ভাৰতীয় ক্ৰিকেট দলৰ এগৰাকী লেখত ল’বলগীয়া খেলুৱৈ যুৱৰাজ সিঙ৷ যুৱৰাজ সিঙৰ পিতৃ যোগৰাজ সিঙে পুত্ৰক লৈ দিয়া এক সাক্ষাৎকাৰ ভাইৰেল হৈ পৰিছে৷ সাক্ষাৎকাৰত যোগৰাজ সিঙে টিম ইণ্ডিয়াৰ প্ৰাক্তন অধিনায়ক মহেন্দ্ৰ সিং ধোনী আৰু ১৯৮৩ চনৰ বিশ্বকাপ বিজয়ী দলৰ অধিনায়ক কপিল দেৱে যুৱৰাজ সিঙৰ কেৰিয়াৰ ধ্বংস কৰাৰ অভিযোগ আনিছে৷ এই বিতৰ্কিত বক্তব্যৰ মাজতে তেওঁ সাক্ষাৎকাৰটোত ভাৰত চৰকাৰৰ ওচৰত দাবী জনাইছে যে, যুৱৰাজ সিঙক দেশৰ সৰ্বোচ্চ সন্মান ভাৰতৰত্নৰে সন্মানিত কৰিব লাগে।
যুৱৰাজ সিঙৰ কেৰিয়াৰ
ভাৰতৰ হৈ যুৱৰাজ সিঙে ৪০খন টেষ্ট, ৩০৪খন এদিনীয়া আৰু ৫৮খন টি-২০ আন্তঃৰাষ্ট্ৰীয় মেচ খেলিছে। এই সকলোবোৰ ফৰ্মেটতে তেওঁ ১০ হাজাৰৰো অধিক ৰান সংগ্ৰহ কৰিছে। টিম ইণ্ডিয়াৰ কিংবদন্তি খেলুৱৈ শচীন টেণ্ডুলকাৰ আৰু সৌৰভ গাংগুলীৰ পিছত এদিনীয়া ক্ৰিকেটত ৫০০০ ৰান সংগ্ৰহ কৰি ১০০ উইকেট দখল কৰা তৃতীয়জন ভাৰতীয় খেলুৱৈ যুৱৰাজ সিং৷
ভাৰতক ২ টা বিশ্বকাপৰ সোৱাদ দিছে যুৱৰাজে
টিম ইণ্ডিয়াই ২টা বিশ্বকাপ জয় কৰাত গুৰুত্বপূৰ্ণ ভূমিকা পালন কৰিছে যুৱৰাজ সিঙে। ২০০৭ চনৰ টি-২০ বিশ্বকাপত তেওঁ ভাল প্ৰদৰ্শন আগবঢ়াইছিল৷ ১৯৮৩ চনৰ পিছত ভাৰতে ২০০৭ত দ্বিতীয়বাৰ বিশ্ব খিতাপ দখল কৰে। এই প্ৰতিযোগিতাত ইংলেণ্ডৰ কিংবদন্তী বলাৰ ষ্টুয়াৰ্ট ব্ৰডৰ বিৰুদ্ধে এটা অভাৰত ৬টা ছিক্স সংগ্ৰহ কৰি সমগ্ৰ বিশ্বতে চৰ্চা লাভ কৰিছিল৷ ইয়াৰ পাছতে যুৱৰাজ সিঙে ২০১১ চনৰ এদিনীয়া বিশ্বকাপত নিজৰ প্ৰদৰ্শনেৰে টিম ইণ্ডিয়াক চেম্পিয়ন কৰি তোলাত গুৰুত্বপূৰ্ণ অৱদান আগবঢ়াইছিল। সমগ্ৰ প্ৰতিযোগিতাখনত তেওঁ ৩৬২ ৰান সংগ্ৰহ কৰাৰ লগতে ১৫টা উইকেটো দখল কৰে। প্ৰতিযোগিতাখনত ৪ বাৰকৈ মেন অৱ দ্য মেচ হিচাপে নিৰ্বাচিত হোৱাৰ লগতে শেষত তেওঁ প্লেয়াৰ অৱ দ্য টুৰ্ণামেণ্টৰ বঁটাও লাভ কৰে।
ভাৰতৰত্ন কিয় বিচাৰিলে যুৱৰাজৰ পিতৃয়ে?
যোগৰাজ সিঙে কয় যে কৰ্কটৰ সৈতে যুঁজি ভাৰতক চেম্পিয়ন হিচাপে গঢ়ি তোলাত তেওঁৰ পুত্ৰই অৰিহণা বহুত৷ তেওঁ ক্ৰিকেটৰ প্ৰতি আগবঢ়োৱা অৱদানৰ বাবেই সিঙক ভাৰতৰত্ন বঁটাৰে সন্মানিত কৰা উচিত। উল্লেখ্য যে বৰ্তমানলৈকে কেৱল শচীন টেণ্ডুলকাৰকহে ক্ৰীড়া জগতৰ পৰা ভাৰতৰ সৰ্বোচ্চ সন্মানেৰে সন্মানিত কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
