এক আজৱ তথা ভয়ংকৰ কাণ্ড সংঘটিত কৰিছে এগৰাকী পাকিস্তানী গৰ্ভৱতী মহিলাই৷
ঘটনাৰ বিৱৰণীৰ মতে পাকিস্তানৰ পেছোৱাৰাৰ তিনি কন্যা সন্তানৰ মাতৃ গৰ্ভৱতী এগৰাকী মহিলাই পুত্ৰ সন্তানৰ লাভৰ আশাৰে হাতুৰীৰে কোব মাৰি নিজৰ মূৰত দুই ইঞ্চি দৈৰ্ঘ্যৰ গজাল সোমাৱাই লয়ে৷
ইয়াৰ ফলত গুৰুতৰ ভাৱে আহত হয় গৰ্ভৱতী মহিলাগৰাকী৷ গুৰুতৰভাৱে আহত মহিলাগৰাকীক ততাতৈয়াকৈ স্থানীয় চিকিৎসালয়ত ভৰ্তি কৰোৱা হয়৷
বুধবাৰে পাকিস্তানৰ স্থানীয় সংবাদ মাধ্যমৰ আগত স্থানীয় চিকিৎসালয়ৰ চিকিৎসক হাইদৰ খানে প্ৰকাশ কৰা অনুসৰি গৰ্ভৱতী মহিলাগৰাকীয়ে এগৰাকী ধৰ্মীয় চুফীৰ পৰামৰ্শৰ মতে পুত্ৰ সন্তান লাভৰ আশাৰে এই কাণ্ড সংঘটিত কৰিছিল৷
চিকিৎসকগৰাকীৰ মতে এক্স-ৰে ৰিপ’ৰ্টত মহিলাগৰাকীৰ মূৰত দুই ইঞ্চি এটা গজাল ভিতৰলৈ প্ৰৱেশ কৰা স্পষ্টকৈ ধৰা পৰিছে৷ গজালটো প্ৰৱেশ কৰাৰ ফলত গৰ্ভৱতী মহিলাগৰাকী মগজু আঘাতপ্ৰাপ্ত হৈছে৷
‘‘মহিলাগৰাকীয়ে চুফীগৰাকীৰ পৰামৰ্শ অনুসৰি পুত্ৰ সন্তান লাভৰ আশাত হাতুৰীৰে কোব মাৰি নিজৰ মূৰত গজালটো ভৰাই দিছিল৷’’ চিকিৎসক ডাঃ হাইদৰ খানে সংবাদ মাধ্যমক কয়৷
ঘটনাটো সংঘটিত হোৱাৰ পিছতে স্থানীয় আৰক্ষীয়ে তদন্ত আৰম্ভ কৰিছে৷ আৰক্ষীয়ে উক্ত চুফীজনক আটক কৰিবলৈ গৰ্ভৱতী মহিলাগৰাকীকো সোধপোচ কৰা বুলি প্ৰকাশ পাইছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
