অসম লাইভ২৪ঃ চলিত বৰ্ষৰ সকলোতকৈ ভয়ংকৰ ৰে’ল দুৰ্ঘটনাই জোঁকাৰি গৈছে সমগ্ৰ দেশ। উৰিষ্যাৰ বালাচোৰত শুকুৰবাৰে নিশা ৭ বজাত সংঘটিত হৈছিল সেই ভয়ংকৰ দুৰ্ঘটনা। বালাচোৰৰ বহনাগা ৰে’লৱে ষ্টেচনৰ কাষত শালীমাৰ-চেন্নাই কৰোমণ্ডল এক্সপ্ৰেছ দুৰ্ঘটনগ্ৰস্ত হয়। য’ত বৰ্তমানলৈকে প্ৰাণ হেৰুৱাই ২৩৮ গৰাকী যাত্ৰীয়ে। বিপৰীত মুখৰ পৰা অহা মালবাহী এখন ট্ৰেইনে কৰোমণ্ডল এক্সপ্ৰেছত খুন্দা মৰাৰ ফলত লাইনচ্যুত হয় ৰে’লৰ ১০ টাকৈ ডবা। ইয়াৰ কিছু সময়ৰ পিছতে সেই স্থানত সংঘটিত হয় আন এক দুৰ্ঘটনা। যশোৱন্তপুৰৰ পৰা হাওৰা অভিমুখী আন এখন ট্ৰেইনে আহি খুন্দা মাৰে পূৰ্বৰ লাইনচ্যুত ডবাত । ফলত ট্ৰেকৰ পৰা নামি আহে ২ টাকৈ ডবা। দুয়োখন ট্ৰেইনৰ মুঠ ১২টা ডবা লাইনচ্যুত হোৱাৰ লগতে আন কেইবাটাও ডবা ৰে’ল লাইনৰ পৰা চিটিকি দুৰৈত পৰে। এই দুৰ্ঘটনাত আনুমানিক ২৮০ গৰাকী লোকে প্ৰাণ হেৰুৱাইছে আৰু ৯০০ ৰো অধিক লোক আঘাটপ্ৰাপ্ত হয়। ৰে’লৰ বাগৰি পৰা ডবাসমূহত আন আন যাত্ৰী আৱদ্ধ হৈ থকাৰো আশংকা প্ৰকাশ কৰা হৈছে। বিগত ১২ ঘণ্টা ধৰি অব্যাহত আছে উদ্ধাৰ অভিযান।
এই ভয়ংকৰ দুৰ্ঘটনাৰ পিছতে ঘটনাস্থলীত উপস্থিত হয় ৰে’লমন্ত্ৰী, উৰিষ্যাৰ মুখ্যমন্ত্ৰীৰ লগতে প্ৰশাসনৰ শীৰ্ষ পৰ্যায়ৰ বিষয়ববীয়া। উদ্ধাৰকাৰী দলে চলাই আছে উদ্ধাৰ অভিযান। আহতসকলক ততাতৈয়াকৈ চিকিৎসালয়ত ভৰ্তি কৰাৰ ব্যৱস্থা কৰিছে প্ৰশাসনে। ইতিমধ্যে মুকলি কৰা হৈছে কেইবাটাও হেল্পলাইন নম্বৰ। দুৰ্ঘটনাৰ পিছতে আজি প্ৰধানমন্ত্ৰী নৰেন্দ্ৰ মোডীয়ে আহ্বান কৰিছে জৰুৰী বৈঠক। কিছু সময়ৰ পিছতে ঘটনাস্থলীলৈ ৰাওনা হ’ব প্ৰধানমন্ত্ৰী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
