কৰ্ণাটকৰ লগতে দেশৰ সংবাদ আৰু সামাজিক মাধ্যম উত্তাল কৰি ৰখা হিজাব কাণ্ডই নিতৌ ন ন মোৰ লোৱা দেখা গৈছে৷
ইছলাম ধৰ্মাৱলম্বী শিক্ষাৰ্থীয়ে শিক্ষানুষ্ঠানত হিজাব পৰিধানৰ অধিকাৰ বিচাৰি কৰা আন্দোলনে কৰ্ণাটকৰ কোনো কোনো ঠাইত হতাহতি পৰ্যায় পোৱাৰ সময়তে কৰ্ণাটক উচ্চ ন্যায়ালয় আৰু দেশ সৰ্বোচ্চ ন্যায়ালয়ৰ মজিয়াও পাইছে গৈ এই কাণ্ডই৷
বুধবাৰে কৰ্ণাটক উচ্চ ন্যায়ালয়ৰ এক বিচাৰপীঠে গোচৰটো ন্যায়ালয়ৰ মুখ্য ন্যায়াধীশৰ নেতৃত্বত উচ্চ বিচাৰপীঠত শুনানিৰ বাবে প্ৰেৰণ কৰাৰ পিছতে বৃহস্পতিবাৰে পুনৰ ইয়াৰ শুনানি হোৱাৰ কথা৷ কিন্তু ইয়াৰ মাজতে গোচৰীয়া পক্ষৰ পৰা গোচৰটো দ্ৰুত শুনানিৰ বাবে উচ্চতম ন্যায়ালয়লৈ হস্তান্তৰ কৰিবলৈ বৃহস্পতিবাৰে এক আৰ্জি পেচ কৰা হৈছিল৷
বৃহস্পতিবাৰে উক্ত আৰ্জি দেশৰ সৰ্বোচ্চ ন্যায়ালয়ে খাৰিজ কৰিছে৷ উচ্চতম ন্যায়ালয়ে কয় যে কৰ্ণাটক উচ্চ ন্যায়ালয়ত শুনানি আৰম্ভ হোৱা এই গোচৰটো উচ্চতম ন্যায়ালয়ত শুনানি গ্ৰহণ কৰি হস্তক্ষেপ কৰাৰ কোনো যুক্তি নাই৷
ইফালে কৰ্ণাটক উচ্চ ন্যায়ালয়ৰ ন্যায়াধীশ কৃষ্ণ এছ দীক্ষিতৰ বিচাৰপীঠে গোচৰটো উচ্চ বিচাৰপীঠলৈ প্ৰেৰণ কৰাৰ পিছতে ইয়াৰ শুনানি এসপ্তাহৰ পৰা দুসপ্তাহলৈ পিছুৱাই যাব বুলি ধাৰণা কৰা হৈছিল যদিও ইয়াৰ গম্ভীৰতালৈ লক্ষ্য কৰি উচ্চ ন্যায়ালয়ৰ মুখ্য ন্যায়াধীশৰ নেতৃত্বত তিনিজনীয়া বিচাৰপীঠে বুধবাৰে ৰাতিয়ে ইয়াৰ শুনানি বৃহস্পতিবাৰে দুপৰীয়া কৰা হ’ব বুলি ঘোষণা কৰে৷
ইয়াৰ পিছতে গোচৰটো বৃহস্পতিবাৰে দুপৰীয়া আৰম্ভ হোৱা বুলি জানিব পৰা গৈছে৷ ইফালে পৰিস্থিতিৰ অচলাৱস্থা নিয়ন্ত্ৰণ কৰিবলৈ কৰ্ণাটকৰ মুখ্যমন্ত্ৰীয়ে ৰাজ্যখনৰ শিক্ষামন্ত্ৰীৰ সৈতে এক বৈঠকত মিলিত হৈছে৷
পৰিস্থিতি যাতে অধিক অৱনতি নহয় তাৰ প্ৰতি লক্ষ্য ৰাখি ৰাজ্যখনৰ শিক্ষানুষ্ঠানসমূহৰ বন্ধৰ ম্যাদ বৃদ্ধিৰ কৰাৰ সম্পৰ্কে বৈঠকত আলোচনা কৰা হ’ব বুলি জানিব পৰা গৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
