মুখ্য নিৰ্বাচন আয়ুক্ত জ্ঞানেশ কুমাৰৰ বিৰুদ্ধে উত্থাপিত অভিযোগক লৈ ছুপ্ৰিম ক’ৰ্টত গুৰুত্বপূৰ্ণ শুনানি অনুষ্ঠিত হয়। অভিযোগ অনুসৰি, নিৰ্বাচন আয়োগৰ কিছুমান সিদ্ধান্ত আন দুজন নিৰ্বাচন আয়ুক্তৰ সৈতে প্ৰয়োজনীয় ঐকমত নোহোৱাকৈ একপক্ষীয়ভাৱে গ্ৰহণ কৰা হৈছিল। এই অভিযোগৰ ভিত্তিত মুখ্য নিৰ্বাচন আয়ুক্ত জ্ঞানেশ কুমাৰক অন্তৱৰ্তীকালীনভাৱে দায়িত্বৰ পৰা আঁতৰাই ৰখাৰ দাবী উত্থাপন হৈছিল। কিন্তু ছুপ্ৰিম ক’ৰ্টে এই পৰ্যায়ত তেওঁক নিলম্বন বা দায়িত্বৰ পৰা আঁতৰোৱাৰ কোনো অন্তৱৰ্তীকালীন নিৰ্দেশ দিবলৈ অস্বীকাৰ কৰে।
মুখ্য ন্যায়াধীশ সূৰ্য কান্তৰ নেতৃত্বত গঠিত বিচাৰপীঠে বিষয়টোত নিৰ্বাচন আয়োগ, মুখ্য নিৰ্বাচন আয়ুক্ত জ্ঞানেশ কুমাৰ আৰু আন দুজন নিৰ্বাচন আয়ুক্তলৈ জাননী জাৰি কৰে অৰ্থাৎ, অভিযোগসমূহৰ বিষয়ে সংশ্লিষ্ট পক্ষসমূহৰ পৰা আদালতে আনুষ্ঠানিকভাৱে উত্তৰ বিচাৰিছে।
অভিযোগটো মূলতঃ নিৰ্বাচন আয়োগৰ সিদ্ধান্ত গ্ৰহণৰ প্ৰক্ৰিয়াক কেন্দ্ৰ কৰি। নিৰ্বাচন আয়োগত মুখ্য নিৰ্বাচন আয়ুক্তৰ লগতে আন দুজন নিৰ্বাচন আয়ুক্ত থাকে। অভিযোগ অনুসৰি, কিছুমান গুৰুত্বপূৰ্ণ সিদ্ধান্ত লোৱাৰ ক্ষেত্ৰত তিনিওজনৰ মাজত প্ৰয়োজনীয় ঐকমত্য বা সহমত নাছিল। অৰ্থাৎ, আন দুজন নিৰ্বাচন আয়ুক্তৰ মতামত বা সন্মতি অবিহনে কিছুমান সিদ্ধান্ত গ্ৰহণ কৰা হৈছিল নেকি, সেই বিষয়টো আদালতে পৰীক্ষা কৰিব বিচাৰিছে।
ছুপ্ৰিম ক’ৰ্টে এতিয়াই কোনো সিদ্ধান্ত বাতিল কৰা নাই বা মুখ্য নিৰ্বাচন আয়ুক্তক দায়িত্বৰ পৰা আঁতৰোৱা নাই। তাৰ পৰিৱৰ্তে প্ৰথমে নিৰ্বাচন আয়োগ আৰু সংশ্লিষ্ট নিৰ্বাচন আয়ুক্তসকলৰ বক্তব্য জানিবলৈ বিচাৰিছে। আদালতে এইটোও ইংগিত দিছে যে, যদি পৰৱৰ্তী পৰ্যায়ত প্ৰমাণিত হয় যে কোনো সিদ্ধান্ত প্ৰয়োজনীয় ঐকমত্য অবিহনে গ্ৰহণ কৰা হৈছিল, তেন্তে সেই সিদ্ধান্তসমূহ পুনৰ বিবেচনা কৰিব পাৰে। প্ৰয়োজন হ’লে আদালতে সেই সিদ্ধান্ত পুনৰীক্ষণ বা বাতিল কৰাৰ ব্যৱস্থাও কৰিব পাৰে।
এতিয়া নিৰ্বাচন আয়োগ আৰু তিনিওজন নিৰ্বাচন আয়ুক্তই ছুপ্ৰিম ক’ৰ্টৰ জাননীৰ উত্তৰ দিব লাগিব। তেওঁলোকৰ বক্তব্য আৰু সংশ্লিষ্ট নথি-পত্ৰ পৰীক্ষা কৰাৰ পিছত আদালতে বিষয়টোত পৰৱৰ্তী সিদ্ধান্ত ল’ব। সেয়েহে, বৰ্তমান সময়ত মুখ্য নিৰ্বাচন আয়ুক্ত জ্ঞানেশ কুমাৰক দায়িত্বৰ পৰা আঁতৰোৱাৰ কোনো অন্তৱৰ্তীকালীন নিৰ্দেশ দিয়া হোৱা নাই। কিন্তু সিদ্ধান্ত গ্ৰহণৰ ক্ষেত্ৰত নিৰ্বাচন আয়োগৰ ভিতৰত প্ৰয়োজনীয় নিয়ম আৰু ঐকমত মানি চলা হৈছিল নে নাই, সেই বিষয়টো ছুপ্ৰিম ক’ৰ্টে গুৰুত্বসহকাৰে পৰীক্ষা কৰিব। এই শুনানিৰ ফলত নিৰ্বাচন আয়োগৰ সিদ্ধান্ত গ্ৰহণ প্ৰক্ৰিয়া, আয়ুক্তসকলৰ ভূমিকা আৰু সংবিধানিক সংস্থাটোৰ ভিতৰত স্বচ্ছতা তথা সমন্বয়ৰ বিষয়টো পুনৰ চৰ্চালৈ আহিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
