পহেলগামৰ হত্যাকাণ্ডত জড়িত চাৰি সন্ত্ৰাসবাদীক চিনাক্ত কৰিলে ভাৰতৰ নিৰাপত্তা সংস্থাই৷ ইতিমধ্যে চাৰি জনৰ ছবিও প্ৰকাশ কৰি পৰিচয় জনোৱা হৈছে৷ সূত্ৰৰ খবৰ অনুসৰি চাৰি সন্ত্ৰাসবাদী ক্ৰমে আদিল, আছিফ ফুজি, ছুলেমান শ্বাহ আৰু আবু তালহা৷
মঙলবাৰে দুপৰীয়া জম্মু আৰু কাশ্মীৰৰ অনন্তনাগ জিলাৰ পহেলগামৰ বৈছৰন উপত্যকাত নিৰ্বিচাৰ গুলিচালনা কৰিছিল সন্ত্ৰাসবাদীয়ে৷ সূত্ৰৰ দাবী, আক্ৰমণকাৰীৰ সংখ্যা আছিল প্ৰায় ৫ৰ পৰা ৬জন৷ সকলোৱে মুখত মাস্ক পৰিধান কৰি আছিল৷ হাতত একে-৪৭ৰ দৰে বন্দুক৷ হঠাৎ পৰ্যটকক লক্ষ্য কৰি গুলি চলাই৷ এতিয়া পৰ্যন্ত পহেলগামৰ আক্ৰমণৰ ঘটনাত ২৬ গৰাকীৰ মৃত্যু হৈছে৷ আহত হৈছে কেইবাগৰাকীও৷ নিহতৰ মাজত আছে উত্তৰপূৰ্বৰ অৰুণাচলৰো এজন লোক৷ আহত হৈছে অসমৰ এটা পৰিয়াল৷
পহেলগামৰ পাছতেই ছৌদী আৰবৰ ভ্ৰমণ আধাতে সামৰি ভাৰতলৈ উভতি আহিছে প্ৰধানমন্ত্ৰী নৰেন্দ্ৰ মোদী৷ তেওঁৰ নিৰ্দেশতেই মঙ্গলবাৰে নিশা কাশ্মীৰত উপস্থিত হয় কেন্দ্ৰীয় গৃহমন্ত্ৰী অমিত শ্বাহ৷ বুধবাৰে পুৱা তেওঁ পহেলগামত সন্ত্ৰাসবাদী আক্ৰমণত নিহতসকলক শেষ শ্ৰদ্ধাও জনোৱা হৈছে৷ আত্মীয়ৰ সৈতে যোগাযোগো কৰা হৈছে৷ ইয়াৰোপৰি জম্মু আৰু কাশ্মীৰৰ প্ৰশাসনিক বিষয়াসকলক লৈ বিশেষ বৈঠকতো মিলিত হৈছে শ্বাহ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
