উত্তৰ প্ৰদেশৰ প্ৰয়াগৰাজৰ এখন দোকানক লৈ ছ’চিয়েল মিডিয়াত ব্যাপক চৰ্চা চলিছে। দোকানখনৰ বাহিৰত লিখা এটা বিশেষ বাৰ্তাই সকলোৰে দৃষ্টি আকৰ্ষণ কৰিছে। দোকানখনত স্পষ্টকৈ উল্লেখ কৰা হৈছে যে ‘মহিলাৰ প্ৰৱেশ নিষিদ্ধ, ইয়াত কেৱল পুৰুষেহে দোকানত সোমাব পাৰিব।’ দোকানীজনৰ এই সিদ্ধান্তৰ আঁৰৰ কাৰণ জানি বহু লোক আচৰিত হৈছে।
দোকানখনৰ বাহিৰত আন এটা ব্যতিক্ৰমী বাৰ্তাও লিখা আছে। তাত উল্লেখ কৰা হৈছে, “হে ভগৱান! অনুগ্ৰহ কৰি এই দোকানখনলৈ যিমান পাৰি কম গ্ৰাহক পঠিয়াওক।” দোকানীজনৰ এই বিশেষ বাৰ্তাৰ লগতে দোকানখনৰ এটা ভিডিঅ’ও ছ’চিয়েল মিডিয়াত ভাইৰেল হৈ পৰিছে।
খবৰ অনুসৰি, প্ৰয়াগৰাজৰ ৰজাপুৰ অঞ্চলৰ বাসিন্দা ঘনশ্যাম বাবা নামৰ দোকানীজনে নিজৰ দোকানত মহিলাৰ প্ৰৱেশ নিষিদ্ধ কৰিছে। তেওঁৰ দাবী, দোকানৰ আশে-পাশে মদ্যপায়ী লোকৰ অনুচিত আচৰণৰ বাবে তেওঁ এই সিদ্ধান্ত গ্ৰহণ কৰিবলৈ বাধ্য হৈছে। দোকানী ঘনশ্যাম বাবাৰ মতে, তেওঁৰ দোকানৰ আশে-পাশে জনবসতি তুলনামূলকভাৱে কম। অৱশ্যে ওচৰতে কেইবাটাও ঘৰ আছে। সন্ধিয়াৰ সময়ত একাংশ মদ্যপায়ী লোক দোকানৰ চাৰিওফালে গোট খায়।
তেওঁৰ অভিযোগ অনুসৰি, এই লোকসকলে পথচাৰীৰ লগতে দোকানলৈ সামগ্ৰী কিনিবলৈ অহা মহিলাসকলৰ প্ৰতিও অশালীন মন্তব্য কৰে। এনে আচৰণৰ ফলত মহিলাসকল অস্বস্তিত পৰে। এই পৰিস্থিতিৰ পৰা মহিলাসকলক আঁতৰাই ৰাখিবলৈ আৰু কোনো অপ্ৰীতিকৰ ঘটনা সংঘটিত হোৱাত বাধা দিবলৈ দোকানীজনে দোকানত মহিলাৰ প্ৰৱেশ নিষিদ্ধ কৰিছে বুলি জানিবলৈ দিছে।
ঘনশ্যাম বাবাৰ দোকানখনৰ আন এটা বিশেষ দিশ হৈছে ইয়াৰ দেৱালত লিখা ধৰ্মীয় আৰু নৈতিক বাণী। দোকানখনৰ আশে-পাশে ৰামচৰিতমানসৰ চৌপদী আৰু কবীৰৰ দোহা লিখা আছে। দোকানখনৰ ভিডিঅ’ ছ’চিয়েল মিডিয়াত ভাইৰেল হোৱাৰ পিছতে বিভিন্নজনে নিজৰ মতামত প্ৰকাশ কৰিছে। একাংশ লোকে দোকানীজনৰ সমস্যাটোৰ প্ৰতি সহানুভূতি প্ৰকাশ কৰিছে। আন একাংশই অৱশ্যে তেওঁৰ সিদ্ধান্তক সমালোচনা কৰিছে। এই ঘটনাই পুনৰ এবাৰ ৰাজহুৱা স্থানত মহিলাৰ সুৰক্ষা আৰু একাংশ লোকৰ অসামাজিক আচৰণৰ বিষয়টো চৰ্চালৈ আনিছে। দোকানীজনৰ সিদ্ধান্তক লৈ বিতৰ্ক চলি থকাৰ মাজতে মহিলাৰ সুৰক্ষা নিশ্চিত কৰিবলৈ প্ৰয়োজনীয় ব্যৱস্থা গ্ৰহণৰ দাবী উত্থাপন হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
