অসম লাইভ ২৪ঃ কাইলৈ অৰ্থাৎ ২ অক্টোবৰত গুৱাহাটী বৰ্ষাপাৰা ষ্টেডিয়ামত হ’ব ভাৰত-দক্ষিণ আফ্ৰিকাৰ মাজত আকৰ্ষণীয় যুঁজ৷ খেলৰ পূৰ্বে ভাৰতীয় দলৰ প্ৰশিক্ষক ৰাহুল দ্ৰাৱিড়ে ষ্টেডিয়ামৰ পৰা সম্বোধন কৰিছে এখন সংবাদমেল৷ সংবাদমেলত প্ৰশিক্ষকগৰাকীয়ে বহুকেইটা গুৰুত্বপূৰ্ণ কথা উল্লেখ কৰিছে৷
আঘাতৰ বাবে দ্ৰুত বলাৰ যশপ্ৰীত বুমৰাহে এই শৃংখলা খেলিব নোৱাৰে বুলি সংবাদমেলৰ আৰম্ভণিতে প্ৰকাশ কৰে প্ৰশিক্ষক ৰাহুল দ্ৰাৱিড়ে৷ দ্ৰাবিড়ে সংবাদমেলত ৰিয়ান পৰাগৰ বিষয়টো উত্থাপন কৰিছে৷ ৰিয়ানৰ দৰে বহু প্ৰতিভাৱান খেলুৱৈ অসমত আছে,ইফালে বৰ্ষাপাৰা ষ্টেডিয়ামো বৰ ধুনীয়া৷ ইয়াতেই অনুশীলন কৰিব পাৰি বুলি প্ৰকাশ কৰাৰ লগতে অসমৰ উদীয়মান খেলুৱৈসকলক প্ৰপাৰ গাইডেন্স দিলে অসমৰ খেলুৱৈও ৰাষ্ট্ৰীয় পৰ্যায়ত খেলিব বুলি উল্লেখ কৰে প্ৰশিক্ষক দ্ৰাৱিড়ে৷
ইপিনে, সংবাদমেলৰ মাজতেই কিছু চিন্তিত হৈ দ্ৰাৱিড়ে কয় যে বুমৰাহে আঘাতৰ বাবে এই শৃংখলা খেলিব নোৱাৰে৷ সম্প্রতি বুমৰাহ NCA-ত চিকিৎসাধীন হৈ আছে৷ পৰৱৰ্তী সময়ত আঘাতৰ বুজ লৈহে বিশ্বকাপ খেলিব পাৰিব নে নোৱাৰে সিদ্ধান্ত লোৱা হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
