ইৰান আৰু ইজৰায়েলৰ মাজত উত্তেজনা ক্ৰমশ বাঢ়িব ধৰিছে৷ ইৰান আৰু ইজৰাইলৰ যুদ্ধৰ প্ৰভাৱ পৰিব ধৰিছে প্ৰায় সকলোবোৰ ক্ষেত্ৰতেই৷ অৰ্থনীতিৰ ওপৰতো প্ৰভাৱ পৰিছে, বিশ্ববজাৰত ইয়াৰ প্ৰভাৱ সু-স্পষ্ট হৈছে৷ অপৰিশোধিত তেলৰ দামতো প্ৰভাৱ পৰিছে বুলি ধাৰণা কৰিছে বিশেষজ্ঞসকলে৷ বিশ্লেষকে কৈছে, এই যুদ্ধৰ প্ৰভাৱ সকলোতকৈ বেছিকৈ পৰিছে ভাৰতৰ ১৪টা কোম্পানীৰ ওপৰত৷ এই ১৪টা কোম্পানীৰ ভিতৰত আছে আদানী আৰু টাটা গ্ৰুপো৷
ইজৰাইলত থকা সকলো সৰু বৰ ভাৰতীয় কোম্পানীত ইয়াৰ প্ৰভাৱ পৰিছে৷ ১৪টাতকৈ বেছি ভাৰতীয় সংস্থা ইজৰাইলত আছে৷ ইয়াৰ মাজতেই ডাঙৰ ডাঙৰ কোম্পানীৰ শ্বেয়াৰ বজাৰত ইতিমধ্যে পতন আৰম্ভ হৈছে৷ ইজৰাইলৰ হাইফা বন্দৰৰ মালিকানা যি সংস্থাৰ হাতত আছে সেই আদানী পোৰ্টৰ শ্বেয়াৰ ২.৫শতাংশলৈ হ্ৰাস পাইছে৷ ছান ফাৰ্মাছিউটিকেলছ শ্বেয়াৰো স্থিতিশীল হৈ আছে৷ ভাৰতীয় এই সংস্থাই ইজৰাইলৰ টেৰো ফাৰ্মাছিউটিকেলছৰ অংশীদাৰিত্বত কাম কৰি আছে৷
জেনেৰিক ঔষধ কোম্পানী ড ৰেড্ডিছ আৰু লুপিনৰ ফালেও নজৰ ৰাখিছে বিনিয়োগকাৰীয়ে৷ অন্যান্য কোম্পানীৰ মাজত এন এম ডি চি, জুৱেলাৰী নিৰ্মাতা সংস্থা কল্যাণ জুৱেলাৰ্ছ, টাইটানৰ সৈতেও ইজৰাইলৰ সম্পৰ্ক আছে৷ টাটা কনছালটেন্সি ছাৰ্ভিচেছ, উইপ্ৰ, টেক মাহিন্দ্ৰা আৰু ইনফোচিছৰ দৰে সংস্থাও আছে ইজৰাইলত৷ এইসমূহৰ দিশেও নজৰ দিছে বিনিয়োগৰাকীয়ে৷ ইয়াৰোপৰি ষ্টেট বেংক অৱ ইণ্ডিয়া আৰু লাৰছেন এণ্ড টুবৰোও ইজৰাইলত আছে৷ এইসমূহৰো শ্বেয়াৰত সংকট আহিব পাৰে৷
বিশেষজ্ঞই কৈছে, ইজৰাইলে যদি ইৰানৰ তেলৰ পৰিকাঠামোক টাৰ্গেট কৰে তেন্তে অপৰিশোধিত তেলৰ দাম আৰু বাঢ়িব পাৰে৷ ইৰানে স্পষ্টকৈ জনাই দিছে যে যুদ্ধ অব্যাহত ৰাখিব খুজিলে ইৰানেও আক্ৰমণ অব্যাহত ৰাখিব৷ ইৰানে কাঢ়া ধমকি দিছে ইজৰাইল আৰু আমেৰিকাক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
