাৰ পথত মৃত্যু হৈছে ১৭ জনৰ, গংগোত্ৰীত ১৫ জন আৰু যমুনাত্ৰীত ১৩ জন তীৰ্থযাত্ৰীৰ মৃত্যু হৈছে৷ চিকিৎসকে জনাইছে যে অতিৰিক্ত উচ্চতাৰ কাৰণে কম অক্সিজেন, দীৰ্ঘ পাহাৰীয়া পথত যাত্ৰা কৰাৰ কাৰণে হঠাৎ হৃদযন্ত্ৰৰ সমস্যা ইত্যাদি কাৰণেই বহুতেই অসুস্থ হৈ পৰে৷ বহুতেই তাতেই মৃত্যুক সাবটি লৈছে৷ উত্তৰাখণ্ড প্ৰশাসনৰ সূত্ৰৰ খবৰ অনুসৰি ৫ জুন পৰ্যন্ত ২২ লাখৰ বেছি তীৰ্থযাত্ৰীয়ে চাৰধাম দৰ্শন কৰিছে৷
৫ জুনত ৭৮ হাজাৰ তীৰ্থযাত্ৰীয়ে চাৰধাম দৰ্শন কৰিছে৷ সেই দিনটোত কেদাৰনাথ দৰ্শন কৰিছে ২৪ হাজাৰ ৮৭১ জনে৷ বদ্ৰীনাথত ২৩ হাজাৰ ৭২৯জন, গংগোত্ৰীত ১৩ হাজাৰ ১১৭, যমুনাত্ৰীত ৯ হাজাৰ ৮৮০ আৰু হেমকুণ্ডত ৭ হাজাৰ ১৮৯ জন তীৰ্থযাত্ৰী গৈছে৷
প্ৰশাসনৰ সূত্ৰৰ খবৰ অনুসৰি এই বছৰ চাৰধাম যাত্ৰাত বৰ্তমান পৰ্যন্ত যিমান তীৰ্থযাত্ৰীৰ মৃত্যু হৈছে তাৰ বেছিভাগৰেই মৃত্যু স্বাস্থ্য সংক্ৰান্তীয় কাৰণত৷ উত্তৰাখণ্ডৰ স্বাস্থ্যসচিব আৰ ৰাজেশ কুমাৰে কয়, ‘বৃহৎ সংখ্যক তীৰ্থযাত্ৰীক চিকিৎসা শিৱিৰসমূহত মৃত অৱস্থাতেই লৈ অহা হৈছে৷ বিগত বছৰৰ তুলনাত এইবাৰ অৱশ্যে মৃতকৰ সংখ্যা কম৷’ স্বাস্থ্য্যসচিবে লগতে কয়, ‘যাত্ৰা আৰম্ভৰ প্ৰথম মাহত ৪ লাখ ৩০ হাজাৰ তীৰ্থযাত্ৰীৰ স্বাস্থ্য পৰীক্ষা কৰা হৈছিল৷ সমগ্ৰ যাত্ৰাপথত চিকিৎসাৰ পৰ্যাপ্ত ব্যৱস্থা কৰা হৈছে৷ ৬৯ জন মেডিকেল অফিচাৰ, ১২১ গৰাকী নাৰ্ছ, ২৬ ফাৰ্মাচিষ্ট, ৩০৯খন অক্সিজেন সজ্জিত শয্যা, ৬ টা আই চি ইউ কক্ষ, এম্বুলেন্স, ব্লাডবেংকৰো ব্যৱস্থা ৰখা হৈছে৷
বিগত ৩০ এপ্ৰিলৰ পৰা আৰম্ভ হৈছে চাৰধাম যাত্ৰা৷ সেই দিনাই গংগোত্ৰী আৰু যমুনাত্ৰীৰো দুৱাৰ খুলি দিয়া হব তীৰ্থযাত্ৰীৰ বাবে৷ বিগত ২ মে’ত কেদাৰনাথৰ দুৱাৰ খুলি দিয়া হৈছে আৰু বদ্ৰীনাথ ধাম খুলি দিয়া হৈছে ৪ মে’ত৷ এপ্ৰিলৰ পৰা জুনৰ প্ৰথম সপ্তাহৰ মাজত ৮৩ গৰাকী তীৰ্থযাত্ৰীৰ মৃত্যু হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
