পুৰুষৰ ভাৰতীয় ক্ৰিকেট দলক পিছ পেলাই ৮ বছৰীয়া অভিলেখ ভংগ মহিলা দলৰ
ইতিহাস ৰচিলে ভাৰতীয় মহিলা ক্ৰিকেট দলে। যি ৰেকৰ্ড ভাৰতীয় পুৰুষ দলৰ সেই ৰেকৰ্ডো ভংগ কৰিলে মহিলা দলে। আজি গুজৰাটৰ ৰাজকোটত এই ইতিহাস ৰচে মহিলা দলে। প্ৰথমবাৰৰ বাবে এদিনিয়া ইন্টাৰনেশ্যনেল ক্ৰিকেটত ৪০০ ৰান পাৰ কৰি ৰানৰ পাহাৰ গঢ়ে ভাৰতীয় মহিলা ক্ৰিকেট দলে।
আয়াৰলেণ্ডৰ বিৰুদ্ধে ৪৩৫ ৰান কৰে মহিলা দলটোৱে। আনহাতে ভাৰতীয় পুৰুষদলে এই ক্ষেত্ৰত বৰ্তমানলৈ এদিনিয়া ইন্টাৰনেশ্যনেল ক্ৰিকেটত ৪১৮ ৰান কৰিবলৈ সক্ষম হৈছে।
ভাৰতীয় মহিলা দল আৰু আয়াৰলেণ্ড মহিলা দলৰ মাজত অনুষ্ঠিত তিনিখন মেচৰ এদিনীয়া শৃংখলাৰ অন্তিমখন খেল আজি ১৫ জানুৱাৰী তাৰিখে ৰাজকোটত অনুষ্ঠিত হয়। য’ত মান্ধনা দলে বিপক্ষ দলক ৩০৪ ৰানৰ বিশাল ব্যৱধানত পৰাস্ত কৰে।
এদিনীয়া ফৰ্মেটত ৰানৰ ব্যৱধানৰ ক্ষেত্ৰত ভাৰতীয় মহিলা দলৰ এয়া সৰ্ববৃহৎ জয়। ২০১৭ চনৰ আৰম্ভণিতে পটচেফষ্ট্ৰুমত আয়াৰলেণ্ডৰ বিৰুদ্ধে ২৪৯ ৰানৰ বিশাল ব্যৱধানত জয়লাভ কৰিছিল মহিলা খেলুৱৈয়ে।
আজিৰ খেলখনত ভাৰতৰ হৈ সৰ্বাধিক সফল বলাৰ হয় অল ৰাউণ্ডাৰ দীপ্তি শৰ্মা। দলটোৰ হৈ দীপ্তিয়ে মুঠ ৮.৪ অভাৰ বলিং কৰি ২৭ ৰান খৰচ কৰি তিনিটা উইকেট লাভ কৰে। দীপ্তীৰ উপৰি তনুজা কানৱৰে দুটা আৰু তিতাছ সাধু, সয়ালি সাতঘৰে আৰু মীনু মণিয়ে ক্ৰমে এটাকৈ সফলতা অৰ্জন কৰে।
ক্ৰিকেটাৰৰ ক্ষেত্ৰত দলটোৰ হৈ প্ৰতীকা ৰাৱাল ১২৯টা বলত ১৫৪ ৰান সংগ্ৰহ কৰাৰ বিপৰীতে মান্ধনাই ৮০টা বলত ১৩৫ ৰান বৰঙণি আগবঢ়ায়। এই দুই বেটছমেনৰ বাহিৰেও উইকেটকীপাৰ খেলুৱৈ ৰিচা ঘোষে ৪২টা বলত ৫৯ ৰানৰ অৰ্ধশতক কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
