অসম লাইভ ২৪ঃ ক’ৰোনা সংক্ৰমণৰ বাবে বিগত ছমাহত বিশ্বৰ বিভিন্ন ৰাষ্ট্ৰৰ লগতে আমাৰ দেশো তীব্ৰ অৰ্থনৈতিক সংকটৰ সন্মুখীন হৈছে। বেংকৰ পৰা ঋণ লোৱা লোকসকলে কিস্তিৰ ধন পৰিশোধ কৰিবলৈ অপাৰগ হোৱা পৰিস্থিতিত উচ্চতম ন্যায়ালয়ৰ ন্যায়াধীশ অশোক ভূষণ, ন্যায়াধীশ আৰ সুভাষ ৰেড্ডী আৰু ন্যায়াধীশ এম আৰ শ্বাহৰ ৩ জনীয়া বিচাৰপীঠে এক গুৰুত্বপূৰ্ণ নিৰ্দেশ জাৰি কৰে। ক’ৰোনা সংক্ৰমণৰ কালছোৱাত ঋণ পৰিশোধৰ ক্ষেত্ৰত বিকল্প মৰেট’ৰিয়ামৰ জৰিয়তে ঋণ লোৱা লোকসকলক সহায় কৰাৰ বাবে স্থিতি স্পষ্ট কৰিবলৈ কেন্দ্ৰক নিৰ্দেশ প্ৰদান উচ্চতম ন্যায়ালয়ৰ। ঋণ মাফৰ এমুঠিমান আৱেদনৰ ভিত্তিত এই নিৰ্দেশ প্ৰদান সৰ্বোচ্চ ন্যায়ালয়ৰ।
কেন্দ্ৰ আৰু rbiক অন্তিম সুযোগ প্ৰদান উচ্চতম ন্যায়ালয়ৰ। দুসপ্তাহৰ ভিতৰত কেন্দ্ৰ-RBIয়ে ল’ব লাগিব চূড়ান্ত সিদ্ধান্ত।
উচ্চতম ন্যায়ালয়ৰ নিৰ্দেশমৰ্মে তথ্য বিশ্লেষণৰ জৰিয়তে ঋণ লওঁতাসকলৰ কল্যাণ নিশ্চিত কৰিব লাগিব চৰকাৰে। ছেপ্টেম্বৰৰ অন্তিম সপ্তাহত পুনৰ বিষয়টো ন্যায়ালয়ত উঠিব। মৰেট’ৰিয়ামৰ সময়সীমা বৃদ্ধি বিচৰা ষ্টেণ্ডার্ড একাউণ্টৰ ঋণ লওঁতাসকলক পূৰ্বৰ নিৰ্দেশ বাহাল ৰাখি EMI নিদিলে ‘নন-পাৰফর্মিং’ সাব্যস্ত কৰিব পৰা নাযাব। ঋণ লওঁতাসকলক বেংকে নিৰাপত্তা প্ৰদান কৰিব লাগিব আৰু তেওঁলোকৰ বিৰুদ্ধে কোনো বিহিত ব্যৱস্থা গ্ৰহণ কৰিব নোৱাৰিব। বিগত সপ্তাহত উচ্চতম ন্যায়ালয়ে কৈছিল যে যিসকল ঋণ লওঁতাই মৰেট’ৰিয়ামৰ সুবিধা লাভ কৰিছে অথবা যিসকলৰ ঋণৰ কিস্তি প্ৰদানত পলম হৈছে, তেওঁলোকৰ ঋণক পৰৱর্তী নির্দেশনা পর্যন্ত ‘বেড লোন’ বুলি চিহ্নিত কৰিব নোৱাৰিব।
কেন্দ্ৰই উচ্চতম ন্যায়ালয়ক জনায় যে বিষয়টো সন্দর্ভত উচ্চ পর্যায়ত আলোচনা অব্যাহত আছে। চৰকাৰে বেংক আৰু অংশীদাৰসকলৰ লগত আলোচনাৰ জৰিয়তে ঋণ লওঁতাসকলক সকাহ দিয়া বিষয়টো পৰীক্ষা কৰি আছে। ঋণ লওঁতাসকলে সুদৰ সুদ মাফৰ ক্ষেত্ৰত জনোৱা আৱেদন সন্দর্ভত কেন্দ্ৰ আৰু ৰিজার্ভ বেংকে কয় যে এয়া হ’বলৈ হ’লে বেংকসমূহ অর্থনৈতিকভাৱে ক্ষতিগ্ৰস্ত হ’ব। পলমকৈ প্ৰদান কৰা EMIৰ সুদ ৰেহাই দিয়াটো অর্থনীতিৰ মূল নীতিৰ বিপৰীতে যাব আৰু যিসকলে নিয়মতেই ঋণ পৰিশোধ কৰিছে তেওঁলোকৰ ক্ষেত্ৰত অন্যায় হ’ব। সুদ ৰেহাই সম্ভৱ নহ’লেও EMIৰ মৰেট’ৰিয়ামৰ সময়সীমা অৱশ্যে দুবছৰলৈ বৃদ্ধি কৰিব পৰা যায় বুলি উচ্চতম ন্যায়ালয়ক জনায় কেন্দ্ৰ আৰু ৰিজার্ভ বেংকে। উল্লেখ্য যে মার্চ মাহত ৩ মাহৰ বাবে EMIৰ মৰেট’ৰিয়ামৰ সীমা বান্ধি দিছিল ৰিজার্ভ বেংকে। পিছত সময়সীমা ৩১ আগষ্টলৈ বৃদ্ধি কৰিছিল। এতিয়া মাথোঁ দুসপ্তাহৰ অপেক্ষা। EMIৰ মৰেট’ৰিয়াম সন্দর্ভত স্পষ্ট হ’ব সকলো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
