ৰাহুল গান্ধীয়ে আৰু চছমা নিপিন্ধে৷ চছমা এৰাৰ পৰাই যেন কৰোবাত ৰাহুলৰ জীৱনশৈলীয়েই সলনি হৈ গ’ল৷ চছমা এৰি ৰাহুলে নিজ চকুৰে পৃথিৱীখন চাবলৈ আৰম্ভ কৰাৰ পৰাই যেন দেখিবলৈ আৰম্ভ কৰিলে অন্য এখন পৃথিৱী৷ চছমাৰ সৈতে ৰাহুলৰ অনেক স্মৃতি বিজৰিত হৈ আছে৷ ইন্দিৰা গান্ধীৰ অন্তিম যাত্ৰাত ৰাহুলে পিন্ধি আছিল এযোৰ চছমা৷ তাৰপিছত পিতৃ ৰাজীৱ গান্ধীৰ মৃতদেহৰ কাষত ৰৈ থাকোতেও ৰাহুল গান্ধীৰ চকুত আছিল চছমা৷ চছমাৰ ফ্ৰেম সলনি হ’লেও পিতৃৰ শেষ যাত্ৰাও ৰাহুলে চছমা পিন্ধিয়েই চাইছিল৷ ৰাহুলে তেতিয়া চছমাৰে এই পৃথিৱী দেখিছিল৷
ইয়াৰপাছতেই ৯০ৰ দশকৰ শেষৰ ছবিসমূহত দেখা গৈছিল ৰাহুলে মাতৃৰ হৈ জনতাক ভোট ভীক্ষা কৰিছে৷ জনগণই তেতিয়া ৰাহুলৰ ভগ্নী প্ৰিয়ংকা গান্ধীৰ মাজতহে দেশৰ এগৰাকী ৰাজনৈতিক পৰিপক্ক ব্যক্তি দেখা পাইছিল৷ দেখা পাইছিল ইন্দিৰা গান্ধীক৷ ৰাহুল তেতিয়া তেনেই অপৰিপক্ক এজন যুৱক৷ সকলোৱে অপৰিপক্ক ভৱা ৰাহুলে মাতৃৰ আঁচলত ধৰিয়েই প্ৰথম ৰাজনীতিলৈ আহিল বুলিও বহুতেই চৰ্চা চলালে৷ ৰাহুলে কাহানিও কিন্তু এই সমালোচনাসমূহৰ জৱাব নিদিলে৷ আজিও ৰাহুলে সমালোচনাৰ জৱাব নিদিয়ে৷
৯০ৰ দশকতে ৰাহুলে প্ৰৱেশ কৰিলে সংসদীয় ৰাজনীতিত৷ ভঙা ভঙা হিন্দীৰে এটা দুটা ভাষণ দিয়ে ৰাহুলে৷ ৰাহুলৰ ভাষণৰ সমালোচনাৰে সংবাদৰ পৃষ্ঠা ভৰে৷ তেনেকৈয়ে ৰাহুল আগুৱাই থাকিল৷ হিন্দীও শিকি থাকিল৷ ২০০৪ চন৷ ৰাহুল সেইবাৰ আমেঠিৰ লোকসভা সমষ্টিৰ প্ৰাৰ্থী হ’ল৷ সমালোচনাৰ জুই থেলি ৰাহুল ওলাই আহিল সাংসদ হৈ৷ ২০০৪ৰ পৰা ২০১৪চনলৈকে এক দশকতকৈ অধিক সময় ৰাহুল সাংসদ হৈ থাকিল৷ আমেঠিৰ জনতাই তেওঁক তিনিবাৰলৈ সাংসদ কৰি দিল্লীলৈ পঠিয়ালে৷ ২০১৪চনত মোদী ঢৌত ৰাহুল যেন আকৌ কৰোবাত অকলশৰীয়া হ’ল৷ অৰ্থাৎ আমেঠিৰ জনতাই উঠাই ল’লে ৰাহুলৰ প্ৰতি থকা সমৰ্থন৷
সাংসদ ৰাহুল কেৱল দলীয় ৰাজনীতিত নিৰ্বাচনী যুঁজতেই সোমাই থাকিল তেনে নহয়৷ ৰাহুলে সংসদৰ ওপৰিও এসময়ত দায়িত্ব লৈছিল যুৱ কংগ্ৰেছৰো৷ তেওঁ যুৱকংগ্ৰেছৰ সাধাৰণ সম্পাদকো হৈছিল৷ অৱশ্যে যুৱ কংগ্ৰেছৰ সাধাৰণ সম্পাদক হিচাপে ৰাহুলে বৰ বিশেষকৈ সংগঠনটোক আগুৱাই নিব নোৱাৰিলে যাৰ বাবে দলেই তেওঁৰ পৰা সেই পদবী আঁতৰাই ল’লে৷ ৰাহুল যুৱ কংগ্ৰেছৰ সাধাৰণ সম্পাদক হৈ থাকোতেই তেওঁ ফালি পেলাইছিল এখন অধ্যাদেশ বা অৰ্ডিনেন্স৷ সমালোচনাৰ পাছত সেইবাৰ ৰাহুল সোমাই পৰিল বিতৰ্কত৷ সেই সময়ৰ পৰাই এটাৰ পাছত আনটো বিতৰ্ক ৰাহুলৰ সৈতে সাঙোৰ খায়েই থাকিল৷
নৰসীমা ৰাও আৰু সীতাৰাম কেশৰী নথকাত ছোনীয়া গান্ধীও যেন কৰোবাত পৰামৰ্শৰ অভাৱত ভূগিছিল৷ যাৰবাবে সিদ্ধান্ত লোৱাত কিছু খেলিমেলিও হৈছিল ছোনীয়াৰ৷ কিন্তু ৰাহুল যেন অন্য ধাতুৰে গঢ়া৷ ৰাহুলে কাহানিও হাৰিব নোখোজে৷ কংগ্ৰেছৰ ১০বছৰীয়া ৰাজত্বকালতেই ৰাহুলে ভালধৰণেই শিকি ল’লে ৰাজনীতিৰ পাঠ৷ বহুতেই ৰাহুলৰ যোগ্যতাক লৈ প্ৰশ্ন কৰি থাকিলেও ৰাহুলে সকলোবোৰৰ উত্তৰ কামেৰেই দি গ’ল৷ ছচিয়েল মিডিয়াত বহু উপহাসৰ চিকাৰো হ’ল ৰাহুল৷
অন্যহাতে ৰাহুলে তেওঁৰ নিজস্ব ৰাজনীতিৰ বাবে দলৰ ভিতৰতো বিভিন্ন সময়ত কন্দলত লিপ্ত হৈছে৷ কংগ্ৰেছৰ ১০ বছৰীয়া ৰাজত্ব শেষ হোৱাৰ পাছতেই শেষ হৈ গৈছিল কংগ্ৰেছৰ গাউণ্ড স্তৰত কাম কৰা লোকো৷ সেই হেৰাই যাব ধৰা মানুহখিনিক ধৰি ৰখাৰ দায়িত্ব যেন কান্ধ পাতি লৈছিল ৰাহুলে৷ মনোবৰ দিছিল কংগ্ৰেছৰ প্ৰতিগৰাকী কৰ্মীক, ‘মই আছো, ভয় নকৰিব৷ আমি আকৌ ক্ষমতা দখল কৰিমেই৷’ মোদী মডেলে ধূলিস্যাৎ কৰি পেলোৱা কংগ্ৰেছ দলৰ কৰ্মীৰ মনত ৰাহুলেই আশাৰ সঞ্চাৰ আনিছিল৷ ৰাহুলৰ তেতিয়ালৈ ভঙা ভঙা ভাষণ নহয়, ৰাহুলৰ ভাষণ হৈ পৰিছিল বহুতৰে বাবে এক মনোবল৷ শুদ্ধ ইংৰাজী, শুদ্ধ হিন্দীত ৰাহুলে দিছিল এটাৰ পাছত আনটো ভাষণ৷
ৰাহুলৰ উঠি অহা ভাৱমূৰ্তি নষ্ট কৰিবৰ বাবে মোদীয়ে সৰ্বতোপ্ৰকাৰেই চেষ্টা চলাইছিল৷ সেই চেষ্টাৰেই মোদীয়ে ৰাহুলক সজাইছিল পাপ্পু৷ ২০১৩ চনত দলৰ সহ সভাপতি আৰু ২০১৭চনত কংগ্ৰেছৰ সভাপতি পদত অধিস্থিত হয় ৰাহুল গান্ধী৷ ২০১৯ চনৰ পৰাজয়ৰ পাছত অৱশ্যে ৰাহুলে নিজেই সভাপতি পদৰ পৰা পদত্যাগ কৰে৷ সেইবাৰ ৰাহুলে হেৰুৱাই আমেঠিৰ আসনো৷ দলৰ ভিতৰতো বাঢ়িব ধৰে বিদ্ৰোহ৷ চিনাকী, চুবুৰীয়া নেতাৰ কণ্ঠতো শুনা গ’ল বিদ্ৰোহৰ সুৰ৷ কপিল ছিবাল, আনন্দ শৰ্মা, মনীশ তিৱাৰী, সন্দীপ দীক্ষিত, গুলাম নবী আজাদ. আৰপিএন সিং, জ্যোতিৰাদিত্য সিন্ধিয়া, জিতিন প্ৰসাদ, বীৰেন্দ্ৰ সিং, অশ্বিনী কুমাৰ আদিকে ধৰি বহু নেতাই ত্যাগ কৰে কংগ্ৰেছ দল৷
কিন্তু ভাৰত জোড়ো যাত্ৰা ৰাহুলৰ ৰাজনৈতিক জীৱনত এক গুৰুত্বপূৰ্ণ মাইলফলক হৈ উঠে৷ এইবাৰেই চছমা খুলিল ৰাহুলে৷ চছমাৰ আঁৰেৰে ৰাহুলে ভাৰতখনক চাবলৈ এৰিলে৷ একেবাৰে নিজা দৃষ্টিৰে ৰাহুলে চাই গ’ল দেশৰ বিভিন্ন কোণ৷ ৰাহুলৰ নতুন দৃষ্টিত ধৰা পৰিল এখন উৱলিব ধৰা সমাজৰ ছবি৷ দেশ সম্পৰ্কে ধাৰণা তেতিয়াই যেন সলনি হ’ল ৰাহুলৰ৷ সলনি হ’ল ৰাহুলৰ ভাষণ৷ প্ৰথমবাৰৰ বাবে ৰাহুলে চুই চালে খেতিয়কৰ দুহাত, চুই চালে দিনহাজিৰা কৰা মানুহৰ দুহাত৷
তেতিয়াৰে পৰাই ন্যায়বিচাৰ ডাঙৰ মন্ত্ৰ হৈ উঠে ৰাহুলৰ৷ নাৰী, অনগ্ৰসৰ শ্ৰেণী, দলিত, সংখ্যালঘূ, আদিবাসী আৰু দৰিদ্ৰৰ অধিকাৰ স্বাৰ্থৰক্ষাৰ বিষয়বোৰত মাত মাতিবলৈ ল’লে ৰাহুলে৷ সংস্কাৰৰ কথা, দুৰ্নীতিক লৈ প্ৰশ্ন কৰা আৰম্ভ কৰিলে ৰাহুলে৷ আৰ্থিকভাৱে দুৰ্বল শ্ৰেণীৰ বাবেও বিশেষ আইন অনাৰ কথা ক’বলৈ ল’লে ৰাহুলে৷ দেশৰ বৃহৎ সংখ্যক মানুহৰ কাষত কংগ্ৰেছ সোমাই পৰিল৷ ৰাহুলে সাধাৰণ মানুহক বুজিবলৈ আৰম্ভ কৰিলে৷ সাম্প্ৰতিক সময়ত মুছলমান ভোট যে ৰাহুল গান্ধী আৰু কংগ্ৰেছৰ দিশলৈ আহিছে সেয়া আপুনি নিশ্চয় অনুমান কৰিব পাৰিছে এই নিৰ্বাচনত৷
লোকসভা নিৰ্বাচনৰ ফলাফল প্ৰকাশৰ পাছতেই নতুন অৱতাৰ লৈ সকলোৰে সন্মুখত ধৰা দিছে ৰাহুলে৷ এইবাৰ সংসদৰ ভিতৰত বা কোনো মিটিঙতেই ৰাহুলে পৰিধান কৰা নাই চছমা৷ দলৰ মাজত যিসকলৰ বিদ্ৰোহী আছিল তেওঁলোকেও ৰাহুলৰ ওচৰত আত্মসমৰ্পন কৰিছে৷ এতিয়া ৰাহুলৰ আদৰ্শই হৈ উঠিছে কংগ্ৰেছৰ আদৰ্শ৷ ৰাহুলৰ চিন্তাধাৰাই কংগ্ৰেছৰ পাথেয়৷
আজি জয়লাভ কৰা কংগ্ৰেছ দলটো ৰাহুলৰ কংগ্ৰেছ৷ ৰাহুলে নকৈ গঠন কৰা কংগ্ৰেছ৷ কেন্দ্ৰীয় কমিটিতো ৰাহুলৰ মাহাত্ম্য বাঢ়িছে৷ ৰাহুল এতিয়া পাক্কা খিলাড়ী সেই কথা মানি ল’বলৈ বাধ্যও হৈছে৷ ১৫ বছৰীয়া এই সংসদীয় যাত্ৰাত প্ৰথমবাৰৰ বাবে কোনোৱে এবাৰো পাপ্পু শব্দটো ৰাহুলৰ নামৰ সৈতে মাতিবলৈ সাহস কৰা নাই৷ বিৰোধীয়েও কৰা নাই সেই সাহস৷ ছচিয়েল মিডিয়াতো নাই পাপ্পু নামৰ কোনো সমালোচনা৷ এই নিৰ্বাচনত ৰাহুলে কোনো সাক্ষাৎকাৰো দিয়া নাই৷ এতিয়া বিৰোধীৰ বাবে, সময়ে কঠোৰ কৈ গঢ়ি তোলা ৰাহুল যেন হৈ পৰিছে ত্ৰাসৰ কাৰণো৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
