অসম লাইভ২৪ঃ নিকী যাদৱ মৃতদেহ ফ্ৰীজত উদ্ধাৰ হোৱাৰ পাছতেই আহিছে এটাৰ পাছত আনটো ভয়ংকৰ তথ্য। নিকি হত্যাকাণ্ডৰ সৈতে সাঙুৰ খাই পৰিছে দিল্লীৰ আৰক্ষী কনিষ্টবলৰো নাম। নিকিক হত্যা কৰাৰ পাছত মৃতদেহটো লুকুৱাবলৈ হত্যাকাৰী ছাহিল গেহলটক সহায় কৰিছিল দিল্লী আৰক্ষীৰ এজন কনিষ্টবলে। আৰক্ষী কনিষ্টবল হোৱাৰ লগতে ছাহিলক সহায় কৰা আৰক্ষী নবীন ছাহিলৰ সম্বন্ধীয় ভাতৃও। নিকি হত্যাকাণ্ডৰ গোচৰত আৰক্ষীয়ে ইতিমধ্যে ছাহিলৰ লগতে ছাহিলৰ পিতৃ আৰু দুই বন্ধুক গ্ৰেপ্তাৰ কৰিছে। আৰক্ষীৰ প্ৰতিবেদনত প্ৰকাশ কৰা মতে সুস্থ পৰিকল্পনাৰেই নিকিক হত্যা কৰা হৈছিল। কেৱল হত্যা কৰাই নহয় নিকিৰ মৃতদেহটো ধাবাৰ ফ্ৰিজত লুকুৱাই থোৱাৰ পৰা ছাহিলৰ বিয়াৰ পাছতেই পেলাই দিয়াৰো পৰিকল্পনা কৰা হৈছিল।
আৰক্ষী সূত্ৰই প্ৰকাশ কৰা মতে, সকলো বিয়াৰ অনুষ্ঠানত সকলো ব্যস্ত থকাৰ বাবে ধাবাৰ কামকাজ বিশেষভাৱে চলি থকা নাছিল। সেয়ে তাতেই মৃতদেহটো লুকুৱাই ৰাখিছিল। বিবাহৰ অনুষ্ঠান সামৰিয়েই মৃতদেহ পেলাই দিয়াৰো দিহা কৰিছিল। লগতে সূত্ৰটোৱে দাবী কৰা অনুসৰি বিয়াৰ ঠিক এদিন আগতেই নিকিক হত্যা কৰা হৈছিল। হত্যাৰ পূৰ্বেই ফ্ৰীজত ৰখাৰো পৰিকল্পনা কৰিছিল হত্যাকাৰীয়ে। কাৰণ ফ্ৰীজত থলে মৃতদেহটো সহজে গেলি নাযায়। লগতে গোন্ধ ওলোৱাৰো সম্ভাৱণা নাথাকে। কোনোৱে সন্দেহ কৰাৰ অৱকাশো নাথাকে।
আৰক্ষীয়ে প্ৰকাশ কৰা মতে ২০২০ চনত নিকিক বিয়া কৰোৱাৰ পাছৰে পৰাই ছাহিলৰ পৰিয়ালে নিকিৰ ওপৰত অত্যাচাৰ চলাই আহিছিল। নিকিৰ সৈতে সম্পৰ্ক বিচ্ছেদ কৰাৰো চেষ্টা কৰি আহিছিল। ছাহিলৰ পৰিয়ালে নিকিৰ পৰা ছাহিলক আঁতৰাই অনাৰ শেষ উপায় হিচাপে ছাহিলৰ সৈতে অইন এগৰাকী যুৱতীৰ বিয়াৰ দিহা কৰে। এই বিষয়টোত ছাহিলেও সম্পূৰ্ণ সহযোগিতা কৰাৰ লগতে নিকিৰ পৰা বিষয়টো গোপনে ৰাখিছিল। কিন্তু বেছিদিনলৈ বিষয়টো আৰু গোপনে ৰাখিব নোৱাৰিলে ছাহিলে। ছাহিলৰ বিয়াৰ খবৰ পোৱা মাত্ৰকেই নিকি আৰু ছাহিলৰ মাজত সংঘাত বাঢ়িবলৈ ধৰে। নিকিয়ে এই বিয়াত সমস্যাৰ সৃষ্টি কৰিব বুলিয়েই অৱশেষত নিকিক হত্যাৰ ষড়যন্ত্ৰ ৰচে ছাহিলে। এই কাৰ্যত পৰিয়ালৰ লোকেও সম্পূৰ্ণ সহযোগিতা আগবঢ়াই। সকলো পৰিকল্পনা মতে হলেও আৰক্ষীৰ হাতৰ পৰা বাছি যাব নোৱাৰিলে ছাহিল আৰু ছাহিলৰ পৰিয়ালৰ সদস্যসকল। বৰ্তমান দিল্লী আৰক্ষীয়ে অধিক তথ্যৰ বাবে ছাহিলৰ সোধপোছ অব্যাহত ৰাখিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
