অসম লাইভ২৪ঃ মিজোৰামৰ নিৰ্বাচনৰ ফলাফল ঘোষণা। দেশত চলি থকা বিজেপি ঢৌক উফৰাই মিজোৰামত উৰিল আঞ্চলিক দলৰ বিজয়ধ্বজা। ZPMৰ সন্মুখত ধৰাশায়ী শাসকীয় MNF দল। মুখ্যমন্ত্ৰী হোৱাৰ পথত প্ৰাক্তন IPS বিষয়া লালডুহোমা। সেই নেতাগৰাকীৰ বিষয়ে নজনা কেইটামান বিশেষ কথা…১৯৪৯ চনৰ ২২ ফ্ৰেব্ৰুৱাৰীত জন্ম লাভ কৰা লালডুহোমাৰ পিতৃ আছিল এগৰাকী কৃষক। সৰুৰে পৰা অধ্যয়নৰ প্ৰতি আগ্ৰহী লালডুহোমাই প্ৰাৰম্ভিক শিক্ষা সমাপ্ত কৰাৰ পিছতে। ১৯৭২ চনত মিজোৰামৰ প্ৰথমজন মুখ্যমন্ত্ৰী ছছুংগাৰ প্ৰধান সহায়ক হিচাপে নিযুক্তি লাভ কৰে। কৰ্মৰ সামন্তৰালকৈ গুৱাহাটী বিশ্ববিদ্যালয়ৰ পৰা স্নাতক ডিগ্ৰী লাভ কৰে লালডুহোমাই । ইয়াৰ পিছতে তেঁও অসামৰিক সেৱাৰ বাবে মন মেলে আৰু UPSC পৰীক্ষাৰ বাবে প্ৰস্তুতি আৰম্ভ কৰে। কেইবাবছৰৰ কষ্ট সাৰ্থক হয় তেঁওৰ। ১৯৭৭ত লালডুহোমা IPS পৰীক্ষাত উৰ্ত্তীণ হয় আৰু গোৱাত তেঁও IPS বিষয়া হিচাপে কৰ্মজীৱন আৰম্ভ কৰে। ইয়াৰ ৫ বছৰৰ পিছতে তেঁও ১৯৮২ চনত প্ৰধানমন্ত্ৰী ইন্দিৰা গান্ধীৰ সুৰক্ষাৰ দায়িত্ব লাভ কৰে। প্ৰায় ২ বছৰ কাল প্ৰধানমন্ত্ৰীগৰাকীৰ দ্বায়িত্ব পালন কৰাৰ পিছত তেঁওৰে আহ্বান মৰ্মে চাকৰিৰ পৰা অৱসৰ গ্ৰহণ কৰে IPS বিষয়াগৰাকীয়ে। আৰু ১৯৬৬ চনৰ পৰা মিজোৰামত আৰম্ভ হোৱা মিজো নেচনেল ফ্ৰণ্টৰ বিদ্ৰোহ সমাপ্ত কৰি আলোচনাৰ মজিয়ালৈ আনিবলৈ লালডুহোমাক প্ৰধানমন্ত্ৰী ইন্দিৰা গান্ধীয়ে দায়িত্ব প্ৰদান কৰে। প্ৰধানমন্ত্ৰীগৰাকীয়ে দিয়া দ্বায়িত্ব মৰ্মে MNFৰ মূৰব্বী লালডেংগাক সাক্ষাৎ কৰিবলৈ লালডুহোমা লণ্ডনলৈ যায় আৰু এই সাক্ষাত্কাৰৰ পিছতে এক অডিঅ’ বাৰ্তা লৈ তেঁও মিজোৰামলৈ ঘুৰি আহে। এই বৈঠকেই হৈ পৰিছিল লালডুহোমাৰ জীৱনৰ টাৰ্নিং পইণ্ট। কিয়নো সেই সময়ত MNFৰ বাবে অডিঅ’ বাৰ্তাই হৈ পৰিছিল কংগ্ৰেছক মিজোৰাম দখলৰ মুল অস্ত্ৰ। আৰু এই অডিঅ বাৰ্তাৰ সহায়ত মিজোৰামত কংগ্ৰেছে জয় সাব্যস্ত কৰে। অসামৰিক সেৱাৰ পৰা আহি এইবাৰ ৰাজনীতিত প্ৰৱেশ কৰে লালডুহোমাই। প্ৰথমবাৰৰ বাবে মিজোৰামৰ লুংলেই সমষ্টিৰ পৰা প্ৰতিদ্বন্দ্ব্বিতাত নামে লালডুহোমাই । অৱশ্যে এই নিৰ্বাচনত তেঁও পৰাস্ত হয় যদিও তেঁওক সেইসময়ৰ প্ৰধনমন্ত্ৰী ইন্দিৰা গান্ধীয়ে মিজোৰাম ৰাজ্যিক কংগ্ৰেছৰ উপসভাপতি পদত নিযুক্তি দিয়ে ৷ লগতে ইন্দিৰা গান্ধীৰ অনুৰোধক্ৰমে ৰাজ্যপাল এইছ এছ ডুবেয়ে লালডুহোমাক প্ৰদান কৰে কেবিনেট মন্ত্ৰীৰ মৰ্যাদা। ইয়াৰ পিছত ১৯৮৪ৰ ডিচেম্বৰত আয়োজিত লোকসভাৰ নিৰ্বাচনত লালডুহোমা মিজোৰাম সমষ্টিৰ পৰা জয়ী হয়। ইয়াৰ পিছত দলীয় কামকাজৰে জড়িত হৈ পৰা লালডুহোমাই কিন্তু MNFৰে আলোচনাৰ ক্ষেত্ৰত মিজোৰামৰ মুখ্যমন্ত্ৰীয়ে দিয়া প্ৰতিশ্ৰুতি পালন নকৰাৰ বাবে ১৯৮৬ চনত কংগ্ৰেছ দলৰ সদস্য পদ ত্যাগ কৰে। কংগ্ৰেছ দল ত্যাগ কৰাৰ বাবে সাংসদ পদৰ পৰাও আঁতৰিবলগীয়া হয় নেতাগৰাকী ৷ আৰু ১৯৮৬ত লালডুহোমাই মিজো নেচনেল ইউনিয়ন (MNU) গঠন কৰে। লালডুহোমাই প্ৰথমজন দেশৰ সাংসদ। যিয়ে দল-বিৰোধী প্ৰতিৰোধ আইনৰ অধীনত ১৯৮৮ৰ ২৪ নৱেম্বৰত তেঁও সাংসদ পদ হেৰুৱাই ।ইয়াৰ পিছতে মিজোৰাম চৰকাৰৰ বাবেই MNFৰে আলোচনা লেহেমীয়া হোৱাৰ বাবে ছাত্ৰ সংগঠনৰ সৈতে লালডুহোমাই ১৯৮৬ৰ ২৩ জুনৰ পৰা অনশনত বহে ৷ যাৰ পৰিপেক্ষিতত চৰকাৰে ১৯৮৬ৰ ৩০ জুনত মিজোৰাম শান্তি চুক্তিত স্বাক্ষৰ কৰে। শান্তি চুক্তি স্বাক্ষৰৰ পিছতে এই বিদ্ৰোহ আনুষ্ঠানিকভাৱে বন্ধ কৰা হয় আৰু মিজো নেচনেল ফ্ৰণ্ট এটা স্বীকৃতিপ্ৰাপ্ত ৰাজনৈতিক দললৈ পৰিণত হয় আৰু লালডুহোমাই MNFত যোগ দি উপদেষ্টাৰ পদ গ্ৰহণ কৰে ৷ পিছে MNFত বেছি দিন নাথাকিল লালডুহোমা ৷নিজৰ সমৰ্থনক লৈ গঠন কৰা MNF(N)ক ১৯৯৭ত জোৰাম নেচনেলিষ্ট পাৰ্টী (ZNP) নামেৰে নামকৰণ কৰে। ২০০৩ চনত ZNPৰ পৰা নিৰ্বাচনত প্ৰতিদ্বন্দিতা কৰে লালডুহোমাই। মিজোৰামৰ ৰাতু সমষ্টিৰ পৰা বিধানসভালৈ নিৰ্বাচিত হয় তেঁও। ২০১৮ৰ বিধানসভাৰ নিৰ্বাচনত ZNP দলটো জোৰাম পিপলছ’ মুভমেণ্ট (ZPM)ৰ সৈতে সংযুক্ত হয়৷ লালডুহোমাক ZPMয়ে মুখ্যমন্ত্ৰী পদৰ প্ৰাৰ্থী হিচাপে প্ৰক্ষেপ কৰে। কিন্তু ZPM নিৰ্বাচন আয়োগত পঞ্জীভুক্ত নোহোৱাত দলটোৰ আন প্ৰাৰ্থীৰ লগতে লালডুহোমায়েও নিৰ্দলীয় প্ৰাৰ্থী হিচাপে প্ৰতিদন্দিতা কৰে ৷ ২০১৮ৰ নিৰ্বাচনত লালডুহোমায়ে আইজল পশ্চিম আৰু শ্বেৰচীপ সমষ্টিৰ পৰা প্ৰতিদ্বন্দ্ব্বিতা কৰে। দুয়োটো সমষ্টিৰ পৰাই জয়ী হয় ZPM নেতাগৰাকী। ২০১৮ত লালডোহুমা মিজোৰাম বিধানসভাৰ বিৰোধী দলপতি হয় ৷ ২০১৯ত ZPMক পঞ্জীভুক্ত দল হিচাপে স্বীকৃতি দিয়ে ECIয়ে। পিছে এইবাৰ Anti-defection Law মতে বিধায়ক পদ হেৰুৱাই লালডুহোমাই। পিছে অন্যান্য সংঘৰ্ষ, ঘাট প্ৰতিঘাটৰ পিছত পুনৰ ২০২১ৰ ১৭ এপ্ৰিলত শ্বেৰচীপ সমষ্টিৰ উপ নিৰ্বাচনত জয়ী হয় লালডুহোমা। আৰু তাৰ পিছত এইবাৰৰ নিৰ্বাচনত শাসকীয় MNFক ধুলিসাত্ কৰি ২৭ খন আসনত জয়লাভ কৰে ZPM য়ে। আৰু এনেদৰে মুখ্যমন্ত্ৰী হোৱাৰ পথ প্ৰায় প্ৰশস্ত হৈছে ZPM ৰ মুৰব্বী লালডুহোমাৰ। সমগ্ৰ দেশতে বিজেপি ঢৌৰ মাজত ZPM দৰে আঞ্চলিক দলৰ বিজয়ধ্বজাই সঁচাকৈ উল্লেখনীয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
