অসম লাইভ ২৪ঃ মাজুলীত অনাটন বাৰে বাৰে বাতৰিৰ প্ৰথম পৃষ্ঠাত। মাজুলীৰ স্বাস্থ্যখণ্ডক লৈ প্ৰশ্ন উত্থাপিত হৈ থকাৰ মাজতেই স্বাস্থ্যমন্ত্ৰীয়ে তিনিখনকৈ এম্বুলেঞ্চ মাজুলীবাসীক প্ৰদান কৰে। মাজুলীবাসীক তিনিখন এম্বুলেঞ্চ প্ৰদান কৰাৰ পিছতো এগৰাকী ৰোগীক ঘোঁৰা গাড়ীৰে চিকিৎসালয়লৈ নিয়াৰ দৃশ্য এতিয়া সমগ্ৰতে ভাইৰেল হৈ পৰিছে।
এম্বুলেঞ্চ দিয়াৰ পিছতো কিয় ৰোগীক এনেদৰে ঘোঁৰাগাড়ীৰে নিব লগা হৈছে? এই বিষয়টোক লৈ চৰ্চা লাভ কৰাৰ সময়তে ৰোগীৰ পৰিয়ালবৰ্গই এই সম্পৰ্কে দিয়া মন্তব্যই এতিয়া ভাৱিবলৈ বাধ্য কৰাইছে, সঁচাকৈয়ে মাজুলীত উন্নয়ন হৈছেনে? ৰোগীৰ আত্মীয়ই জনোৱা অনুসৰি বিধ্বস্ত বাট-পথৰ বাবে এম্বুলেঞ্চ প্ৰৱেশ কৰিব নোৱাৰে। মাজুলীৰ লুইত খাবলুৰ নামনি কুলামুৱাৰ জৰাজীৰ্ণ বাট-পথৰ বাবে এম্বুলেঞ্চ আহিব নোৱাৰে যাৰ বাবে যাতায়তৰ একমাত্ৰ উপায় ঘোঁৰাগাড়ীখনেই বুলি উল্লেখ কৰে ৰোগীৰ আত্মীয়ই।
উল্লেখ্য যে পুমী পাতিৰ নামৰ গুৰুতৰভাৱে অসুস্থ ৰোগীগৰাকীক মাজুলী জিলা চিকিৎসালয়লৈ নিয়াৰ পথত ঘোঁৰাগাড়ীও যাব নোৱাৰাত অৱশেষত ৰোগীগৰাকীক ঘৰলৈকে ওভতাই দিব লগাত পৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
