দুগুণ দাম দি অনন্ত আম্বানীয়ে পদযাত্ৰাৰ সময়তে ক্ৰয় কৰিলে শতাধিক কুকুৰা
দেশৰ অন্যতম ধনাঢ্য ব্যক্তি মুকেশ আম্বানীৰ সৰু পুত্ৰ অনন্ত আম্বানী নিজৰ কৰ্মৰ বাবে সততে বাতৰিৰ শিৰোনাত থাকে। বৰ্তমানে অনন্ত জামনগৰৰ পৰা দ্বাৰকালৈ ১৪০ কিলোমিটাৰ বাট খোজকাঢ়ি যাত্ৰা কৰাৰ বাবে বাতৰিৰ শিৰোনাম দখল কৰিছে।
জীৱ-জন্তু ভাল পোৱা অনন্তৰ এই যাত্ৰাৰ মাজতে এটা খবৰ ওলাইছে যিয়ে সকলোকে আচৰিত কৰি তুলিছে। ভ্ৰমণৰ সময়তে অনন্ত আম্বানীয়ে দুগুণ মূল্য দি প্ৰায় ২৫০ টা কুকুৰা ক্ৰয় কৰি ৰাখে। পুহিবলৈ বুলি ক্ৰয় কৰে এইদৰে দুগুণ দাম ভৰি।
ঘটনা সন্দৰ্ভত জানিব পৰা অনুসৰি কুকুৰা বচাবলৈ এইদৰে অনন্য পদক্ষেপ গ্ৰহণ কৰে অনন্ত আম্বানীয়ে। খোজ কাঢ়ি যোৱাৰ সময়ত অনন্ত আম্বানীয়ে দেখে যে এখন ট্ৰাকত ২৫০ টা কুকুৰা কচাইখানালৈ নি আছিল। লগে লগে অনন্তই সেই বাহনখন ৰখাই চালকৰ লগত কথা পতাৰ পাছত দুগুণ মূল্য দি কুকুৰাকেইটা কিনি ৰাখে।
ইয়াৰ পিছত অনন্তই কয় যে এতিয়া মই সিহঁতক পুহিম, লালন-পালন কৰিম। অনন্তই আনকি হাতত কুকুৰা এটা লৈ “জয় দ্বাৰকাধীশ” বুলি শ্লোগানো দিয়ে।
উল্লেখ্য যে, অনন্ত আম্বানীয়ে যোৱা ২৮ মাৰ্চৰ পৰা জামনগৰৰ মতি খাৱদীৰ পৰা যাত্ৰা আৰম্ভ কৰিছিল। ১০ এপ্ৰিলত দ্বাৰকাত ৩০ বছৰীয়া জন্মদিন পালন কৰাৰ উদ্দেশ্যে এইদৰে পদযাত্ৰা কৰিছিল অনন্তই। লগতে নিশাৰ ভাগত হে এইদৰে যাত্ৰা কৰিছিল অনন্তই যাতে মানুহে কোনো অসুবিধাৰ সন্মুখীন নহয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
