পদপথত এজন লোকক ঘেৰি ধৰে সকলোৱে। ইটোৰ পাছত সিটোকৈ মুখত ভৰাই যায় মচমচীয়া ফুচকা। পদপথৰ সৰু ঠাই এটুকুৰাত নিজৰ দোকানখন বহুৱাই জলা-টেঙা ভিন্ন সোৱাদৰ ফুচকা বিক্ৰী কৰে ফুচকাৱালাই। এই ফুচকাৱালা এজনৰ দৈনিক কিমান উপাৰ্জন হ’ব পাৰে এবাৰ ভাবি চাইছেনে? এজন ফুচকাৱালাৰ দৈনিক উপাৰ্জন শুনিলে চকু কপালত উঠিব আপোনাৰ!
ব্যক্তিগত খণ্ডৰ বহু কৰ্মচাৰী অথবা বহু সংখ্যক চৰকাৰী চাকৰীয়ালৰো হয়তো মাহিলী উপাৰ্জন ইমান নহ’ব। অবিশ্বাস্য যেন লাগিলেও এই কথাৰ উমান পোৱা গৈছে এক বিশেষ ভিডিঅ’ৰ পৰা। শেহতীয়াকৈ এগৰাকী ইউটিউবাৰে শ্বেয়াৰ কৰা এটা ভিডিঅ’ত এজন ফুচকাৱালাৰ দৈনিক উপাৰ্জনে আচম্বিত কৰিছে।
ভিডিঅ’টোত ইউটিউবাৰজনে উপাৰ্জনৰ কথা সোধাত প্ৰথমতে ফুচকাৱালাজনে কেৱল ২৫ বুলি কয়। ইউটিউবাৰজনে মহিলী ২৫ হাজাৰ বুলি ভাবি পুনৰাই সোধাত ফুচকাৱালাৰ উত্তৰ শুনি হতবাক হয়। মাহিলী ২৫ হাজাৰ নহয়, বৰঞ্চ দৈনিক ২,৫০০ আয় বুলি ভুল ভাঙি দিয়ে ফুচকাৱালাজনে। যিটো হিচাপত তেওঁৰ মাহিলী উপাৰ্জন প্ৰায় ৭৫,০০০ টকা। আৰু এয়া নিসন্দেহে বহুসংখ্যক ব্যক্তিগত খণ্ডৰ তথা চৰকাৰী কৰ্মচাৰীৰ দৰমহাতকৈ অধিক।
সামাজিক মাধ্যমত ভাইৰেল হোৱা ভিডিঅ’টোত কমেণ্ট কৰে বিভিন্নজনে। বহুতে তেওঁৰ কৰ্মৰ শলাগ লোৱাৰ উপৰিও বিভিন্নজনে ফুচকাৱালাজনৰ উপাৰ্জনত ঈৰ্ষা প্ৰকাশ কৰে। কোনো কোনোৱে আনকি পঢ়ি-শুনি চাকৰি কৰাতকৈ ফুচকাৰ দোকান দিবলৈ আগ্ৰহী বুলিও ব্যংগ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
