এখন ইছলামিক ব’ৰ্ডিং স্কুলত সংঘটিত এক অতি জঘন্য ঘটনা পোহৰলৈ আহিছে, যি ঘটনাই বিশ্বৰ সংবাদ মাধ্যমতো চাঞ্চল্যৰ সৃষ্টি কৰিছে৷
ঘটনাটো সংঘটিত হৈছে ইন্দোনেছিয়াৰ বাডুংগ জিলাত৷ ঘটনাৰ বিৱৰণীৰ মতে এখন ইছলামিক ব’ৰ্ডিং স্কুলৰ ৩৬ বছৰীয়া এজন শিক্ষকে ১৩ গৰাকীকৈ কিশোৰী ছাত্ৰীক ধৰ্ষণ কৰিছিল৷ ইয়াৰে ৯ গৰাকী কিশোৰী ছাত্ৰী গৰ্ভৱতী হোৱা বুলিও প্ৰকাশ পাইছে৷
ধৰ্ষণৰ অভিযোগত শিক্ষকজনক ২০১৬ চনতে গ্ৰেপ্তাৰ কৰা হৈছিল৷ ইয়াৰ পিছতে বাডুংগা আদালতত অভিযুক্ত শিক্ষকগৰাকীৰ বিৰুদ্ধে বিচাৰ পক্ৰিয়া আৰম্ভ হয়৷ বিচাৰ প্ৰক্ৰিয়াৰ অন্তত মংগলবাৰে শিক্ষকগৰাকীক দোষী সাব্যস্ত কৰি আদালতে যাৱজ্জীৱন কাৰাদণ্ড বিহিছে৷
জাকাৰ্তা টাইমছৰ মতে শিক্ষকগৰাকীৰ বিৰুদ্ধে মৃ্ত্যুদণ্ড দিয়া আৰু নপুংসক কৰাৰ দাবী উঠিছিল৷ ইফালে চৰকাৰী অধিবক্তাইও আদালতত শিক্ষকগৰাকীক মৃত্যুদণ্ড প্ৰদান আৰু নপুংসক কৰাৰ দাবী কৰিছিল৷
কিন্তু আদালতে এই দাবী খণ্ড কৰি শিক্ষকগৰাকীক ২৭ লাখ টকাৰ জৰিমনাসহ যাৱজ্জীৱন কাৰাদণ্ড বিহিছে৷
আদালতৰ ৰায়ৰ ঘোষণাত স্পষ্টভাৱে কোৱা হৈছে যে শিক্ষকগৰাকীয়ে যাৱজ্জীৱন কাৰাদণ্ডৰ সময়ছোৱাত পেৰল লাভ নকৰিব৷ অৰ্থাৎ কোনোদিনে শিক্ষকগৰাকীয়ে কাৰাগাৰৰ বাহিৰলৈ ওলাব নোৱাৰিব৷
শিক্ষকগৰাকীয়ে ক্ষমা ভিক্ষা কৰি আদালতক কৈছিল যে তেওঁৰ পৰিয়ালত কেৱল পত্নী আৰু এগৰাকী শিশু কন্যা আছে আৰু তেৱেঁ একমাত্ৰ উপাৰ্জনক্ষম ব্যক্তি৷ সেয়ে তেওঁক যাৱজ্জীৱন কাৰাদণ্ডৰ পৰা ৰেহাই প্ৰদান কৰিব লাগে৷ কিন্তু আদালতে তেওঁৰ ক্ষমা ভিক্ষাক খাৰিজ কৰি ২৭ লাখ টকাৰ জৰিমনাও বিহে৷
জাকাৰ্তা টাইমছৰ মতে এইটো হৈছে দেশখনৰ আটাইতকৈ বৃহৎ অপৰাধমূলক গোচৰৰ ৰায় আৰু ইয়াৰ পূৰ্বে এনে বৃহৎ অপৰাধমূলক গোচৰৰ ৰায় প্ৰদান কৰা হোৱা নাছিল৷
দেশখনত শিশু কন্যাক ধৰ্ষণ তথা যৌন নিৰ্যাতনৰ বাবে সৰ্বাধিক ১৫ বছৰৰ কাৰাবাসৰ বিহাৰহে বিধি আছে৷ ১৩ গৰাকীকৈ কিশোৰী ছাত্ৰীক ধৰ্ষণ কৰি যাৱজ্জীৱন কাৰাদণ্ডৰ শাস্তি বিহা এই ৰায়ে সেয়ে দেশখনৰ বাবে এক ঐতিহাসিক ৰায় ৰূপে চিহ্নিত হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
