প্ৰকাশ পালে ICCৰ বৰ্ষটোৰ শ্ৰেষ্ঠ ক্ৰিকেটাৰৰ নাম, শীৰ্ষ ৫ৰ ৩ গৰাকীয়েই ভাৰতৰ, পাছে প্ৰথম স্থানত কোন
আইচিচিয়ে প্ৰকাশ কৰিছে শেহতীয়া শ্ৰেষ্ঠ খেলুৱৈৰ ৰেংকিং। বুধবাৰে প্ৰকাশ পোৱা এদিনীয়া বেটছমেনৰ ৰেংকিঙত ভাৰতীয় ৩ গৰাকীকৈ খেলুৱৈয়ে স্থান লাভ কৰে। ভাৰতীয় অধিনায়ক ৰোহিত শৰ্মাই শুভমান গিলক অতিক্ৰম কৰি এদিনীয়া বেটছমেনৰ ৰেংকিঙত দ্বিতীয় স্থান দখল কৰিছে।
ৰোহিতৰ ৰেংকিং পূৰ্বতকৈ দুটা স্থান উন্নতি হৈছে। একে সময়তে শুভমান গিলে এটা স্থান পিছুৱাই তৃতীয় স্থানলৈ অৱনমিত হৈছে। শুভমানৰ পিছতে বিৰাট কোহলী এই তালিকাৰ চাৰি নম্বৰ স্থানত আছে। অৰ্থাৎ শীৰ্ষ পাঁচটা স্থানতেই আছে তিনিগৰাকী ভাৰতৰ খেলুৱৈ।
শেহতীয়াকৈ শ্ৰীলংকাৰ বিৰুদ্ধে খেলা তিনিখন মেচৰ এদিনীয়া শৃংখলাত ভাল ৰান সংগ্ৰহ কৰিছে ৰোহিতে। ২০২৩ চনৰ নৱেম্বৰ মাহত অষ্ট্ৰেলিয়াৰ বিৰুদ্ধে এদিনীয়া বিশ্বকাপৰ ফাইনেলত পৰাস্ত হোৱাৰ পিছত এইটোৱেই আছিল প্ৰথম শৃংখলা। এই সমগ্ৰ ছিৰিজত এফালে শুভমান গিল আৰু বিৰাট কোহলীকে ধৰি টিম ইণ্ডিয়াৰ বাকী বেটছমেনসকলে নিজৰ দুৰ্বল প্ৰদৰ্শনত হতাশ হোৱাৰ বিপৰীতে ৰোহিতে বাল প্ৰদৰ্শন দেখুৱায়।
আই চি চিৰ এই শীৰ্ষ খেলুৱৈৰ তালিকাত ৩টাকৈ স্থানত ভাৰতৰ খেলুৱৈ থাকিলেও শীৰ্ষ স্থান দখল কৰিবলৈ সক্ষম হোৱা নাই। এইবাৰো শীৰ্ষস্থান অক্ষুন্ন ৰাখিছে পাকিস্তানৰ বাবৰ আজমে।
বৰ্তমান পাকিস্তানৰ বাবৰ আজমে ৮২৪ ৰেটিং পইণ্টেৰে শীৰ্ষস্থান দখল কৰাৰ বিপৰীতে ৰোহিতে ৭৬৫ পইণ্টেৰে দ্বিতীয়ত আছে। শীৰ্ষ ২০ ৰ ভিতৰত থকা আন ভাৰতীয় খেলুৱৈ হৈছে- শ্ৰেয়াছ আয়াৰ ১৬ নম্বৰ স্থানত। তাৰ বিপৰীতে কে এল ৰাহুলে এটা স্থান পিছুৱাই ২১ নম্বৰ স্থানত আছে।
বলাৰৰ ক্ষেত্ৰত এই শীৰ্ষ খেলুৱৈৰ তালিকাত ভাৰতৰ এজনো খেলুৱৈ শীৰ্ষ ৩ ৰ ভিতৰত নাই। কুলদীপ যাদৱে চতুৰ্থ স্থানত আছে। শীৰ্ষ স্থানত থকা ৩ খেলুৱৈ হৈছে- দক্ষিণ আফ্ৰিকাৰ স্পিনাৰ কেশৱ মহাৰাজ, অষ্ট্ৰেলিয়াৰ জোছ হেজলউড আৰু এডাম জাম্পাৰ ।
বেগী বলাৰ জছপ্ৰিত বুমৰাহ অষ্টম স্থানত থকাৰ বিপৰীতে মহম্মদ ছিৰাজে ৫টা স্থান হেৰুৱাই নিউজিলেণ্ডৰ ট্ৰেণ্ট ব’ল্টৰ সৈতে যৌথভাৱে নৱম স্থানত আছে। ১২ নম্বৰ স্থানত আছে ছিনিয়ৰ বেগী বলাৰ মহম্মদ ছামী।
এদিনীয়া দলৰ ৰেংকিঙত ভাৰতীয় দলটোৱে ১১৮ ৰেটিং পইণ্টেৰে শীৰ্ষত থকাৰ বিপৰীতে অষ্ট্ৰেলিয়াই ১১৬ পইণ্টেৰে দ্বিতীয় স্থানত আৰু ১১২ পইণ্টেৰে তৃতীয় স্থানত আছে দক্ষিণ আফ্ৰিকা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
